Kvatera ŭ synahozie

Adna z tych rečaŭ u Brytanii, jakija vyklikali lohki kulturny šok — heta prahmatyčna-ŭtylitarnaje, tak by mović, staŭleńnie miascovaha nasielnictva da zahrobnaha śvietu i da transcendentnaha, i prajavy hetaha staŭleńnia ŭ haradzkim planavańni.

Niepadalok ad majho domu staić typovaja anhlikanskaja carkva 18 stahodździa. Pobač z hetaj carkvoju štosubotu ładzicca nievialiki rynak, na jakim fermery pradajuć duchmiany śviežy syr, sadavinu z ułasnaj haspadarki. Ź plastykavym kubačkam kavy i z sałodkim pončykam u ruce možna prajścisia vułačkaj z pryłaŭkaŭ i prydbać sabie smačnoty da śniadanku. Rynak mieścicca na carkoŭnym dvary, raŭniutkaj zialonaj łužajcy pobač z carkvoj, krychu ŭbaku častka dvara adharožanaja, i na joj zroblena dziciačaja placoŭka z kačelami i horkaj.

A ŭzdoŭž aharodžy hetaj zialonaj łužajki akuratna sastaŭlenyja ŭ paru šerahaŭ staryja nadmahilnyja kamiani, źniatyja z byłych pachavańniaŭ na pieratvoranym u łužajku byłym prycarkoŭnym ćvintary.

Ci byli vykapanyja pachavanyja ź ziamli, albo ci mieścicca ŭtulny subotni rynačak prama na mahiłach, ja daviedvacca nia staŭ, ale heta miesca z taho času nie asabliva naviedvaju.

Niejki čas tamu ja zajmaŭsia pošukam kvatery. I jakim było pieršasnaje ździŭleńnie, kali siarod abviestak natrapiŭ na pieraabstalavanuju ŭ žyły dom… synahohu. Na fotazdymkach z pakojaŭ u kvaterach tam-siam bačylisia vybityja na ścienach nadpisy habrejskim alfabetam, a aharožany balustradaj druhi pavierch adnoj z kvateraŭ kaliści jaŭna byŭ balkonam unutry malelnaj zali. Prahmatyčnyja habrei pradali budynak svajoj byłoj synahohi paśla taho, jak ichnaja hramada zbolšaha pierabrałasia ŭ inšy rajon.

Što j kazać, kanvertavanych u žyllo anhlikanskich cerkvaŭ siarod prapanavanaj nieruchomaści było na paradak bolej. Voś takoha prykładna kštałtu.

Hetyja nazirańni prymusili zaŭvažyć, što luby kultavy budynak dla mianie, ścipłaha postsavieckaha viernika, niejak aŭtamatyčna ŭsprymiecca ŭ jakaści niedatykalnaj histaryčnaj kaštoŭnaści. Kab pradać carkvu, aśvianconaje i namolenaje miesca, inšaviercam, pahatoŭ niechryścijanam — dla hetaha, mnie zdajecca, treba albo nia mieć nijakaha inšaha vyjścia, albo niejak praźmierna paviarchoŭna stavicca da transcendentnaha i pa-pratestancku ŭsprymać nabaženstvy jak seans psychaterapii.

Miž tym, sučasny miačet benhalskaj hramady Londana źmiaščajecca ŭ byłoj kaplicy francuzaŭ-huhienotaŭ. U byłoj carkvie pratestantaŭ-kanhrehacyjanalistaŭ miaškaje ŭkrainski ŭnijacki katedralny zbor, byłaja anhlikanskaja carkva ŭ darahim rajonie była ŭ 1997 h. pieraabstalavanaja ŭ armianskuju carkvu śviatoha Jehiše. Byłaja biełaruskaja pravasłaŭnaja carkva ŭ Mančestery (jakaja pierad hetym, vidavočna, taksama była čyjojś kaplicaj) paśla śmierci ajca Jana Ababurki była pradadzienaja i ciapier užo razburanaja pad čyjści budaŭničy prajekt. Bo što jašče było rabić z pustym budynkam carkvy, čyja pastva vymierła i asymilavałasia…

Pieraabstalavańnie mohiłak pad haspadarčyja patreby ja dyk uvohule zvyksia rasceńvać jak albo prajavu ateistyčna-kamunistyčnaha barbarstva, albo jak element siužeta horar-filmaPoltergeist, dzie ŭ pabudavanym na miescy mohiłak žyłym domie mierćviaki potym vyłaziać z-pad ziamli.

Zatoje ž nieruchomaść maje kudy bolšuju kaštoŭnaść, kali jaje vokny hladziać na zialony park z ramantyčnaj zakinutaj carkvoj, čym na staryja viktaryjanskija mohiłki, skaža vam prahmatyčny londanski ryjełter…

• 0
• 0
• 0
• 0
• 0
• 0
• 0
• 0