Дзевяць з дзесяці беларускіх барцоў не дапусцілі да Алімпіяды ў Парыжы
Беларуская федэрацыя барацьбы (БФБ) заявіла, што барцы не дапушчаныя на Алімпійскія гульні рашэннем Міжнароднага алімпійскага камітэта.
«Беларуская федэрацыя барацьбы з вялікім шкадаваннем паведамляе, што 9 з 10 барцоў, якія адабраліся ў Парыж, не возьмуць удзел у Алімпійскіх гульнях рашэннем МАК. Гэта несправядлівае рашэнне ў адносінах да нашых спартсменаў. Усе спартсмены да гэтага прайшлі праверкі Міжнароднай федэрацыі барацьбы (UWW) і былі дапушчаныя да кваліфікацыйных турніраў, дзе яны ў сумленнай барацьбе заваявалі права быць у ліку ўдзельнікаў Алімпійскіх гульняў. Абубакар Хаслаханаў стане адзіным прадстаўніком беларускай барацьбы [на АГ-2024]», — вядзецца ў заяве БФБ.
Раней беларускія барцы ўзялі 10 неймянных ліцэнзій на Алімпіяду, нагадвае Трыбуна.
Гэта зрабілі «вольнікі» Арыян Цютрын (да 57 кг), Магамедхабіб Кадзімагамедаў (да 74 кг), Аляксандр Гуштын (да 97 кг) і Дзяніс Храмянкоў (да 125 кг), прадстаўнікі грэка-рымскага стылю Кірыл Маскевіч (да 87 кг), Абубакар Хаслаханаў (да 97 кг) і Павел Глінчук (да 130 кг), а таксама Ванеса Каладзінская (да 53 кг), Ірына Курачкіна (да 57 кг) і Вераніка Іванова (да 62 кг). Аднак, зыходзячы з заявы БФБ, з гэтых 10 чалавек дапушчаны на АГ толькі Хаслаханаў, а федэрацыя не збіраецца адпраўляць на Алімпіяду тых, хто не браў ліцэнзіі самастойна.
Нагадаем, МАК лічыць магчымым удзел у АГ спартсменаў з Беларусі і Расіі толькі ў статусе індывідуальных нейтральных атлетаў (AIN) пры выкананні шэрагу патрабаванняў, сярод якіх адсутнасць «актыўнай падтрымкі» вайны ва Украіне, а таксама кантракта з ваеннымі або сілавымі ведамствамі Беларусі або Расіі. Магчымасць допуску AIN да Гульняў вызначае спецыяльна створаная МАК камісія.
Тая сваім першым рашэннем дапусціла да АГ шасцярых беларускіх барцоў, з якіх асабіста ўзяў пуцёўку толькі Хаслаханаў.
Храмянкоў, Глінчук і Іванова былі прыпісаныя да спорткамітэта Узброеных сіл, а Цютрын, Кадзімагамедаў, Маскевіч, Каладзінская і Курачкіна ўваходзілі ў БФСТ «Дынама».
Алімпійскія гульні ў Парыжы стартуюць роўна праз месяц, 26 ліпеня. Раней паведамлялася, што ліцэнзіі на Гульні-2024 заваявалі 28 беларускіх спартоўцаў (у Токіа-2021 бралі ўдзел 109 беларускія атлеты).
На «Беларусь-1» назвалі рашэнне Сабаленкі не ўдзельнічаць у Алімпіядзе недальнабачным
Беларусцы дазволілі выступаць за Польшчу на Алімпіядзе ў Парыжы
На Алімпіядзе-2024 у Парыжы выступяць максімум 28 беларускіх спартоўцаў. І гэта катастрафічна мала
За паўтара месяцы да Алімпіяды ў Сене выявілі кішачную палачку
Сустрэчу Рыжанкова з Сікорскім папрасіў Мінск. Што каманда Ціханоўскай абмяркоўвала з палякамі да і пасля яе11
Каментары