My heta pieražyli

2002

Studzień

2002 h. pačaŭsia z uviadzieńnia ŭ najaŭnaje abaračeńnie valuty krainaŭ Eŭraźviazu — eŭra. Nasupierak zmročnym prahnozam, eŭra ŭpeŭniena pratrymałasia ceły hod, nie dajučy spusku dalaru.

Biełarusy atrymali na pačatku studzienia dobruju viestku — naša kraina dałučyłasia da Kanvencyi ab pryznańni dakumentaŭ ab vyšejšaj adukacyi ŭ eŭrapiejskim rehijonie. Našy dyplomy atrymali bolšuju vahu.

Na Kalady aryštavany dyrektar MTZ Michaił Lavonaŭ. Jaho vinavaciać u “niadbajnaści j złoŭžyvańni słužbovym stanoviščam, što pryniesła škodu dziaržavie”. Hučać mierkavańni, što aryšt byŭ papulisckim chodam Łukašenki.

24 studzienia ŭ italjanskim Asyzy źbirajucca Papa, pradstaŭniki ŭsich chryścijanskich kanfesijaŭ i 11 niechryścijanskich relihijaŭ. Razam jany molacca za mir.

Luty

Ad 8 da 24 lutaha ŭ amerykanskim Sołt-Łejk-Syty adbyvajucca XIX Alimpijskija hulni. U kamandnym zaliku Biełaruś zajmaje 19 miesca.

Urad sprabuje ekanomić hrošy na vajskoŭcach. Likvidujecca połackaja 350-ja bryhada mabilnych siłaŭ, a taksama jaje vydatnaja vajskovaja baza ŭ Baravusie.

U siaredzinie miesiaca źjaŭlajucca pieršyja znaki pachaładańnia ŭ biełaruska-rasiejskich stasunkach. A.Łukašenka zajaŭlaje žurnalistam: “Nieraŭnapraŭnaha Sajuzu nia budzie. Čamu my pavinny rabić tak, jak robić Rasieja?”.

Sakavik

Niešmatlikuju demanstracyju na Dzień Voli brutalna razhaniaje milicyja. Vynik: mnohija źbityja, 59 čałaviek zatrymanyja, ź ich 9 niepaŭnaletnich.

Na śvitanku Dnia Voli na svabodu vychodzić Andrej Klimaŭ, pradprymalnik i deputat Viarchoŭnaha Savietu, jaki adsiedzieŭ 4 hady i vyzvaliŭsia pa źmiakčeńni prysudu.

30 sakavika — parlamenckija vybary va Ŭkrainie. Pieramahaje pravacentryscki blok “Naša Ŭkraina” z apanentam prezydenta Kučmy, byłym premjeram Viktaram Juščankam na čale.

Krasavik

Biełaruskaja ŭłada sprabuje pazbycca misii ABSE. Aficyjny Miensk nie daje vizaŭ supracoŭnikam misii i nie akredytuje novych rabotnikaŭ KNH. 15 krasavika źjechać ź Biełarusi musić časovy kiraŭnik misii Mišel Ryvalje.

16 krasavika halandzki kabinet ministraŭ u poŭnym składzie idzie ŭ adstaŭku. Heta stałasia vynikam hramadzkaha rezanansu, vyklikanaha abvinavačańniem, što Halandyja vinavataja ŭ raźni, učynienaj serbami ŭ 1995 h. u Srebranicy.

21 krasavika na parlamenckich vybarach u Francyi niečakanaha pośpiechu dasiahaje krajnie pravy palityk Lo Pen. Procistaić jamu dziejny prezydent Šyrak. Hetaje procistajańnie pieratvaraje Šyraka ŭ nacyjanalnaha hieroja — jon atrymlivaje ŭ druhim tury 82% hałasoŭ i pieramahaje Lo Pena.

Travień

Pavodle sacyjalahičnych apytańniaŭ NISEPD, rejtynh Łukašenki padaje da 30%.

27 traŭnia hruzinski specnaz i rejndžery ZŠA pačynajuć supolnyja maneŭry. Biełaruskija vajskoŭcy praktykujucca adny. Naprykancy miesiaca pad Barysavam pačynajucca vučeńni “Biarezina-2002” Paŭnočna-Zachodniaha aperatyŭnaha kamandavańnia.

