«Тут жа нямала, на чале з паслом, украінцаў. Мы ж да іх ставімся па законе» — Лукашэнка завуалявана пагражае
На пасяджэнні Рады бяспекі 7 красавіка Аляксандр Лукашэнка зрабіў выпад у бок украінцаў.
«Калі ў нас там недзе адзін-два-тры-пяць чалавек засталіся, то трэба жорстка паставіць умовы, хай Макей размаўляе з гэтым паслом Украіны, і калі гэта не будзе зроблена, мы ўжо адкажам па-іншаму. Яны вельмі рызыкуюць. Бо і тут нямала, на чале з паслом, украінцаў. Мы ж ставімся да іх па законе, па-людску. Але гэта не тая сітуацыя, вялі сябе кепска, і мы вымушаныя былі рэагаваць», — сказаў Лукашэнка.
Пакуль да канца не ясна, што меў на ўвазе Аляксандр Лукашэнка ў гэтым пасажы. Ëн гаварыў нібыта пра вяртанне ў Беларусь беларусаў-дальнабойнікаў з Украіны. Але Украіна не перашкаджала выезду з краіны грамадзян Беларусі. Тысячы іх, калі не дзясяткі тысяч, пасля пачатку вайны выехалі з Украіны ў Польшчу, Венгрыю, Славакію, Румынію, некалькі дзясяткаў чалавек — наўпрост у Беларусь. Магчыма, гаворка пра ўдзельнікаў нейкай спецаперацыі беларускіх сілавікоў.
У кожным разе, словы прагучалі як завуаляваная пагроза ўкраінцам Беларусі ці тым, якія знаходзяцца ў Беларусі. Раней па сфабрыкаваных абвінавачваннях у распальванні сацыяльнай варожасці былі арыштаваныя актывісты польскай меншасці ў краіне, сярод іх Анжаліка Борыс і Андрэй Пачобут, што прывяло да абвастрэння варожасці ў адносінах з Польшчай.
Расія напала на Украіну 24 лютага, у тым ліку з тэрыторыі Беларусі. Гэтае грубае парушэнне міжнароднага права было асуджанае Генеральнай асамблеяй ААН 140 галасамі супраць пяці, сярод гэтых пяці і Беларусь.
У выніку агрэсіі загінулі ўжо дзясяткі тысяч вайскоўцаў з абодвух бакоў, а таксама мірных жыхароў. На акупаваных тэрыторыях адбываюцца сапраўдныя зверствы, іх маштаб стаў вядомы пасля разгрому расійскіх войскаў пад Кіевам.
Згодна з міжнародным правам, Беларусь лічыцца саўдзельніцай агрэсіі, бо прадаставіла сваю тэрыторыю для вядзення вайны.
Перад нападам на Украіну Аляксандр Лукашэнка ў інтэрв'ю расійскаму прапагандысцкаму ТВ заяўляў, што вайна ва Украіне працягнецца 3 — 4 дні. Падчас вайны ён некалькі разоў заклікаў кіраўніцтва Украіны капітуляваць, пагражаючы, што інакш тое самае прыйдзецца зрабіць пазней на горшых умовах.
У сённяшнім выступе на Радзе бяспекі Аляксандр Лукашэнка ўжо зыходзіў з таго, што ліквідаваць і расчляніць Украіну Расіі не ўдасца, і патрабаваў для сябе месца ў пасляваенным уладкаванні рэгіёна.
Цяпер чытаюць
Расіяне сапраўды сталі часцей купляць нерухомасць у Беларусі? Вось што расказваюць рыэлтары2
Расіяне сапраўды сталі часцей купляць нерухомасць у Беларусі? Вось што расказваюць рыэлтары
Басіст «Пятлі», яго 18‑гадовы сын і зорка «Разбітага сэрца пацана» — расказваем пра беларускамоўны гурт Prypiać, які прэзентаваў аўтарскую «Калыханку»1010
Басіст «Пятлі», яго 18‑гадовы сын і зорка «Разбітага сэрца пацана» — расказваем пра беларускамоўны гурт Prypiać, які прэзентаваў аўтарскую «Калыханку»10
Небарака з Ляхавічаў знік «на СВА» ўжо на трэці дзень, а ў барацьбе за грабавыя счапіліся сястра, сужыцелька і жонка — з чатырма дзецьмі, але чужымі88
Каментары