Minpracy anansavała pašyreńnie ličbavych servisaŭ zamiest proćmy papier
Ministerstva pracy i sacyjalnaj abarony płanuje istotna pašyryć ličbavyja servisy, źviazanyja z roznymi žyćciovymi situacyjami hramadzian, kab zrabić pracedury praściejšymi, chutčejšymi i mienš zaležnymi ad papiarovaj dakumientacyi, paviedamiła namieśnica ministra Julija Bierdnikava.
Naprykład, płanujecca, što pry naradžeńni dziciaci čałaviek zmoža ŭ miežach adnaho ličbavaha pracesu adrazu zrabić niekalki važnych dziejańniaŭ: zarehistravać dzicia ŭ ZAHSie, aformić jaho pa miescy žycharstva dy inicyjavać pryznačeńnie roznych vypłat i dapamoh, źviazanych z naradžeńniem i vychavańniem dziciaci. Heta značna skarocić kolkaść pajezdak u roznyja ŭstanovy i aščadzić čas.
Anałahična płanujecca ličbavizavać pracedury, źviazanyja sa śmierciu čałavieka. Zaraz heta patrabuje zboru roznych papier i asabistych zvarotaŭ u dziaržaŭnyja orhany, ale ŭ budučyni heta budzie adbyvacca praz elektronnyja servisy: atrymańnie daviedki ab śmierci ŭ elektronnym vyhladzie, rehistracyja ŭ ZAHSie i aŭtamatyčny zapusk pracedury pryznačeńnia dapamohi na pachavańnie.
Asobna adznačajecca ŭkaranieńnie elektronnaha listka niepracazdolnaści. Heta značyć, što zamiest tradycyjnaha papiarovaha «balničnaha» rabotnikam nie treba budzie pieradavać papiarovyja dakumienty pracadaŭcu — usia infarmacyja budzie afarmlacca i pieradavacca ŭ elektronnym vyhladzie. Płanujecca taksama pravieści testavańnie sistemy dla vypłat pa ciažarnaści i rodach, a paśla paśpiachovaj pravierki raspaŭsiudzić jaje i na inšyja vidy časovaj niepracazdolnaści.
Akramia taho, užo ciapier u krainie raźvivajecca aŭtamatyčnaje pryznačeńnie niekatorych vypłat, naprykład piensii pa invalidnaści. U takim vypadku, kali infarmacyjnyja sistemy fiksujuć adpaviednuju žyćciovuju padzieju, vypłata pryznačajecca bieź nieabchodnaści dadatkovych zvarotaŭ z boku čałavieka.
Kamientary