Rada nacyjanalnaj biaśpieki j abarony Ŭkrainy zajaŭlaje ab imknieńni krainy ŭstupić u NATO. Praz paru dzion na sustrečy z Kučmam u Čarnihavie Łukašenka pryznaje prava Kijeva ŭstupić u blok i kaža pra mahčymaść “adpaviednaha kroku z boku Biełarusi”.

Červień

U Karei j Japonii adbyvajecca futbolny mundyjal. BT spadziavałasia “skraści karcinku” na jakim inšym kanale — nia vyjšła. Narešcie pravy na tranślacyju ŭ “Kirch-Medyja” kuplajuć. Niemcy staviać umovu — kamentavać pa-biełarusku. Usia kraina śmiajecca z kalečanaj biełaruščyny navickich.

13 červienia “Itera” ŭdvaja źmianšaje pastaŭki hazu ŭ Biełaruś i patrabuje ad Miensku spłacić pazyki. U toj ža dzień ZŠA aficyjna vychodziać z damovy ab procirakietnaj abaronie 1972 h. Rasiei zastajecca tolki “vykazvać škadavańnie”.

Pucin na sustrečy ź lekarami kaža, što cajuzu Biełarusi j Rasiei nia budzie. Jon faktyčna prapanuje Biełarusi stać rasiejskaj huberniaj. Hučyć znakamity pasaž “pra muchi i katlety”. U adkaz 18 červienia Łukašenka pieraścierahaje: “Nijakim Paŭnočna-Zachodnim krajem my nia budziem!”

Skančajecca sud nad žurnalistami haradzienskaj “Pahoni” Mikołam Markievičam i Paŭłam Mažejkam. Markieviču dajuć 2,5, Mažejku — 2 hady “chimii”. Sud pryciahnuŭ uvahu mižnarodnaj hramadzkaści, ale režym na toje nie zvažaje. 25 červienia na častotach ORT pačynaje viaščać Ahulnanacyjanalnaje telebačańnie.

Lipień

16 lipienia ŭłady biaruć pad kantrol prafsajuzy. Staršyniom FPB zamiest Franca Vitka robicca Leanid Kozik.

Choć uvohule lipień zapomniŭsia nia hetym, a niečuvanaj za apošnija dziesiać hadoŭ śpiakotaj. Viciebščyna pieražyła źmiainuju navału — hadziuki ad haračyni pavypaŭzali z noraŭ. Kolišni polski prezydent Valensa musiŭ praź śpiakotu zhalić svaje znakamityja vusy.

Žnivień

Pavialičyć

Pryniaćciu himnu “My, biełarusy” nie zaškodziła navat toje, što suprać vystupili Maja i Maksim Klimkovičy, dačka i ŭnuk — spadkajemcy aŭtara FOTA ANDREJA LANKIEVIČA

14 žniŭnia Pucin prapanuje Łukašenku albo stvaryć adzinuju dziaržavu, albo budavać “analah Eŭraźviazu”. Łukašenka aburajecca.

U Siaredniaj Eŭropie pry kancy žniŭnia pačalisia katastrafičnyja pavodki, a ŭ Biełarusi leta skončyłasia zakryćciom “Svobodnych novostiej”.

Vierasień

U škołach i himnazijach uviedzienaja dziesiacibalnaja systema i piacidzionka. Navučalny hod padoŭžany da kanca červienia.

4 vieraśnia pad Krupkami adbyłasia najbujniejšaja ŭ biełaruskaj historyi aŭtakatastrofa. Sutyknułasia 17 mašynaŭ, zahinuła 10 čałaviek.

6 vieraśnia Biełaruski patryjatyčny sajuz moładzi i Biełaruski sajuz moładzi abjadnalisia ŭ Biełaruski respublikanski sajuz moładzi. Napiaredadni vyśvietliłasia, što BPSM razbazaryŭ hrošaj i majomaści na miljon dalaraŭ.

