Kiroŭcam bolš nie budzie patrebna vazić z saboj paćviardžeńnie prachodžańnia techahladu
Z 10 lutaha 2026 hoda ŭ Biełarusi pačnuć dziejničać novyja praviły prachodžańnia techničnaha ahladu transpartnych srodkaŭ. Asnoŭnaje novaŭviadzieńnie — pieravod dazvołu na ŭdzieł aŭtamabila ŭ darožnym ruchu ŭ elektronny farmat. Papiarovy dakumient bolš nie budzie abaviazkovym padčas zvyčajnych pravierak na darozie.
Źmieny zamacavanyja ŭkazam № 5, jaki Alaksandr Łukašenka padpisaŭ 9 studzienia. Dakumient nakiravany na spraščeńnie administracyjnych pracedur i niepasredna zakranaje paradak paćviardžeńnia prachodžańnia techahladu dla ŭładalnikaŭ aŭtamabilaŭ.
Ciapier atrymlivać dazvoł vyklučna ŭ papiarovym vyhladzie na dyjahnastyčnych stancyjach nie patrabujecca. Jaho možna aformić u elektronnym vyhladzie praz partał «Je-Pasłuha».
Jak paviedamili ŭ «Biełtechahladzie», elektronny dazvoł maje takuju ž jurydyčnuju siłu, jak i papiarovy, i zachoŭvajecca ŭ dziaržaŭnych infarmacyjnych sistemach.
Tamu ciapier supracoŭniki DAI zmohuć praviarać źviestki pra techahlad i dziejańnie dopusku anłajn — praz słužbovyja bazy danych. Adsutnaść papiarovaha dakumienta pry sabie nie budzie padstavaj dla pretenzij.
Pry hetym papiarovyja dazvoły ŭ asobnych vypadkach usio jašče možna budzie atrymać, adnak kolkaść takich punktaŭ skarocicca. Infarmacyju pra miescy vydačy abiacajuć publikavać na sajcie «Biełtechahladu».
Taksama źmianiajecca paradak paćviardžeńnia apłaty techahladu. Ukaz admianiaje patrabavańnie padavać dakumient ab apłacie administracyjnaj pracedury, ale sama apłata zastajecca abaviazkovaj. Kali srodki nie pastupili, dazvoł na dopusk vydadzieny nie budzie. Pravierka apłaty budzie rabicca aŭtamatyčna.
U «Biełtechahladzie» padkreślivajuć, što pierachod na ličbavy farmat nie skasoŭvaje abaviazak prachodzić techahlad. Źmianiajecca tolki sposab paćviardžeńnia — zamiest papiarovaha dakumienta vykarystoŭvajecca elektronny zapis u bazie danych.
Ukaz ustupaje ŭ siłu praź miesiac paśla aficyjnaha apublikavańnia, tamu novyja praviły pačnuć dziejničać z 10 lutaha 2026 hoda.
Ciapier čytajuć
Jak u halečy śpivałasia radnia Łukašenki? Małaviadomyja fakty45
Kamientary