Voś jak pracuje telehram-bot, z dapamohaj jakoha ŭzłamali žurnalista Kazakieviča
Heta staraja schiema, ale ludzi na jaje viaducca. Raskazvajem, jak jana pracuje i jak abaranicca.
Spačatku vam prychodzić paviedamleńnie nibyta ad słužby biaśpieki. Tam skazana, što akaŭnt pad pahrozaj praz padazronuju aktyŭnaść, i prapanujecca pierajści ŭ bot.
Adrazu možna zaŭvažyć, što «adździeł biaśpieki» čamuści zarehistravany niekalki miesiacaŭ tamu ŭ Mjanmie, a niekalki dzion tamu źmianiaŭ nazvu i fota. Adnak mnohija ludzi ŭ stresie nie zaŭvažajuć vidavočnyja čyrvonyja ściažki.
Kali vy pierajšli ŭ bot i startavali jaho, vam prapanujuć adkazać na pytańni — ci vam pahražali, što vydalać akaŭnt, ci rehistravalisia vy na sajtach kazino i sajtach z porna i ci prychodziŭ vam zapyt pra źmienu movy.
Dalej bot prapanuje skazać telefon, da jakoha pryviazany akaŭnt.
Dalej vam prychodzić paviedamleńnie ad telehrama pra sprobu ŭvachodu. U bocie heta nazvana kapčaj, jakuju prapanujuć uvieści. Kali vy ŭviali jaje, to źjaŭlajecca novaje paviedamleńnie, dzie vam treba ŭvieści parol dvuchfaktarnaj aŭtentyfikacyi telehrama.
Dalej bot uvachodzić u vaš akaŭnt i adrazu vydalaje paviedamleńnie pra ŭvachod — kab pakidać jak maha mienš śladoŭ. Vam prapanujecca pastavić ptušku «Tak, heta ja» ŭ telehramie, kab dać dazvoł na pračytańnie paviedamleńniaŭ i ŭnutranaja sistema abarony prahramy nie vykinuła bot machlaroŭ z akaŭnta.
Dalej bot pačynaje imitavać burlivuju dziejnaść — piša sam sabie ŭ dyjałoh z realnaj padtrymkaj telehrama roznuju navukapadobnuju łuchtu. Heta treba, kab zatrymacca ŭ akaŭncie i paśpieć spampavać usiu pierapisku.
U vyniku bot prosta ŭhavorvaje karystalnika ŭłasnaručna addać numar telefona i kody aŭtaryzacyi dla taho, kab spampavać usio, što jość u akaŭncie. Nijakich inšych dziejańniaŭ jon nie robić, usio, što bot piša — łuchta. To-bok tut niama nijakaj techničnaj uraźlivaści.
Chutčej za ŭsio, biełaruskija śpiecsłužby spampavali niejki hatovy bot z tych, jakija pradajucca dla skamieraŭ u internecie, kupili amierykanski virtualny siervier i takim čynam sprabujuć atrymać dostupy da akaŭntaŭ.
Mahčyma, jana sabrali bot sami ź niejkich kavałkaŭ — jon časta pracuje kryva, tam drenna apracoŭvajucca pamyłki ŭvodu i movy (naprykład, jon piša ŭsie frazy na anhlijskaj, kali ŭstalavany biełaruskamoŭny interfiejs, ale prapanuje knopki na ruskaj movie).
Takim čynam, anijakich novych uraźlivaściaŭ takaja ataka nie raskryvaje. Varta być pilnymi — nie davać svaich źviestak nikomu, chto nazyvajecca padtrymkaj telehrama ci inšaha miesiendžara abo sacsietki (jany im nie patrebnyja), pierapraviarać kantakty i być aściarožnymi ź pierachodami pa spasyłkach. Tut my ŭžo niekali davali padobnyja parady — na žal, prajšło try z pałovaj hady, a prostyja truki dahetul pracujuć.
«Naša Niva» — bastyjon biełaruščyny
PADTRYMAĆ
Kamientary