Знакаміты Ельскі ўніверсітэт (ЗША) уганараваў дзевяцігадовую Бобі Уілсан. За некалькі месяцаў да гэтага на Бобі выклікалі паліцыю за тое, што яна апырсквала дамы ў сваім раёне спрэем ад насякомых.
22 кастрычніка Бобі, жыхарка штата Нью-Джэрсі, выйшла на вуліцу з самаробным рэпелентам з вады, сродка для мыцця посуду і яблычнага воцату. Гэты рэцэпт яна знайшла ў тыктоку. Дзяўчынка пачала апырскваць аб’екты ў сваім раёне, каб збіраць у пластыкавую бутэльку насякомых-ліхтарніц — істот, што могуць пашкодзіць дрэвы і знішчыць ураджай, піша ВВС.
У мінулым годзе амерыканскія вучоныя і чыноўнікі раілі людзям забіваць ліхтарніц, дзе б яны ні былі, а таксама знішчаць іх яйкі. Але суседу Бобі яе паводзіны падаліся падазронымі, і ён пазваніў у паліцыю.
Ён расказаў праваахоўнікам пра «маленькую чорную жанчыну, якая ідзе і распырсквае ўсякае на тратуары і дрэвы». Мама дзяўчынкі ахарактарызавала гэтую скаргу як прыклад дыскрымінацыі яе дачкі па колеры скуры (Бобі — афраамерыканка) і сказала, што яе дачцэ пашкодзіла такая ўвага з боку паліцыі. Так ці інакш, інцыдэнт з Бобі трапіў у загалоўкі газет, і Ельскі ўніверсітэт вырашыў падтрымаць дзяўчынку. Бобі ахвяравала ўніверсітэцкаму музею Пібадзі 27 плямістых ліхтарніц са сваёй уласнай калекцыі, а ўніверсітэт адказаў на гэта цырымоніяй у гонар дзяўчынкі і яе ўнёску ў фонд музея.
Іджэома Апара, даследчыца з Ельскай школы грамадскай аховы здароўя, ахарактарызавала гэта так: «Ельскі ўніверсітэт звычайна не робіць нічога такога, гэта нешта ўнікальнае для Бобі. Мы хацелі паказаць яе адвагу і тое, наколькі яна натхняе. Мы проста хочам упэўніцца, што яна працягвае адчуваць сябе паважанай і любімай супольнасцю Ельскага ўніверсітэта».
Каментары