Dzicia ź Biełarusi ŭsynavili ŭ Polščy paśla śmierci maci. Ciapier sud pastanaviŭ viarnuć chłopčyka na radzimu

Varšaŭski sud pastanaviŭ pieradać siamihadovaha chłopčyka ź Biełarusi, jaki žyvie ŭ pryjomnaj siamji ŭ Polščy, bijałahičnamu baćku, jaki znachodzicca ŭ Miensku. Pra rezanansnuju spravu piša «Biełsat» sa spasyłkaj na Wyborcza.

Chłopčyk razam z maci i starejšym zvodnym bratam Jaŭhienam, jakomu ŭ toj čas było 14 hadoŭ, pryjechaŭ ź Biełarusi ŭ Polšču ŭ 2021 hodzie paśla pratestaŭ i paźniej atrymaŭ mižnarodnuju abaronu.

Polskija orhany apieki chutka daviedalisia pra ałkaholnuju i narkatyčnuju zaležnaści žančyny, a taksama pra toje, što jana zajmajecca prastytucyjaj, i zabrali dziaciej ź siamji.

Ich usynaviła inšaja biełaruska — piensijanierka Hanna Kanavałava, jakaja raniej pracavała pradavačkaj mebli, i zaraz žyvie ŭ varšaŭskim rajonie Makotuv. Jana dahladała dvuch unukaŭ 6 i 8 hadoŭ, pakul ichnaja maci Antanina Kanavałava, asudžanaja pavodle palityčnych matyvaŭ, adbyvała pakarańnie ŭ Biełarusi.

Na momant usynaŭleńnia ŭ 2023 hodzie małodšy Aleś, jakomu było čatyry hady, nie ŭmieŭ karystacca prybiralniaj, drenna havaryŭ i byŭ zaležny ad TikTok. U 2024 hodzie ichnaja bijałahičnaja maci pamierła ad pieradazavańnia.

U žniŭni 2023‑ha da siamji źviarnuŭsia bijałahičny baćka Alesia Siarhiej, u minułym asudžany na dzieviać hadoŭ kałonii za handal narkotykami.

Paśla taho, jak Hanna dapamahła Siarhieju zrabić vizu ŭ Polšču, jon pačaŭ naviedvać Alesia ŭ siarednim raz na miesiac. Jon pravodziŭ čas z synam i pryvoziŭ jamu padarunki, ale ŭ nastupnym hodzie straciŭ vizu, i jahonyja stasunki abmiežavalisia telefanavańniami, jakija, pavodle słovaŭ Hanny, taksama adbyvalisia nie čaściej za raz na miesiac.

A potym mužčyna nadumaŭ viarnuć dzicia ŭ Biełaruś i źviarnuŭsia ŭ sud u Varšavie. U sakaviku 2026‑ha sud pastanaviŭ pieradać dzicia baćku. Sudździ pastanavili, što intaresy niepaŭnaletniaha «pierš za ŭsio realizujucca praz vychavańnie ŭłasnym baćkam».

Pry hetym pravaabarončy fond Partyzanka adznačaje, što dzicia atrymała mižnarodnuju abaronu ŭ Polščy mienavita praz ryzyku viartańnia ŭ Biełaruś, tamu viartacca tudy jano nie moža. Jurysty kažuć, što, «kali [biełaruski] režym zachoča vykarystać dzicia ŭ prapahandysckich metach, jon zrobić heta, navat kali baćka budzie supraciŭlacca».

Dzicia moža pakinuć krainu ŭžo 27 červienia, choć pastanova suda pieršaj instancyi jašče nie nabyła mocy. Pryjomnaja siamja ŭžo padała apielacyju.

«Praź niapoŭnyja dva tydni Aleś moža apynucca ŭ Biełarusi. Ja bajusia, što my bolš nikoli jaho nie ŭbačym», — kaža Hanna Kanavałava.

• 3
• 0
• 0
• 10
• 10
• 0
• 5
• 0