«Мучымся». Дальнабойшчык расказаў, што ў чарзе на мяжу пад Брэстам стаяць тыднямі
Кіроўца з Узбекістана расказаў выданню «Першы», што прыехаў у чаргу ў мінулы чацвер, 12 верасня, і стаў недалёка ад запраўкі «Лукойл» прыкладна за 25 кіламетраў ад мяжы. За 4 дні, кажа, праехаў кіламетраў з пяць.
«Чым займаемся ў чарзе? Мучымся. Глядзім начамі, не можам спаць. Назіраем заўсёды. Каб прадукты падвозілі, я не бачыў. У Літве, Латвіі бачыў, там фургончык прадукты возіць. А тут не бачыў. Калі такое прасоўванне будзе, то стаяць яшчэ тыдзень, больш нават можа быць», — расказаў кіроўца.
Ваду ў гарачыя дні кіроўцам у чарзе прывозяць у суправаджэнні супрацоўнікаў ДАІ брэсцкія камунальнікі. Вадавоз праязджае і спыняецца каля ахвотных набраць вады. Што да харчавання, то, як правіла, запасаюцца прадуктамі, калі праязджаюць міма крамаў. Або просяць падвозіць мясцовых знаёмых, ці калегаў, якія праязджаюць.
Паводле інфармацыі Памежнага камітэта, па стане на 16 верасня 2024 года ў чарзе фур у бок прапускнога пункта «Казловічы» знаходзіцца 850 грузавікоў. Калі памножыць гэтую колькасць на 17 (сярэдняя даўжыня фуры), гэта практычна 15 км. Плюс па пару метраў дыстанцыі і разрывы на скрыжаваннях, вось і будзе звыш 20 кіламетраў, а гэта значыць, што хвост чаргі знаходзіцца на М1.
Гэта што тычыцца польскага кірунку. Паводле звестак памежнага ведамства, на літоўскім кірунку фур яшчэ больш. Раніцай 16 верасня ў чарзе стаяла 1140 грузавікоў.
Каментары