Адна з галоўных айцішных кампаній краіны прадае жыллё. Аб'явы пра будучы аўкцыён, на якім будуць шукаць гаспадароў для шасці мінскіх кватэр, апублікаваныя сёння ў газеце «Звязда». Усе лоты размешчаныя па адрасе Францішка Скарыны, 41. Гэта панэльная «свечка» ў ПВТ 2013 года пабудовы, піша Onliner.by.
Важны момант: усе прапанаваныя кватэры знаходзяцца на першым паверсе. А што па цэнах? Двухпакаёвыя (кватэры пад нумарам 1, 3, 5) плошчай крыху больш за 57 квадратных метраў стартуюць з $60 800 і $60 900 па курсе. Задатак, які трэба ўнесці, каб стаць удзельнікам таргоў, складае $3040 і $3045 у эквіваленце.
З аднапакаёўкамі плошчай 42,7 кв. м сітуацыя такая. За кватэры пад нумарамі 2, 4, 6 просяць па $46 000 па курсе. І задатак у памеры $2300 у эквіваленце.
Жыллё прадаецца з мэбляй, бытавой тэхнікай і неабходнымі для жыцця дробязямі. Прыложкавыя тумбачкі, фен, пісьмовы стол, насценны гадзіннік — усё гэта ўжо будзе вас чакаць. Поўны пералік рэчаў у кожнай кватэры можна паглядзець на сайце «Інстытута нерухомасці і ацэнкі».
Крок аўкцыёну складае 1%. Прадугледжаныя і штрафы за адмову ад дамовы: $12000 у эквіваленце па лотах №1, 3, 5 і $9000 па курсе па лотах №2, 4, 6.
На растэрміноўку пакупнікам разлічваць не даводзіцца: у правілах пазначана, што на працягу 20 каляндарных дзён пасля заключэння дагавора куплі-продажу пераможца на таргах павінен будзе ўнесці ўсю суму на рахунак ЗТАА «ЭПАМ Сістэмз».
Аўкцыён адбудзецца 19 ліпеня ў 11:00 па адрасе: г. Мінск, вул. Камсамольская, д. 11, 3-ці паверх, каб. 4. Заявы прымаюцца па 15 ліпеня да 11:00, у працоўныя дні з 8:30 да 12:00, з 13:30 да 16:00 па адрасе: г. Мінск, вул. Камсамольская, 11, каб. 7.
Адкрыўшы кожную аб'яву, вы можаце заўважыць прыпіску, што цана ўказаная без ПДВ. Але не варта палохацца, яшчэ 20% ад названага кошту плаціць не прыйдзецца. Як удакладнілі ў «Інстытуце нерухомасці і ацэнкі», жылая нерухомасць у Рэспубліцы Беларусь ПДВ не абкладаецца. Таму фінальнай стане тая цана, якая будзе агучаная ў ходзе таргоў. Ніякіх нечаканых надбавак.
Каментары