Фермера, які хацеў стаць прэзідэнтам і здымаў фэйкі для СМІ, паказалі ў сюжэце дзяржТБ пра распаўсюд наркотыкаў
Гомельскага фермера, які ўдзельнічаў у прэзідэнцкіх выбарах 2020 года, Юрыя Ганцэвіча тэлерадыёкампанія «Гомель» паказала ў сюжэце пра суд за распаўсюд псіхатропаў.
З відэа вынікала, што мужчыну абвінавацілі ў працы на інтэрнэт-краму наркотыкаў з красавіка 2020-га па жнівень 2021-га года. Нібыта ён атрымоўваў тавар у Расіі, фасаваў і рабіў закладкі ў Гомельскай вобласці. Паводле следства, абвінавачаны паспеў прадаць псіхатропы як мінімум сямі пакупнікам і зарабіў каля 160 тысяч рублёў.
Пазней аказалася, што гэта «тэхнічная памылка». Асуджаны быў зусім іншы чалавек, а дзяржТБ проста выкарыстала архіўныя кадры з Ганцэвічам.
«Было паказана месца для абвінавачанага, дзе знаходзіўся грамадзянін, які не мае дачынення да вышэйзгаданага злачынства», — патлумачыла ТБ.
Чым вядомы Ганцэвіч?
Ганцэвіч — фермер і ўласнік аграсядзібы пад Гомелем. Ён балатаваўся ў дэпутаты на парламенцкіх выбарах 2019 года і пазіцыянаваў сябе як прыхільнік Сяргея Ціханоўскага. Ганцэвіч вёў блог «Народны дэпутат». Увесну 2020 года заявіў, што балатуецца ў прэзідэнты, але не сабраў подпісы. У жніўні 2020 года перад выбарамі Ганцэвіча затрымлівалі як падазраванага па артыкуле аб абразе міліцыянераў. У красавіку Ганцэвіч зняўся ў пастановачным відэа, дзе мужчыну нібыта збівалі за бел-чырвона-белы сцяжок на дзіцячым ровары.
Відэа здымаў праўладны блогер Яўген Катляроў, які скідаў фэйкі незалежным СМІ. Пасля выкрыцця Ганцэвіч заявіў, што людзі «вераць у розную брыдоту», а Святлану Ціханоўскую «запраграмавалі і завербавалі».
9 мая 2021 года Ганцэвіча затрымалі ў цэнтры Гомеля, калі ён стрыміў святкаванне Дня Перамогі. Пра арышт не паведамлялася. Ганцэвіч вёў тэлеграм-канал для прасоўвання сваёй фермерскай прадукцыі.
Цяпер чытаюць
Вінакурню Любанскага ў Мінску закрыў сакрэтны гмах, дзе запраектаваныя кабінеты для допытаў і памяшканне для спальвання дакументаў5
Вінакурню Любанскага ў Мінску закрыў сакрэтны гмах, дзе запраектаваныя кабінеты для допытаў і памяшканне для спальвання дакументаў
Беларус-вахтавік на Ямале стварае песні на беларускай мове з дапамогай ШІ. «Раней музыка была закрытым клубам. Нейрасеткі адчынілі гэтыя дзверы з нагі»1818
Каментары