На бягучы рамонт Калінкавіцкага РАУС выдаткавалі больш за 1,5 млн даляраў. А потым будзе яшчэ і рэканструкцыя
Падаткаплацельшчыкам давядзецца заплаціць двойчы: спачатку за тэрміновы рамонт цяпер, а пазней — за маштабную рэканструкцыю, заўважыў «Флагшток».
На рамонт чарговага будынка РАУС у Гомельскай вобласці выдаткавалі буйную суму — 4,5 млн рублёў (больш за 1,5 млн долараў) накіруюць на правядзенне рамонтна-аднаўленчых работ у межах закупкі «Бягучы рамонт аб’ектаў АУС Калінкавіцкага райвыканкама». У пералік уваходзяць 4‑павярховы адміністрацыйны будынак, а таксама будынкі ІЧУ і склада.
Тэндар аб’явіла Гомельскае абласное ўпраўленне капітальнага будаўніцтва па замове УУС Гомельскага аблвыканкама. Работы павінны пачацца ў маі і завяршыцца да верасня 2026 года.
Выдзяленне сродкаў на бягучы рамонт аб’ектаў АУС у Калінкавічах выглядае дзіўным, паколькі менавіта гэты комплекс раней планавалі рэканструяваць у найбліжэйшай будучыні за рэкордную суму. Як распавядаў «Флагшток», у дадатку да Дзяржаўнай інвестыцыйнай праграмы на 2026—2030 гады ёсць пералік аб’ектаў МУС у Гомельскай вобласці, на будаўніцтва і рэканструкцыю якіх плануюць укласці буйныя сумы з бюджэту.
Там прапісана, што амаль 24 млн рублёў з рэспубліканскага бюджэту ўлады хочуць выдаткаваць на рэканструкцыю комплексу будынкаў Калінкавіцкага РАУС. Гэты праект павінен пачацца ў 2028 годзе, у якім выдзеляць толькі 900 тыс. руб. У 2029 годзе — 10 млн руб., а ў 2030 годзе — 13 млн руб.
Зараз жа, згодна з дэфектным актам у аб’яўленым тэндары на бягучы рамонт, запланавана мноства невялікіх работ — ад замены падвясных столяў і ўнітазаў да пракладкі новых трубаправодаў і рамонту агароджаў.
У канцы 2025 года кіраўнік МУС Іван Кубракоў наведваў Калінкавіцкі РАУС і абмяркоўваў нюансы запланаванага на 2026 год комплекснага рамонту. Тады паведамлялася, што РАУС уяўляе сабой тры збудаванні розных гадоў пабудовы мінулага стагоддзя. Міністр даваў указанне разгледзець варыянт зносу будынка 1949 года з наступным узвядзеннем будынка, «які адпавядае ведамасным нарматыўным характарыстыкам і патрабаванням па эксплуатацыі». Акрамя таго, было запланавана правядзенне рамонтна-аднаўленчых работ асноўнага будынка райаддзела, гаварылася ў інфармацыі. «У гэтым годзе [у 2025] займаемся зносам і распрацоўваем праект, у наступным плануем адкрыццё новага і завяршэнне рамонту асноўнага будынка», — цытавала Кубракова МУС.
Цяпер чытаюць
З Міністэрства культуры звольнілі першага намесніка Маркава1
Каментары
Дети Беларуси постоят в сторонке.