Мінская блогерка распавяла, што траціць на жыццё $10-15 тысяч штомесяц — і ёй не хапае. Але вераць у гэта не ўсе
Блогерка Інга Мядзведзева мае 42 тысячы падпісчыкаў у інстаграме. Нядаўна яна распавяла, што кожны месяц траціць $10-15 тысяч на жыццё. Падпісчыцы пацікавіліся, на што ж можна столькі спускаць у Мінску.
Інга Мядзведзева зарабляе тым, што прадае настаўніцтва па асабістым брэндзе і вучыць весці свой блог. Блогерка вырашыла распавесці, як са сваім хлопцам плануе сямейны бюджэт.
— Агульныя расходы ў нас 10-15 тысяч долараў на месяц. Гэта без падарожжаў і назапашванняў. Проста звычайнае жыццё.
Нехта з падпісчыц пацікавіўся, на што ж можна траціць столькі грошай у сталіцы Беларусі.
— Калі шчыра, мне нават не хапае. Вельмі. Я, напрыклад, хачу каб кухар гатаваў кожны дзень. Хачу масаж за 500 рублёў сеанс, а трэба 10 [сеансаў]. Золата хачу, шмат. Галаву мыць сама не хачу. На масаж ног кожны дзень хачу хадзіць. Дарагія падарункі люблю дарыць, кожны дзень бы дарыла. Карацей, у мяне проста вельмі разгайданая хачуха. Пра шмоткі і сумкі наогул маўчу.
Блогерка таксама падзялілася, што хоча займацца гольфам:
— А гэта 200 рублёў за таксі, 200 за занятак. Два разы на тыдзень — гэта ўжо 800 рублёў, а за месяц — 3200. А яшчэ дарагія клюшкі, адзенне і гэтак далей. Ад тысячы долараў проста гольф.
Інга напісала пра іх рэгулярныя траты з хлопцам: 1250 даляраў яны плацяць за арэнду кватэры, прыкладна тысяча даляраў трэба на бізнэс-таксі, яшчэ дзве з паловай тысячы «зялёных» ідзе на ежу і тое, каб пакурыць недзе кальяны.
Лёс яшчэ 5-10 тысяч даляраў штомесяц Інга не змагла растлумачыць. Прывяла ў якасці прыкладу тое, што вырваць зуб і паставіць імплант ёй каштавала 1500 даляраў (але відавочна, што такія расходы бываюць не кожны месяц).
Здаецца, у такое віп-жыццё паверылі не ўсе падпісчыцы, бо Інга прызналася, што ў яе дырэкце шмат паведамленняў, напрыклад, з прэтэнзіямі наконт таго, што з такімі быццам бы вялікімі даходамі ў пары няма ні свайго жылля, ні нават машыны, а апранута дзяўчына не ў супербрэндавае адзенне. Але блогерка тлумачыць гэта тым, што людзей проста трыгерыць тэма яе расходаў.
Інга таксама падзялілася сваім поглядам на фінансавыя адносіны ў пары.
— Што важна для мяне? Каб мужчына зарабляў больш. Каб я пры гэтым таксама зарабляла (гэта дае мне бяспеку і ў адносінах, і ў выпадку расстання). Усе выдаткі нясе мужчына, я аплачваю толькі развіццё свайго бізнэсу. У выпадку часовых фінансавых складанасцяў у мужчыны я магу ўзяць на сябе аплату сваіх салонаў прыгажосці, адзення і іншых маіх асабістых жаданняў.
Блогерка сцвярджае, што сама добра зарабляе. У розныя часы агучвала ў сваім блогу лічбы 5-10 тысяч даляраў штомесяц. Але для Інгі важна, каб за прыгожае жыццё плаціў менавіта мужчына. Яна шукала таго, для каго гэта таксама прымальна. Хлопец Інгі маладзейшы за яе — яму 23 гады. Блогерка распавядала, што яе каханы займаецца аўтаматычнай рассылкай у LinkedIn і па пошце на Еўропу і Амерыку.
— Як усё адбываецца на практыцы? У Кірыла ёсць мой расклад, ён ведае, на што мне патрэбны грошы, і проста іх дае. У мінулых адносінах мне давалі аднолькавую суму на месяц наперад. Мне зручна і так, і так. Для мяне гэтая схема не ок, калі я не зарабляю сама. Гэта дзікая залежнасць і 100% іншае стаўленне мужчыны да цябе.
Інга кажа, што адмоваў не атрымлівае — максімум хлопец просіць пачакаць некалькі дзён. Але, як сцвярджае блогерка, раней у яе адносінах заўсёды было так, што мужчына спачатку «рве дупу», купляе ўсё і баіцца адмовіць хоць у нечым, а потым наступае момант, калі ён гэта перастае цягнуць.
— З Кірылам мы вызначылі бюджэт на кожную графу выдаткаў, перыядычна ён ставіць мяне ў вядомасць аб фінансавым стане (альбо можна ўсё, што захачу, і пабольш, альбо часова без буйных трат, але планавыя без праблем). Але я чакаць не люблю, таму тады купляю са сваіх.
Інга распавяла, што не любіць сюрпрызы, таму на выпадак, калі хлопец раптам сам захоча нешта падарыць, завяла тэлеграм-канал, дзе посціць тое, што ёй спадабалася (там ёсць, напрыклад, парфума за 618 рублёў і сукенка за 230).
Блогерка сцвярджае, што хлопец і сам не вельмі хоча яе абмяжоўваць, бо для яго важна, каб у яе ўсё было.
— Было некалькі папрокаў, я адразу казала: «Ах так, тады ок, я сама за ўсё заплачу, але гэта адбіваецца на маім стаўленні да цябе як да мужчыны» — і плаціла, але нядоўга.
Як пабрацца шлюбам з зорным футбалістам? Жонка Аляксандра Глеба распавяла, як настойліва дабівалася яго
Ці пойдзе беларускі хлопец на першае спатканне з незнаёмкай у рэстаран, калі яна хоча сама аплаціць рахунак?
«Калі я магу дазволіць сабе ў 2 гадзіны дня піць каву ў рэстаране, значыць хтосьці мяне забяспечвае». Мінская лэдзі раздае парады мужчынам
«Мы даём Штатам тое, што яны хочуць». Расійскі канал апублікаваў відэа, якое называюць запісам Рыжанкова схаванай камерай у машыне14
Каментары