Marfa Rabkova: Ja dakładna viedaju, u čyich siłach dapamahčy palitviaźniam viarnucca ŭ svaje siemji, damy, žyćci
Pravaabaronca, eks-palitviazień vystupiła sa zvarotam, jaho apublikavaŭ telehram-kanał «Ružovyja kasynki».
«Pryvitańnie, na suviazi Marfa Rabkova. Na kalendary — maj 2026 hoda. I ja dziakuju Bohu za toje, što, zapisvajučy hetaje videa, mahu ŭklučyć nastolnuju lampu, u svajo zadavalnieńnie pačytać knihu i lehčy spać u ciopły łožak, viedajučy, što zaŭtra mnie nie treba budzie pračynacca pad huk turemnaha zvanka», — kaža jana.
«Ja dziakuju Bohu za toje, što zaŭtra zmahu atrymać asałodu ad ciopłaha viasnovaha sonca, siedziačy na łaŭcy ŭ parku z kubkam duchmianaj harbaty ŭ rukach. Słuchać ščabiatańnie ptušak pobač. Hladzieć na biełyja abłoki, što pavolna płyvuć pa niebie.
I ja ščaślivaja hetym, zdavałasia b, banalnym drobiaziam, bo jašče zusim niadaŭna ŭsio heta było dla mianie niedastupnym. Jak i dahetul niedastupna prosta ciapier dla bolš jak sotni žančyn, jakija znachodziacca ŭ źniavoleńni ŭ Biełarusi.
I ja dakładna viedaju, u čyich siłach dapamahčy im viarnucca ŭ svaje siemji, u svaje damy, u svaje žyćci. Pramy dyjałoh pradstaŭnikoŭ ZŠA ź biełaruskaj dziaržavaj daŭ nam hety šaniec i ŭsio jašče dazvalaje trymać dźviery ŭ narmalnaść pryadčynienymi.
Za apošni hod dziakujučy amierykanskamu pieramoŭnamu treku svabodu atrymali sotni ludziej. Sotni siemjaŭ uzdychnuli z palohkaj. Sotni siemjaŭ atrymali mahčymaść praciahnuć siabie ŭ dzieciach. Sotni siemjaŭ mohuć znoŭ uzbahačać saboj hramadstva i śviet u cełym.
Ja spadziajusia, što humanitarny trek budzie praciahnuty i da jaho dałučycca ŭsio bolš ludziej dobraj voli, jakija taksama ŭbačać kaštoŭnaść u jak najchutčejšym vyzvaleńni ludziej i narmalizacyi situacyi ŭ Biełarusi. Bo niama ničoha važniejšaha za maleńkaje žyćcio maleńkaha čałavieka.
Na dvary maj 2026 hoda. Ja žyvaja i svabodnaja. Ja — maleńki čałaviek, čyjo maleńkaje žyćcio było vyratavana», — zaznačaje Marfa Rabkova.
***
Kaardynatarka vałanciorskaj słužby «Viasny» Marfa Rabkova praviała za kratami piać z pałovaj hadoŭ, jana vyjšła na volu 19 sakavika 2026 hoda. Jana była asudžanaja na 14 hadoŭ i 9 miesiacaŭ pavodle niekalkich artykułaŭ. Za čas utrymańnia pad vartaj jašče da suda ŭ Marfy pamierli babula i baćka, naziralisia prablemy sa zdaroŭjem. Śledčyja nieadnarazova prapanoŭvali joj supracoŭnictva: za pryznańnie viny joj abiacali źmianić mieru strymańnia i adpuścić da chvorych baćkoŭ. Ale Marfa zastavałasia pryncypovaj u svajoj pazicyi. Svaju vinu jana nie pryznała.
Ciapier čytajuć
Były palitviazień znajšoŭ u Vilni padpracoŭku ŭ čacie — i trapiŭ pad kryminałku za pravakacyi suprać Ukrainy28
Kamientary
Ludi ni za čto hodami hnijut v tiuŕmach, a vy, siektanty, sidia v svojom ujutnom hietto, buduči v połnoj biezopasnosti, važno vieŝajetie o "stratiehii".
Plevať vam na političieskich.