Cichanoŭskaja ŭ Ńju-Jorku ŭziała ŭdzieł u ministerskaj sustrečy
Mierapryjemstva arhanizavali Łatvija i Jeŭrapiejski sajuz pry sadziejničańni Ofisa Śviatłany Cichanoŭskaj.
21 vieraśnia ŭ Ńju-Jorku padčas Tydnia vysokaha ŭzroŭniu 81‑j siesii Hienasamblei AAN adbyŭsia ministerski sajd-ivent, pryśviečany situacyi ŭ Biełarusi i jaje nastupstvam dla rehijanalnaj i mižnarodnaj biaśpieki. Mierapryjemstva arhanizavali Łatvija i Jeŭrapiejski sajuz pry sadziejničańni Ofisa Śviatłany Cichanoŭskaj, paviedamlaje OSC.
Udzieł u arhanizacyi taksama pryniali Ukraina, Litva, Estonija, Irłandyja, Šviecyja i Čechija. Aficyjnaja prahrama była sfakusavanaja na suviazi pamiž represijami ŭ Biełarusi, hibrydnymi pahrozami i padtrymkaj rasijskaj vajny suprać Ukrainy.
Na ivencie vystupili hienieralnaja sakratarka Jeŭrapiejskaj słužby źniešnich dziejańniaŭ Kajsa Ołanhren, ministarka zamiežnych spraŭ Łatvii Bajba Braže, hienieralny sakratar Rady Jeŭropy Alen Bierse, ministr zamiežnych spraŭ Ukrainy Andrej Sibiha, ministr zamiežnych spraŭ Litvy Kiastucis Budrys, ministr zamiežnych spraŭ Čechii Pietr Macinka, dziaržaŭny ministr Irłandyi Nił Ryčmand, namieśnik ministra zamiežnych spraŭ Estonii Marcin Rohier, pradstaŭnik MZS Šviecyi Hunar Alden, kiraŭnik Freedom House Džejmi Fłaj i lidarka biełaruskich demakratyčnych sił Śviatłana Cichanoŭskaja.
Padčas sustrečy abmierkavali niekalki pytańniaŭ, naprykład, represii i palitviaźniaŭ.
Śviatłana Cichanoŭskaja padkreśliła, što asobnyja vyzvaleńni nie aznačajuć sistemnych źmien, pakul praciahvajucca novyja zatrymańni i palityčna matyvavanyja spravy. Jana zaklikała damahacca vyzvaleńnia i reabilitacyi ŭsich palitviaźniaŭ.
Taksama byli abmierkavanyja transnacyjanalnyja represii, udzieł režymu ŭ vajnie suprać Ukrainy, Biełaruś u paradku dnia AAN, a taksama sankcyi i mižnarodnuju adkaznaść.
Demakratyčnaja lidarka zaklikała zachoŭvać cisk da sistemnych źmien, padtrymlivać miechanizmy pryciahnieńnia da adkaznaści i adnačasova izalavać režym, a nie biełarusaŭ — zachoŭvać vizy, stypiendyi, prahramy mabilnaści i padtrymku hramadzianskaj supolnaści.
«Naša meta — zrabić Biełaruś niezaležnaj, demakratyčnaj, jeŭrapiejskaj krainaj, jakaja budzie nie pastajannaj pahrozaj, a dobrym, pradkazalnym partnioram i susiedam. Toje, što adbyvajecca ŭ Biełarusi, nie zastajecca tolki ŭ Biełarusi. Režym, jaki źniščaje viaršenstva prava ŭnutry krainy, urešcie stanovicca pahrozaj i za jaje miežami», — padkreśliła Śviatłana Cichanoŭskaja.
Ciapier čytajuć
Aryštavany sienatar Karpicki, hałoŭny doktar Bresckaj abłasnoj balnicy4
Kamientary