23 lipienia adyšoŭ duchoŭny lider biełaruskaj hramady ŭ brytanskim Mančestery ajciec Janka Ababurka (1921—2009).
23 lipienia 2009 h. pamior duchoŭny lider biełaruskaj hramady ŭ brytanskim Mančestery ajciec Janka Ababurka (1921—2009).
Biełaruskaje žyćcio ŭ Mančestery biare pačatak u 1947—1948 hadoŭ, kali tut źjavilisia pieršyja arhanizacyi pavajennych emihrantaŭ. Ad samaha pačatku ŭdzieł u biełaruskaj pracy braŭ i Janka Ababurka.
Jon pachodziŭ ź vioski Morač Niaśvižskaha pavieta (siońnia Klecki r-n Minskaj vobł.). U Moračy ŭ 1940 hodzie jon ažaniŭsia, ale ŭžo ŭ 1944-m apynuŭsia ŭ Niamieččynie, adtul — praz Francyju trapiŭ u Italiju, u šerahi polskaha vojska. Razam ź inšymi vajskoŭcami Janka Ababurka byŭ pieraviezieny ŭ Vialikabrytaniju, dzie demabilizavaŭsia i ŭładkavaŭsia na pracu.
Žyŭ spačatku kala Bredfardu, paźniej pierabraŭsia ŭ Mančester, dzie dałučyŭsia da dziejnaści miascovaha adździełu Zhurtavańnia biełarusaŭ u Vialikabrytanii. Na pačatku 1960-ch, kali pravasłaŭnyja biełarusy cełaj Brytanii zastalisia bieź śviatara, Janka Ababurka vykazaŭ žadańnie pryniać śviatarstva. Paśla śpiecyjalnaha navučańnia ŭ Bielhii, 13 kastryčnika 1963 h. ŭ niamieckim Karłsrue jon atrymaŭ śviatarskija śviačeńni.
Ad hetaha času ŭ pravasłaŭnym žyćci brytanskich biełarusaŭ raspačaŭsia novy etap. Novy śviatar zdoleŭ nie tolki adnavić pracu raniej dziejnych prychodaŭ u Bredfardzie, Mančestery, ale i stvaryć novyja.
Tak, pad jaho apieku pierajšoŭ prychod sv. Mikałaja ŭ Notynhiemie.
Da pačatku 1970-ch a. Janka Ababurka byŭ adzinym śviatarom BAPC na ŭsiu Brytaniju. Jon davaŭ šluby, chryściŭ i adpraŭlaŭ pachavańni nie tolki ŭ Mančestery, ale i pa ŭsioj Anhlii.
U toj ža čas krychu naładziłasia i jaho asabistaje žyćcio. U 1966 hodzie z baćkaŭščyny pryjšła sumnaja viestka pra śmierć jahonaha adzinaha syna Mikałaja, adnak užo ŭ 1967-m a. Ababurku ŭdałosia zaprasić da siabie ź Biełarusi žonku Kaciarynu. Jana stała dobraj aporaj žyćcia śviatara, jaho viernaj spadarožnicaj. Matuška Kaciaryna stała sapraŭdnaj haspadyniaj i nabytaj ź inicyjatyvy śviatara ŭ 1972 hodzie carkvy Žyrovickaj Božaj Maci ŭ Mančestery. Heta było vydatnaje dasiahnieńnie miascovaj biełaruskaj hramady.
Ad taho času centr pravasłaŭnaha biełaruskaha žyćcia ŭ Vialikabrytanii tryvała zamacavaŭsia ŭ Mančestery, a stryžniem hetaha žyćcia staŭ ajciec Janka.
Ciaham dziesiacihodździaŭ jon vykonvaŭ svaje śviatarskija abaviazki. Praciahvaŭ słužyć i paśla śmierci ŭ 1986 h. matuški Kaciaryny. Navat ciažkaja chvaroba, što napatkała ajca Ababurku ŭ siaredzinie 1990-ch, nie vymusiła jaho całkam admovicca ad pracy. I na pačatku XXI st. jon jašče na vialikija śviaty słužyŭ u svajoj carkvie ŭ Mančestery, niahledziačy na toje, što na słužby źbiralisia ciapier usio mienš i mienš viernikaŭ — miascovaja biełaruskaja hramada imkliva źmianšałasia. Tolki ŭ apošnija hady ajciec Janka byŭ vymušany admovicca ad bahasłužbaŭ, a carkvu — plon jahonaha žyćcia — pazastałyja biełarusy Mančesteru byli prymušany vystavić na prodaž...
Jon adyšoŭ, jak pacichu spačyvaje i biełaruskaje žyćcio Mančesteru, apiryščam jakoha jon byŭ doŭhija hady.
Śvietłaja pamiać, ajciec Janka!
Ciapier čytajuć
Biełaruskija repietytary ŭ panicy: praz prablemy «Jandeksa» jany mohuć stracić materyjały, jakija napracoŭvali hadami27
Kamientary