Прэзідэнт Украіны Уладзімір Зяленскі падпісаў закон аб забароне Украінскай праваслаўнай царквы Маскоўскага патрыярхату (УПЦ МП). Зараз рэлігійныя арганізацыі, звязаныя з Расіяй, павінны цягам дзевяці месяцаў разарваць сувязі з РПЦ.
Вярхоўная Рада забараніла дзейнасць УПЦ МП некалькі дзён таму. «За» тады прагаласавалі 265 дэпутатаў.
Ініцыятарам гэтага закона яшчэ ў снежні 2022 года стаў прэзідэнт Уладзімір Зяленскі, які абвясціў тады курс на «духоўную незалежнасць ад Масквы».
УПЦ МП, да якой цяпер належаць толькі 5 працэнтаў вернікаў (пасля стварэння аўтакефальнай Праваслаўнай царквы), але якая мае 9 тысяч прыходаў, не з'яўляецца маналітнай структурай, а складаецца юрыдычна з прыходаў і епархій.
Таму Дзяржаўная служба па пытаннях этнапалітыкі і свабоды сумлення (ДЭС) павінна вызначыць, якія структуры ва Украіне маюць падпарадкаванасць і сувязі з царквой з цэнтрам у Расіі. Пасля гэтага ДЭС павінна даць ім прадпісанні пазбавіцца ад гэтай залежнасці, а калі тыя адмовяцца, то звяртацца ў суд аб забароне іх дзейнасці.
ДЭС пачне спачатку звяртацца аб адмене рэгістрацыі Кіеўскай мітраполіі і епархій, а ўжо потым асобных прыходаў.
Цяпер чытаюць
Біёлаг Сяргей Шэлег, якога асудзілі на 8,5 года за данаты, пасля раптоўнага вызвалення марыць і далей дапамагаць беларусам. Яго філасофія натхняе4
Каментары