Шрайбман: Гісторыя з Ціманоўскай паказвае, як бюракратычная сістэма робіць міжнародны скандал з малаважнага эпізоду
Палітычны аналітык Арцём Шрайбман у сваім тэлеграм-канале аналізуе інцыдэнт вакол лёгкаатлеткі Крысціны Ціманоўскай.
«Кейс з атлеткай Ціманоўскай — наглядная ілюстрацыя, як бюракратычная сістэма, якая ўвесь год пазбаўлялася ад звычкі самакантролю, унутраных стрыманняў і рэшткаў памяркоўнасці да крытыкі, робіць з абсалютна малаважнага эпізоду міжнародны скандал.
Замежныя журналісты часта пытаюцца, ну навошта было нарывацца на сектаральныя санкцыі дзеля арышту Пратасевіча або навошта было маляваць менавіта 80% год таму?
А сістэма не працуе, яна не прымае рашэнні, узважваючы ўсе рызыкі. Стымулы настроены інакш — гасіць любой цаной тое, што можа выклікаць гнеў Першага, а калі гнеў выкліканы — гасіць з падвоенай сілай.
Цалкам упэўнены, што усё развівалася па такой схеме. Ціманоўская публікуе відэа з крытыкай спартыўных бюракратаў, якія аблажаліся з допінг-пробамі іншых спартсменак і прымушаюць яе бегчы замест іх. Відэа падхопліваюць ТГ-каналы.
Тэлевізар працуе ў рэжыме мачыць усё, што падхопліваюць ТГ-каналы, у выніку Ціманоўская — антыгерой усіх навінавых выпускаў дзяржТБ. Лукашэнка глядзіць тэлевізар і абураецца — мы ж далі ёй усё, трэніравалі за наш кошт, а яна піярыцца і посціцца. Лукашэнка тэлефануе і патрабуе зняць Ціманоўскую з гульняў і першым жа рэйсам адправіць у краіну.
Спартыўныя чыноўнікі імчацца выконваць указанне, але інфармацыя праточваецца. Яны выдумляюць версію пра агляд доктара і нестабільны эмацыйны стан спартоўкі. Яна абвяргае, што дактары яе нават аглядалі. Сусветныя СМІ падхопліваюць і робяць з гісторыі скандал, які цалкам можа абярнуцца для Беларусі вылетам з МАК або іншымі спартыўнымі санкцыямі.
Гатовы паспрачацца, калі так адбудзецца, наступная стадыя — размовы пра нарыхтаваную правакацыю і купленую загадзя Ціманоўскую. Зноў жа, падазронае прозвішча. І ўсё гэта як частка гібрыднай вайны пасля таго, як бліцкрыг не атрымаўся. А ўсё, каб Польшчы адышла Гродзенская вобласць. Ці зараз Японіі — Гомельская?
Але калі сур'ёзна, гэта гісторыя не толькі пра механізмы працы нашай дзяржавы, але і пра рэпутацыю.
Калі б спартыўныя чыноўнікі любой іншай краіны, акрамя Беларусі і, напэўна, КНДР, вырашылі давезці да аэрапорта спартсмена, знятага з гульняў за рознагалоссі са сваім начальствам, ніхто б нават не звярнуў увагі. А ў нашым выпадку ўсім нават у далёкай Японіі ясна, што можа пагражаць Ціманоўскай у краіне-донару еўрапейскай бяспекі.
Цяпер чытаюць
Яе не хацелі браць у музычную школу, а ў 14 яна сыграла ў Карнегі-холе ў Нью-Ёрку. Беларуская скрыпачка — пра жыццё ў Лондоне, заробкі і чым скрыпка Страдывары за 14 мільёнаў еўра адрозніваецца ад звычайнай2
Каментары