Ministr transpartu Litvy: Cisku z boku ZŠA adnosna tranzitu biełaruskaha kaliju niama
Ministr transpartu Litvy Juras Taminskas zajaviŭ, što sam nie adčuvaje nijakaha cisku z boku ZŠA nakont adnaŭleńnia tranzitu biełaruskich kalijnych uhnajeńniaŭ praź litoŭskuju terytoryju. Pavodle jaho słoŭ, jon nie atrymlivaŭ ni aficyjnych listoŭ, ni zvankoŭ, ni inšych zvarotaŭ pa hetym pytańni, piša Delfi.lt.
Zajava litoŭskaha ministra prahučała na fonie paviedamleńniaŭ zamiežnych ŚMI pra toje, što amierykanskija čynoŭniki nibyta prapanoŭvali Litvie, Polščy i Ukrainie razhledzieć mahčymaść źniaćcia abmiežavańniaŭ na tranzit biełaruskich uhnajeńniaŭ.
Juras Taminskas adznačyŭ, što abmiarkoŭvać adnaŭleńnie tranzitu ciapier niama sensu, pakolki sankcyi Jeŭrapiejskaha Sajuza praciahvajuć dziejničać i zastajucca ŭ sile jak minimum da lutaha nastupnaha hoda. Na jaho dumku, razmovy na hetuju temu pakul nosiać vyklučna tearetyčny charaktar.
Raniej ministr zamiežnych spraŭ Litvy Kiastucis Budrys kazaŭ pra pavyšanuju cikavaść z boku ZŠA da pytańnia pastavak biełaruskich uhnajeńniaŭ. U svaju čarhu prezident Litvy Hitanas Naŭsieda zajaŭlaŭ, što litoŭski bok abmieńvajecca mierkavańniami z amierykanskimi partniorami adnosna adnosin ź Biełaruśsiu, ale nie adčuvaje cisku ŭ pytańni adnaŭleńnia tranzitu.
Cikavaść da temy tranzitu biełaruskaha kaliju ŭźnikła paśla taho, jak u sakaviku administracyja prezidenta ZŠA Donalda Trampa admianiła častku finansavych abmiežavańniaŭ u dačynieńni da kampanii «Biełaruśkalij». U vyniku niekatoryja amierykanskija kampanii pačali vyvučać mahčymaści zakupki i transpartavańnia biełaruskaj pradukcyi.
Ciapier čytajuć
Palitołah Alina Charysava pahadziłasia supracoŭničać z SBU. Akazałasia, heta było KDB20
Kamientary