Na radzimie Kastusia Kalinoŭskaha bura paškodziła staryja mohiłki. Pravasłaŭnaja parafija prosić dapamohi — abo hrašyma, abo chto moža pryjechać ź bienzapiłkaj
Mahutnaja navalnica, jakaja prajšła dniami nad Padlaššam, naniesła surjoznyja straty staradaŭnim mohiłkam u vioscy Mastaŭlany — na radzimie nacyjanalnaha hieroja Biełarusi Kastusia Kalinoŭskaha. Miascovaja pravasłaŭnaja parafija, jakaja apiakujecca śviatyniaj, nie daje rady samastojna spravicca z nastupstvami stychii i prosić nieabyjakavych ludziej ab dapamozie: jak finansavaj, tak i vałanciorskaj.
U pieršyja dni lipienia maštabny ŭrahan nakryŭ terytoryju hminy Haradok, jakaja lažyć na zachodnim bierazie raki Śvisłač, pa jakoj prachodzić biełaruska-polskaja miaža.
Jak paviedamiŭ biełarus Juraś Mielaškievič, jaki abviaściŭ zbor srodkaŭ na adnaŭleńnie, najbolšy ŭdar stychii pryniali na siabie Mastaŭlany. Škvalisty viecier z karaniami vyryvaŭ staryja lipy vakoł parafijalnaj carkvy Śviatoha apostała Iaana Bahasłova, u tym liku na mohiłkach.
Masiŭnyja drevy valilisia prosta na mahiły, paškodzili aharodžy, kryžy i nadmahilnyja plity. Miascovyja žychary kažuć, što ŭsio adbyłosia litaralna za niekalki siekundaŭ.
Prybirać hety chaos treba siły. Ale pravasłaŭnaja parafija ŭ Mastaŭlanach siońnia naličvaje ŭsiaho kala 35 čałaviek. Nastajaciel parafii, śviatar Słavamir Jakimiuk, z horyčču kanstatuje, što paśla troch pieraniesienych infarktaŭ jon prosta nie ŭ stanie vykonvać takuju ciažkuju fizičnuju pracu, a srodkaŭ na najom prafiesijnych bryhad u viaskovaj hramady niama.
Mastaŭlany — adno z najvažniejšych miescaŭ dla biełarusaŭ na Padlaššy. Mjenavita tut u 1838 hodzie naradziŭsia Kanstancin Kalinoŭski, budučy kiraŭnik vyzvalenčaha paŭstańnia i aŭtar «Mužyckaj praŭdy». Tut ža pabačyŭ śviet i jahony starejšy brat Viktar — vybitny historyk i archieohraf, čyj upłyŭ na śvietapohlad Kastusia ciažka pieraacanić.
Siońnia ŭ Mastaŭlanach nie zastałosia siadziby, dzie žyła siamja. Ale zastałasia parafijalnaja draŭlanaja carkva Śviatoha apostała Iaana Bahasłova, jakuju pačali ŭzvodzić u 1840 hodzie. Choć paźniej, u 1862 i 1905 hadach, chram byŭ hruntoŭna pierabudavany, atrymaŭšy zvanicu. A taksama draŭlanaja mohiłkavaja kaplica Śviatych Kaźmy i Dziamjana. Uźviedzienaja pry kancy XVIII stahodździa jašče jak unijackaja, jana kala 1840 hoda była pieraniesiena mienavita na tyja samyja mohiłki, jakija ciapier pakrušyła bura.
Jak dapamahčy
Kab dapamahčy parafii, biełaruski hramadski dziejač i rupliviec achovy spadčyny Juraś Mielaškievič zapuściŭ kraŭdfandynhavuju kampaniju.
Siońnia Mastaŭlany vostra majuć patrebu ŭ dźviuch rečach: prafiesijnych rukach i finansach. Ajciec Słavamir Jakimiuk źviartajecca da ŭsich nieabyjakavych z prośbaj ab vałanciorskaj dapamozie.
U pieršuju čarhu parafii nieabchodnyja ludzi, jakija ŭmiejuć pracavać ź bienzapiłami.
Taksama patrebnyja pracoŭnyja ruki dla pryborki halla i rasčystki terytoryi. Vałancioraŭ, hatovych pryjechać u Mastaŭlany, prosiać brać z saboj ułasnyja bienzapiły, siakiery, hrabli i rabočyja palčatki.
Kantaktny telefon pa ŭsich pytańniach (Polšča): 883 762 185. Pracy pačynajucca štodnia z 9:00 ranicy pa miery zboru hrup.
Dla tych, chto nie moža dałučycca fizična, adkryty zbor srodkaŭ na płatformie Zrzutka.pl. Meta kampanii davoli ścipłaja — 5000 złotych, jakija całkam pojduć na apłatu śpiecyjalizavanaj techniki, vyvaz avaryjnych dreŭ i adnaŭleńnie paškodžanych nadmahillaŭ.
Akramia taho, achviaravańni možna pieraličvać naŭprost na bankaŭski rachunak pravasłaŭnaj parafii ŭ Mastaŭlanach:
Parafia Prawosławna pw. św. ap. Jana Teologa
Bank Spółdzielczy w Białymstoku Oddział w Gródku
Nr. 60 8060 0004 0392 7690 2000 0010
Rabotnikam Centra alimpijskaj padrychtoŭki pa frystajle zabaranili iści na pachavańnie Mikałaja Kazieki15
Rabotnikam Centra alimpijskaj padrychtoŭki pa frystajle zabaranili iści na pachavańnie Mikałaja Kazieki
U Biełarusi zaćvierdzili praviły evakuacyi kaštoŭnaściaŭ na vypadak vajny: cehłu z Bresckaj krepaści z nadpisami buduć ratavać pierš za karciny Šahała i Sucina1515
Kamientary
Red. Tady heta była adna ziamla. Miaža tam upieršyniu prajšła ŭ 1944 hodzie.
[Zredahavana]