Na biahučy ramont Kalinkavickaha RAUS vydatkavali bolš za 1,5 młn dalaraŭ. A potym budzie jašče i rekanstrukcyja
Padatkapłacielščykam daviadziecca zapłacić dvojčy: spačatku za terminovy ramont ciapier, a paźniej — za maštabnuju rekanstrukcyju, zaŭvažyŭ «Fłahštok».
Na ramont čarhovaha budynka RAUS u Homielskaj vobłaści vydatkavali bujnuju sumu — 4,5 młn rubloŭ (bolš za 1,5 młn dołaraŭ) nakirujuć na praviadzieńnie ramontna-adnaŭlenčych rabot u miežach zakupki «Biahučy ramont abjektaŭ AUS Kalinkavickaha rajvykankama». U pieralik uvachodziać 4‑paviarchovy administracyjny budynak, a taksama budynki IČU i składa.
Tendar abjaviła Homielskaje abłasnoje ŭpraŭleńnie kapitalnaha budaŭnictva pa zamovie UUS Homielskaha abłvykankama. Raboty pavinny pačacca ŭ mai i zaviaršycca da vieraśnia 2026 hoda.
Vydzialeńnie srodkaŭ na biahučy ramont abjektaŭ AUS u Kalinkavičach vyhladaje dziŭnym, pakolki mienavita hety kompleks raniej płanavali rekanstrujavać u najbližejšaj budučyni za rekordnuju sumu. Jak raspaviadaŭ «Fłahštok», u dadatku da Dziaržaŭnaj inviestycyjnaj prahramy na 2026—2030 hady jość pieralik abjektaŭ MUS u Homielskaj vobłaści, na budaŭnictva i rekanstrukcyju jakich płanujuć ukłaści bujnyja sumy ź biudžetu.
Tam prapisana, što amal 24 młn rubloŭ z respublikanskaha biudžetu ŭłady chočuć vydatkavać na rekanstrukcyju kompleksu budynkaŭ Kalinkavickaha RAUS. Hety prajekt pavinien pačacca ŭ 2028 hodzie, u jakim vydzielać tolki 900 tys. rub. U 2029 hodzie — 10 młn rub., a ŭ 2030 hodzie — 13 młn rub.
Zaraz ža, zhodna z defiektnym aktam u abjaŭlenym tendary na biahučy ramont, zapłanavana mnostva nievialikich rabot — ad zamieny padviasnych stolaŭ i ŭnitazaŭ da prakładki novych trubapravodaŭ i ramontu aharodžaŭ.
U kancy 2025 hoda kiraŭnik MUS Ivan Kubrakoŭ naviedvaŭ Kalinkavicki RAUS i abmiarkoŭvaŭ niuansy zapłanavanaha na 2026 hod kompleksnaha ramontu. Tady paviedamlałasia, što RAUS ujaŭlaje saboj try zbudavańni roznych hadoŭ pabudovy minułaha stahodździa. Ministr davaŭ ukazańnie razhledzieć varyjant znosu budynka 1949 hoda z nastupnym uźviadzieńniem budynka, «jaki adpaviadaje viedamasnym narmatyŭnym charaktarystykam i patrabavańniam pa ekspłuatacyi». Akramia taho, było zapłanavana praviadzieńnie ramontna-adnaŭlenčych rabot asnoŭnaha budynka rajadździeła, havaryłasia ŭ infarmacyi. «U hetym hodzie [u 2025] zajmajemsia znosam i raspracoŭvajem prajekt, u nastupnym płanujem adkryćcio novaha i zaviaršeńnie ramontu asnoŭnaha budynka», — cytavała Kubrakova MUS.
Ciapier čytajuć
«Nas u hrupie było 240. U pałonie — siamiora. Astatnija dvuchsotyja». Andrej ź Viciebska, toj samy čałaviek-adkryvačka staŭ adnym ź siami ščaśliŭcaŭ14
Kamientary
Dieti Biełarusi postojat v storonkie.