Другая гадавіна смерці Тарайкоўскага, а помніка на магіле няма — у чым рэч?
10 жніўня 2020 года ў Мінску ля станцыі метро «Пушкінская» у ходзе пратэстаў быў забіты Аляксандр Тарайкоўскі — ён стаў першай ахвярай з ліку мірных дэманстрантаў. Старшыня СК прызнаў, што мужчына быў застрэлены сілавікамі, але ніякай крымінальнай справы з гэтай нагоды заведзена не было. Беларусы, што прыйшлі на месца пахавання Тарайкоўскага на Заходніх могілках на другую гадавіну смерці, заўважылі, што помніка там пакуль няма.
Як нам распавялі сваякі Аляксандра Тарайкоўскага, яны вельмі хацелі, каб помнік ужо стаяў 10 жніўня 2022-га, але фірма-вытворца зацягнула з тэрмінамі.
«Увогуле, мы вельмі доўга выбіралі, якім помнік будзе. Ніхто ж у гэтым не разбіраецца асабліва… Спачатку абмяркоўвалі адзін праект: такую скульптуру — нібыта Сашыну душу, якая ўзлятае. Але прапанаваная скульптара была залішне амбіцыйнай, скажам так. І хацелася лёгкасці, таму мы спыніліся на варыянце з крыжам і гартаваным шклом, пад якім будзе змешчаны фотаздымак Сашы.
Мы чакалі, што будуць пытанні наконт помніка (раней неабыякавыя грамадзяне скідваліся ў тым ліку на яго ўстаноўку. — НН), самім нязручна і хацелася паспець да 10 жніўня. Але нам абяцаюць, што вось-вось усё будзе гатова і зоймемся ўжо ўстаноўкай», — расказваюць блізкія Аляксандра.
На зацягванне тэрмінаў таксама паўплывала жаданне знайсці максімальна выгадны ў плане кошту варыянт і тэхнічныя нюансы. Абраная фірма прыступіла да рэалізацыі на пачатку зімы. Праект з крыжам, які ўхвалілі ўсе сваякі, абышоўся сям’і, па іх словах, амаль у пяць тысяч даляраў. Дазволіць яго сабе яны змаглі ў тым ліку, дзякуючы фінансавай дапамозе неабыякавых беларусаў, якім выказваюць удзячнасць.
Помнік Тарайкоўскаму замаўляўся з разлікам на два месцы, але другое павінна было проста быць аздобленае пліткай.
«Ніхто не чакаў, што бацька Сашы так хутка памрэ, але яму ставіць помнік пакуль рана», — каментуюць сваякі (Валерый Тарайкоўскі памёр 26 мая і быў пахаваны побач з сынам на Заходніх могілках у Мінску. — НН).
Чытайце таксама:
Два гады пасля выбараў-2020. Пра што варта памятаць
«Беларусь перадусім». Што вядома пра 23‑гадовага афіцэра спецназа, якога асудзілі на 19 гадоў за «здраду дзяржаве»8
Каментары
Хлопец жыцьцё паклаў, а замест ўсталяваньня крыжа праводзяцца банкеты з партфелямі.