Jon zaminaŭ budavać svabodnaje hramadztva

Nadoječy ŭ centry Maskvy razahnali pikiet, potym mitynh… Telekanał NTV zvolniŭ kiraŭnika prahramy «Nadoječy» Leanida Parfionava… Duma pryniała zakon, jaki rezka abmiažoŭvaje mahčymaści palityčnych partyj i pravy hramadzian u arhanizacyi referendumaŭ… Ci nia praŭda — svaim źmiestam hetyja paviedamleńni nahadvajuć paviedamleńni ź Biełarusi 7—8-hadovaj daŭnaści?

Prykładna ŭ toj čas u Miensk pryjechaŭ byŭ adzin z zasnavalnikaŭ i kiraŭnikoŭ NTV Dabradziejeŭ. Jon sustrakaŭsia ź siabrami Biełaruskaj asacyjacyi žurnalistaŭ, dzialiŭsia z kalehami vopytam stvareńnia svabodnaha j niezaležnaha telebačańnia. Praź niejki čas jon uznačaliŭ infarmacyjnyja prahramy na RTR — dziaržaŭnym rasiejskim telebačańni. Na toj momant NTV užo taksama faktyčna pierajšło pad kantrol dziaržavy. Tolki niekalki prahram — siarod ich «Nadoječy» j «Svaboda słova» Savika Šustera — vybivalisia z ahulnaj płyni.

Ale paśla taho jak Šuster zapisaŭ svaju prahramu ŭ Miensku z udziełam Łukašenki, «Svaboda słova» pačała ŭsprymacca jak nazva humarystyčnaj pieradačy. Paśla skandału z Paŭłam Sielinym, jaki «niapravilna» pakazaŭ pachavańnie Vasila Bykava, treba było luboj canoj zachavać karpunkt NTV u Biełarusi. Karpunkt zachavaŭsia. Ale chto moža pryhadać temy siužetaŭ ciapierašniaha karespandenta NTV u Miensku?

Z padačy Hierasimava byŭ zvolnieny Parfionaŭ. Padstava — interviju z Malikoj Jandarbijevaj, udavoj zabitaha ŭ Katary Zielimchana Jandarbijeva. Va ŭsim siužecie — ani słova pra palityku ci rasiejskija specsłužby, za vyklučeńniem, mabyć, repliki adnaho araba: «Tak, ja čuŭ, byŭ vybuch. Zabili prezydenta Čačenii. Ja dumaju, heta zrabili rasiejcy ci niechta ź inšaj krainy. Niejkija svaje razborki».

Zabojcy eks-prezydenta niezaležnaj Ičkieryi byli złoŭlenyja amal na miescy złačynstva. Heta byŭ niečuvany pravał specsłužbaŭ, hańba na ŭvieś śviet. A pakolki sud u Dosie, u adroźnieńnie ad Basmannaha sudu ŭ Maskvie, niepadkantrolny Kramlu, zastajecca adno — adyhracca na žurnalistach.

Viktar Šandarovič, aŭtar prahramy «Lalki», jakaja adnoj ź pieršych była niekali źniataja z eteru NTV, niadaŭna pisaŭ ź ironijaj: pasprabujcie ŭjavić sabie ŭ prahramie «Čas» na 1-m kanale — nu dobra, nie na pieršym, chaj sabie na NTV — repartaž ź filtracyjnaha lahieru dzie-niebudź u Čačenii… Ciapier hetuju ahavorku možna źniać.

Vital Taras

• 0
• 0
• 0
• 0
• 0
• 0
• 0
• 0