Viarchoŭny sud Rasii pryznaŭ mižnarodny hramadski ruch «Miemaryjał» «ekstremisckaj arhanizacyjaj» i zabaraniŭ jaho dziejnaść u krainie. Pasiadžeńnie prajšło ŭ zakrytym režymie, navat advakata arhanizacyi na jaho nie dapuścili.
Pavodle vyznačeńnia suda, dziejnaść «Miemaryjała» nibyta maje antyrasijski charaktar, nakiravanaja suprać dziaržaŭnaści i źviazanaja z raspaŭsiudžvańniem «destruktyŭnaj ideałohii». Taksama śćviardžajecca, što ŭdzielniki ruchu mohuć ździajśniać ekstremisckija dziejańni.
Pradstaŭniki «Miemaryjała» nazvali hetaje rašeńnie niezakonnym i palityčna matyvavanym. Jany padkreślili, što ciapier «Miemaryjał» — heta nie adna arhanizacyja, a sietka roznych niezaležnych abjadnańniaŭ.
Raniej, u 2021 hodzie, ułady ŭžo likvidavali pravaabarončy centr i mižnarodnaje tavarystva «Miemaryjał», abvinavaciŭšy ich u parušeńni zakonaŭ i skažeńni historyi. U 2026 hodzie mižnarodnuju asacyjacyju «Miemaryjał» taksama pryznali «niepažadanaj».
Status «ekstremisckaj arhanizacyi» aznačaje poŭnuju zabaronu dziejnaści, błakiroŭku materyjałaŭ i sajtaŭ, a taksama mahčymuju kryminalnuju adkaznaść dla ŭdzielnikaŭ.
Jeŭrapiejski sajuz raskrytykavaŭ heta rašeńnie, nazvaŭšy jaho udaram pa hramadzianskaj supolnaści. U Nobieleŭskim kamitecie taksama zajavili, što takoje rašeńnie supiarečyć bazavym kaštoŭnaściam — svabodzie słova i čałaviečaj hodnaści.
«Miemaryjał» byŭ stvorany ŭ kancy 1980‑ch hadoŭ, u tym liku pry ŭdziele Andreja Sacharava, i zajmaŭsia daśledavańniem palityčnych represij u SSSR, a taksama pravaabarončaj i aśvietnickaj dziejnaściu. U 2022 hodzie arhanizacyja atrymała Nobieleŭskuju premiju miru sumiesna ź biełaruskim pravaabaroncam, tady palitviaźniem Alesiem Bialackim i ŭkrainskaj pravaabarončaj arhanizacyjaj «Centr hramadzianskich svabod».
Ciapier čytajuć
Były palitviazień znajšoŭ u Vilni padpracoŭku ŭ čacie — i trapiŭ pad kryminałku za pravakacyi suprać Ukrainy13
Kamientary