У той час, як прапаганда імкнецца давесці, што эканоміка краіны знаходзіцца на пад'ёме, сапраўдны стан рэчаў у сельскай гаспадарцы сведчыць аб іншым.
«Белпол» падзяліўся з «Нашай Нівай» копіяй дакумента, які пракуратура Гомельскай вобласці накіравала першаму намесніку старшыні Гомельскага аблвыканкама Дзмітрыю Петражыцкаму.
У ім адзначаецца, што за 8 месяцаў 2024 года ў Гомельскай вобласці падзёж буйной рагатай жывёлы павялічыўся на 22,3%. Прычым гэтая тэндэнцыя назіралася ў 20 з 21 раёнаў вобласці. Найбольш жахлівыя лічбы ў Калінкавіцкім і Буда-Кашалёўскім раёнах, дзе павелічэнне адбылося адпаведна ў 3,8 і 3,3 разу.
Праверка выявіла, што асноўнымі прычынамі падзяжу стала няправільнае кармленне (амаль 46% выпадкаў) і ўтрыманне (48%) жывёлы. Напрыклад, было выяўлена, што ў летнюю спёку ў паілках нават не было вады.
Нягледзячы на тое, што Лукашэнка некалі абураўся «абасранымі каровамі», выглядае на тое, што на Гомельшчыне пра гэта забыліся.
Праверка паказала, што несвоечасова чысцяцца стойлы, мяняецца падсцілка, праводзіцца дэзынфекцыя.
Пракуратура прызнае, што на сітуацыю ўплывае і недахоп спецыялістаў. Так на 1 верасня ў цэлым па вобласці не хапала 236 (26,6%) ветэрынараў і 226 заатэхнікаў (16,9%).
Адметна, што абласное начальства ў чэрвені мінулага года прыняло пастанову, згодна з якой за кожным са старшыняў райвыканкамаў замацавалі па дзве «праблемныя» гаспадаркі. Але, як паказала жыццё, гэта не дало чаканага эфекту.
Рост падзяжу назіраўся ва ўсіх гаспадарках, якія былі замацаваны за старшынямі райвыканкамаў васьмі раёнаў вобласці, і ў палове такіх гаспадарак яшчэ дзевяці раёнаў. Найбольш дрэнна выглядалі справы ў гаспадарцы «Вежны» Светлагорскага раёна (рост у 5,9 раза), «Балотня» Рагачоўскага (у 3,7 раза), «Радзіма» Калінкавіцкага (у 3,5 раза).
На малочнай ферме «Варатын», замацаванай за старшынёй Калінкавіцкага райвыканкама, ва ўсіх 19 цялят не было ніякага корму. Пры гэтым на тэрыторыі фермы ёсць склад, дзе на момант праверкі было 8 мяшкоў патрэбнага корму, але брыгадзір не сачыў за сітуацыяй.
Пракуратура адзначае, што прычынай такога становішча з'яўляецца неадпаведнае выкананне сваіх абавязкаў работнікамі гаспадарак, адсутнасць кантролю з боку спецыялістаў і службовых асоб, а таксама неэфектыўнае кіраўніцтва з боку кіраўнікоў гаспадарак і райвыканкамаў.
Але нікога звольніць не прапануюць. Пералік патрабаванняў з боку пракуратуры складаецца з пунктаў, які пачынаюцца са слоў «забяспечыць», «прыняць меры», «павысіць», «арганізаваць».
Да чаго яшчэ дадумаюцца чыноўнікі, якія неардынарныя рашэнні прымуць, каб палепшыць сітуацыю, пакажа жыццё. Толькі падаецца, што цяляты і каровы да гэтага не дажывуць.
Лукашэнка: Ты п
аглядзі на гэтую скаціну! Яна ж уся абасраная! ВІДЭА
Лукашэнка расказаў, якія жывёлы прыходзяць да яго ў начных снах
Каля Чарнобыля жыве статак дзікіх кароў, якія навучыліся выжываць самастойна. Іх нават не трэба даіць
Кароў у Германіі вучаць хадзіць у туалет: гэта дапаможа знізіць парніковы эфект
Цяпер чытаюць
«Быў упэўнены, што я недатыкальная асоба для расіян». Першае інтэрв'ю Юрася Зянковіча на свабодзе15
Каментары
Пракуратура блытае прычыны і наступствы. У сваёй аналітыцы яны пералічылі менавіта наступствы. А прычынай з'яўляецца адсутнасць паўнавартаснага прыватнага гаспадара, які самастойна прымае кіраўнічыя рашэнні, укладае ўласныя грошы, адказвае за лёс гэтых інвестыцый, і атрымлівае прыбытак альбо нясе страты ў залежнасці ад эфектыўнасці сваёй працы. Гэта цалкам несумяшчальна з лукашэнкаўскай мадэлью кіравання сельскай гаспадаркай, у якой маёмасць - дзяржаўная (то бок лукашэнкаўская), інвестыцыі і страты - падаткаплатнікаў, а функцыі топ-мэнэджменту выконваюць прызначаныя Лукашэнкай вертыкальшчыкі, якія ні капейкай уласных грошаў за неэфектыўнасць сваёй працы не адказваюць, а ўвесь іхны маркетынг - гэта продаж харчовай сыравіны прызначаным вертыкалью перапрацоўшчыкам па фіксаваных коштах. І цэнтрамі прыбытку прызначаная перапрацоўка, фінансавыя патокі якой шчыльна кантралюе сям'я і гаманцы Лукашэнкі. А сялянам застаецца роля батракоў, якія працуюць амаль што за ежу і праз адсталасць галіны не маюць магчымасці палепшыць сваю прадукцыйнасць і заробак.