«Zastałosia niekalki miesiacaŭ». Techkampanii zaklikali rychtavacca da kibieratak z vykarystańniem ŠI

«U nas zastałosia abmiežavanaje akno dla ŭzmacnieńnia kibierabarony», — pišuć pradstaŭniki technałahičnaj industryi ŭ adkrytym liście, apublikavanym 27 žniŭnia na sajcie OpenAI. Na jaho źviartaje ŭvahu vydańnie Axios.

Padpisanty čakajuć, što ŭžo ŭ najbližejšyja miesiacy kibierataki z vykarystańniem ŠI stanuć značna bolš masavymi i składanymi pa miery rostu mahčymaściaŭ madelaŭ. Pad pahrozaj mohuć apynucca kampanii i hramadskija słužby, ad jakich zaležyć paŭsiadzionnaje žyćcio, — u tym liku balnicy, sistemy vodazabieśpiačeńnia i infrastruktura, što zabiaśpiečvaje pracu internetu.

Pry hetym aŭtary lista ličać, što ciapierašniaha ŭzroŭniu abarony ŭžo niedastatkova. U infarmacyjnych sistemach hadami nazapašvalisia ŭraźlivaści: pamyłki ŭ prahramnym zabieśpiačeńni i naładach, praźmiernyja pravy dostupu, słabyja miechanizmy aŭtentyfikacyi i sastarełyja sistemy bieź nieabchodnych abnaŭleńniaŭ. Asabliva vostra hetaja prablema staić pierad krytyčnaj infrastrukturaj, dzie słužbam biaśpieki časta nie chapaje resursaŭ.

Aŭtary zaklikajuć vykarystać pieravahi samoha ŠI dla abarony. Na ich dumku, takija instrumienty mohuć zrabić pracu śpiecyjalistaŭ pa kibierbiaśpiecy chutčejšaj i tańniejšaj, a abmien hatovymi rašeńniami dazvolić vykarystoŭvać vyniki pracy adnoj arhanizacyi dla abarony inšych.

Što prapanujecca

U liście prapanavany asobny płan dziejańniaŭ dla biznesu, kibierbiaśpiečnych i technałahičnych kampanij, uładaŭ i raspracoŭščykaŭ najbolš mahutnych madelaŭ ŠI.

Zvyčajnym arhanizacyjam prapanujuć u pieršuju čarhu likvidavać najbolš niebiaśpiečnyja ŭraźlivaści i pavysić patrabavańni da biaśpieki ŭsiaho, što jany kuplajuć, raspracoŭvajuć i ŭkaraniajuć. Asobna zhadvajecca prahramny kod, stvorany z dapamohaj ŠI: da jaho taksama pavinny prymianiacca stražejšyja patrabavańni.

Kampanii ŭ śfiery kibierbiaśpieki i technałohij zaklikajuć jak maha chutčej testavać i raspracoŭvać instrumienty abarony na asnovie ŠI, jakimi zmohuć karystacca apieratary krytyčnaj infrastruktury. Akramia taho, takija kampanii pavinny abmieńvacca pamiž saboj infarmacyjaj pra kibierpahrozy.

Uradam prapanujuć palepšyć kanały abmienu infarmacyjaj, jakaja moža vykarystoŭvacca dla supraćdziejańnia pahrozam, kaardynavać kibierabaronu na miascovym, nacyjanalnym i mižnarodnym uzroŭniach, a taksama finansavać jaje.

Asobnyja prapanovy adrasavanyja raspracoŭščykam najbolš mahutnych madelaŭ ŠI. Padčas surjoznych kibierincydentaŭ jany pavinny davać śpiecyjalistam pa abaronie dostup da svaich najbolš daskanałych madelaŭ dla reahavańnia na ataki. Aŭtary lista taksama zaklikajuć takija kampanii zabiaśpiečvać značnaje finansavańnie, navučańnie i niepasrednuju techničnuju padtrymku — asabliva apierataram krytyčnaj infrastruktury.

Jak adznačaje Axios, zvarot źjaviŭsia na fonie chvali kibieratak na krytyčnuju infrastrukturu. U jakaści prykładu vydańnie zhadvaje ataku na sistemy vodazabieśpiačeńnia ŭ ZŠA, padčas jakoj, jak miarkujecca, vykarystoŭvaŭsia stvorany z dapamohaj ŠI skrypt dla ekspłuatacyi ŭraźlivaści.

Abjekty krytyčnaj infrastruktury, takija, jak sistemy vodazabieśpiačeńnia i elektrastancyi, daŭno mieli ŭraźlivaści ŭ instrumientach kiravańnia abstalavańniem. Adnak raniej chakieram patrabavałasia vielizarnaja kolkaść času, kab razabracca ŭ składanaściach hetych sistem.

Madeli ŠI ciapier radykalna źnižajuć paroh uvachodu, dazvalajučy chakieram tracić značna mienš času i enierhii na padrychtoŭku takich atak, pra što ekśpierty raniej paviedamlali Axios.

Pry hetym, jak adznačaje vydańnie, padpisanty adkrytaha lista nie ŭziali na siabie kankretnych abaviazacielstvaŭ. U dakumiencie niama terminaŭ realizacyi prapanavanych mier abo abiacańniaŭ kankretnych inviestycyj.

• 0
• 0
• 3
• 0
• 0
• 0
• 1
• 0