U Homieli zładziužka, što krała elitny ałkahol, spaliłasia na biełym palito
Žycharka Homiela panadziłasia ŭ adnoj i toj ža kramie kraści elitny viski, kańjak i brendzi. Zastavacca biespakaranaj joj udavałasia try miesiacy, piša «Biełka» sa spasyłkaj na prakuraturu.
Z-za prychilnaści da ałkaholu i narkotykaŭ u hamialčanki zabrali dziaciej. Ź jaje zarobku na ich utrymańnie vyličvali značnuju sumu. Hrošy na asabistyja patreby žančyna vyrašyła zdabyvać złačynnym šlacham.
Jana pačała kraści ŭ kramie darahi ałkahol i pradavać jaho na rynku. Sama jana na toj momant užo prajšła lačeńnie ŭ narkadyspansiery i nie ŭžyvała śpirtnoha.
Kab nie pryciahvać uvahi, znachodlivaja hamialčanka prychodziła ŭ kramu ŭ roznym adzieńni. Jana vybirała momant, kali ŭ patrebnym adździele nikoha nie było, chavała butelki ŭ pakiet abo ŭ štany, paśla čaho spakojna vychodziła z handlovaj zały.
Žančyna naviedvała handlovuju centr pa piać—siem razoŭ na miesiac. Jana starałasia brać tavar da 400 rubloŭ, kab u vypadku zatrymańnia adkaraskacca drobnym kradziažom.
Niastača elitnaha śpirtnoha amal na 2 tysiačy rubloŭ vyjaviłasia padčas invientaryzacyi. Načalnik adździeła achovy abjektaŭ handlovaj sietki, prahladajučy zapisy z kamier videanazirańnia, źviarnuŭ uvahu na žančynu ŭ biełym palito.
Pryhledzieŭšysia, jon zrazumieŭ, što ŭžo raniej łaviŭ hetuju naviedvalnicu kramy na drobnych kradziažach.
«Raniej sudzimuju za padobnyja złačynstvy hamialčanku čakaje čarhovy sud. Pavodle častki pieršaj artykuła 205 Kryminalnaha kodeksa Biełarusi joj pahražaje pakarańnie da troch hadoŭ pazbaŭleńnia voli», — raskazała staršaja pamočnica prakurora horada Alena Amieljanovič.
Kamientary