Завялі крыміналку, але потым замялі. Такі факт быў у біяграфіі ахоўніка Лукашэнкі, які стаў намеснікам яго кіраўніка спраў

Паводле звестак Belpol, Мікалай Шкрэд пачаў служыць у Службе бяспекі Лукашэнкі (нумар вайсковай часці — 01549) яшчэ з верасня 2002 года. З таго часу прайшло шэсць гадоў, як ён патрапіў у крымінальную сітуацыю.

20 снежня 2008 года малады капітан Мікалай Шкрэд разам са сваім калегам (таксама капітанам) Алегам Копацем праводзілі вольны час у «Данькоў-клубе», які тады знаходзіўся на вуліцы Мяснікова ў Мінску. Каля другой гадзіны ночы сілавікі падняліся на чацвёрты паверх клуба, каб трапіць на дыскатэку. На ўваходзе дзяжурыў ахоўнік Фурсевіч, які іх на танцпол не пускаў. У выніку адбыўся канфлікт.

Belpol прыводзіць вытрымку з матэрыялаў крымінальнай справы:

«Знаходзячыся на чацвёртым паверсе і трымаючы ў руках па шклянцы з напоямі, жадаючы прадэманстраваць сваю фізічную перавагу і грэбаванне агульнапрынятымі нормамі паводзін у грамадстве, Шкрэд, дзейнічаючы наўмысна, нанёс раней незнаёмаму ахоўніку клуба Фурсевічу, які не пускаў яго і Копаця на дыскатэку, удар нагой у левую нагу вышэй сцягна. Пасля чаго, дзейнічаючы наўмысна, групай асоб, з хуліганскіх памкненняў, груба парушаючы грамадскі парадак і выказваючы відавочную непавагу да грамадства, Шкрэд і Копаць, які знаходзіўся ў стане алкагольнага ап'янення, нанеслі Фурсевічу не менш чатырох удараў кулакамі рук па целе, руках і твары».

Але на гэтым ахоўнікі Лукашэнкі не супакоіліся. Фурсевіч збег на лесвічную пляцоўку паміж чацвёртым і трэцім паверхамі клуба. Абодва сілавікі рушылі ўслед за ім.

«Шкрэд, працягваючы свае супрацьпраўныя дзеянні, не звяртаючы ўвагі на заклік Фурсевіча супакоіцца, нанёс яму ўдар кулаком у твар», — гаворыцца ў матэрыялах справы.

У выніку пасля бойкі ў ахоўніка начнога клуба была рана ў вобласці правага кута рота, ранкі грудной клеткі, пахвіннай вобласці, задняй паверхні пляча і перадплечча. Эксперты кваліфікавалі іх як лёгкія цялесныя пашкоджанні, якія пацягнулі за сабой кароткачасовы разлад здароўя.

У выніку ў дачыненні да Шкрэда і Копаця распачалі крымінальную справу па ч. 2 арт. 339 КК (хуліганства, здзейсненае групай асоб). Артыкул прадугледжвае розныя варыянты пакарання: арышт, або да трох гадоў абмежавання волі, або ад аднаго года да шасці гадоў пазбаўлення волі.

Аднак у 2009 годзе справу закрылі па п. 2 ч. 1 арт. 29 КПК (абставіны, якія выключаюць вядзенне па крымінальнай справе). Следчыя не знайшлі ў дзеяннях сілавікоў складу злачынства.

Павялічыць

«Наяўнасць судзімасці паводле такога артыкула аўтаматычна выключала далейшую працу ў Службе бяспекі Лукашэнкі», — тлумачыць прадстаўнік Belpol Уладзімір Жыгар.

Экс-сілавік упэўнены, што справа ў дачыненні да Шкрэда і Копаця была закрытая з-за таго, што яны былі ахоўнікамі Лукашэнкі.

«Гэтыя людзі прадстаўлялі Службу бяспекі, і, магчыма, іх кіраўніцтва знайшло ключы да праваахоўных органаў, якія змаглі перакруціць некаторыя факты. У артыкуле пра хуліганства гэта цалкам магчыма, — лічыць Уладзімір Жыгар. — Тым самым следчыя змаглі падвесці матэрыял крымінальнай справы да даволі хуткага спынення за адсутнасцю ў дзеянні складу злачынства».

Ці мог Шкрэд абысціся адміністрацыйным пакараннем, бо прычыненыя ахоўніку «Данькоў-клуба» цялесныя пашкоджанні былі лёгкімі? Уладзімір Жыгар кажа, што такое немагчыма:

«Частка другая артыкула 339 КК — гэта злоснае хуліганства, бо яно было спалучана з прычыненнем менш цяжкага цялеснага пашкоджання групай асоб (у дадзеным выпадку два чалавекі). Прымяненне мер адміністрацыйнага пакарання тут не прадугледжваецца».

Паводле інфармацыі Belpol, Алег Копаць пасля 2009 года пакінуў СБП. Уладзімір Жыгар не выключае, што яго маглі зрабіць асноўным вінаватым у інцыдэнце. Аднак дакладных звестак пра гэта ў аб'яднання былых сілавікоў няма.

• 7
• 0
• 1
• 3
• 1
• 0
• 20
• 0