U maskoŭskich hazetach “Zavtra” i “Sovietskaja Rośsija” dy mienskaj “Sovietskoj Biełoruśsii” źjaviłasia stenahrama telefonnaj razmovy Anatola Labiedźki z Barysam Niamcovym. A 16 vieraśnia hałoŭnamu redaktaru hazety “Rabočy” Viktaru Ivaškieviču za abrazu prezydenta vynieśli prysud — 2 hady “chimii”.

18 vieraśnia — vialikaja pres-kanferencyja Łukašenki. Łukašenka admaŭlajecca ad roli “źbiralnika słavianskich ziemlaŭ”.

22 vieraśnia ŭ Niamieččynie pieramahajuć sacyjał-demakraty j “zialonyja”. Pry ŭładzie zastajecca Hierhard Šroder. A na źjeździe Sajuzu piśmieńnikaŭ staršyniom abirajuć 30-hadovaha vykładčyka BDU Alesia Paškieviča.

Pryniaty novy zakon “Ab svabodzie vieravyznańnia j relihijnych arhanizacyjach”, jaki stavić Rasiejskuju pravasłaŭnuju carkvu ŭ pryvilejavanaje stanovišča.

Kastryčnik

1 kastryčnika, padčas sustrečy sa staršyniom Dziaržkamitetu pamiežnych vojskaŭ Alaksandram Paŭłoŭskim, Łukašenka pahražaje Eŭraźviazu: “Kali z 1 studzienia budučaha hodu hetyja vydatki [na achovu miažy] nia buduć kampensavanyja, my nia zmožam zabiaśpiečyć biaśpieku Eŭropy”.

Pačynajecca zbor achviaravańniaŭ (časam prymusovy) na novy budynak Nacyjanalnaj biblijateki.

23 kastryčnika ź Biełarusi vyhaniajuć Barysa Niamcova — “za ŭmiašańnie va ŭnutranyja spravy krainy”. Hety skandał hublaje maštabnaść na tle zachopu čačencami zakładnikaŭ u maskoŭskim teatry na Dubroŭcy. U vyniku “vyzvaleńnia” hazam atručanyja nia mienš za 130 čałaviek.

Listapad

Z 1 listapada “Hazprom” na 50% skaračaje pastaŭki hazu ŭ Biełaruś. 6 śniežnia Łukašenka nazyvaje dziejańni “Hazpromu” “biesprecedentnymi” i razvažaje, jak Biełarusi vyjści z sajuznaj damovy. Premjer Navicki tłumačyć, što biełaruski ŭrad... nia viedaŭ pra zapazyčanaści.

U adstaŭku sychodzić staršynia KNR Czian Czemiń. Adbyvajecca heta ŭ ramkach źmieny pakaleńniaŭ i nie vyklikaje pieramienaŭ u kitajskaj palitycy.

U siaredzinie listapada Chusejnu ŭ apošni raz prapanujuć puścić inspektaraŭ AAN na irackija vajskovyja abjekty. Bahdad paddajecca.

20—21 listapada ŭ Prazie adbyvajecca samit NATO. Jaho achryścili “anty-Jałtaj”: Litva, Łatvija, Estonija, Rumynija, Baŭharyja, Słavaččyna j Słavienija atrymali zaprašeńnie dałučycca da bloku. Łukašenka ŭsimi sposabami sprabuje trapić na samit, ale vizy nie atrymlivaje. 14 krainaŭ-siabroŭ EZ abviaščajuć, što nia puściać na svaju terytoryju 8 vyšejšych čynoŭnikaŭ biełaruskaj dziaržavy, ZŠA dałučajucca da ich.

Śniežań

U Tokijo “źnikaje” Piatro Kraŭčanka. Praz sutki jaho znachodziać, a praz dva tydni Kraŭčanka viartajecca ŭ Biełaruś, abiacajučy nadrukavać sensacyjnyja memuary.

12—13 śniežnia — samit Eŭraźviazu ŭ Kapenhahienie. Zaprašeńnie ŭ EZ z 2004 h. atrymlivajuć 10 krainaŭ Uschodniaj Eŭropy. Eŭropa pryjšła pad našy dźviery.

• 0
• 0
• 0
• 0
• 0
• 0
• 0
• 0