Daradca Cichanoŭskaj: Paśla źmieny ŭzroŭniu achovy ŭzmacniŭsia cisk na Ofis z boku režymu
Paśla taho jak achovu Śviatłany Cichanoŭskaj zamiest Słužby achovy kiraŭnictva Litvy ŭziała ŭ svaje ruki palicyja, cisk z boku minskaha režymu na demakratyčnuju biełaruskuju supolnaść istotna ŭzmacniŭsia. Pra heta zajaviŭ dypłamatyčny daradca Cichanoŭskaj Dzianis Kučynski, paviedamlaje Delfi.lt.
Pa słovach Kučynskaha, ad momantu abviaščeńnia pra źmieny ŭ sistemie achovy nazirajecca ŭzmacnieńnie pahroz: supracoŭniki KDB amal štodnia vychodziać na suviaź z pradstaŭnikami Ofisa, zapałochvajuć ich svajakoŭ u Biełarusi, ažyćciaŭlajuć kibierataki. Pahrozy atrymlivaje jak sama Śviatłana Cichanoŭskaja, tak i členy jaje kamandy.
Akramia taho, prapahanda Alaksandra Łukašenki vykarystoŭvaje hetuju situacyju dla dalejšaha cisku na ŭsio demakratyčnaje asiarodździe.
Kučynski padkreśliŭ, što Ofis nie sprabuje śpiekulavać nakont unutranych pryčyn rašeńnia litoŭskich uładaŭ. Jon adznačyŭ, što kamanda z pavahaj stavicca da luboha rašeńnia, bo znachodzicca ŭ Litvie ŭ jakaści haściej, i vykazaŭ udziačnaść za padtrymku, jakuju kraina akazvała ŭsie hetyja hady. Niezaležna ad abstavin, apazicyja, pavodle jaho słoŭ, praciahnie zmahańnie suprać režymu Łukašenki.
Raniej daradca premjer-ministarki Litvy Inhi Ruhinienie Ihnas Dabravolskas zajaŭlaŭ, što źmianieńnie farmatu achovy było pryniata z ulikam acenki ŭzroŭniu pahroz i što palicejskaj achovy ciapier dastatkova. Adnak Kučynski z hetym nie pahadziŭsia, padkreśliŭšy, što pahroza nie źmienšyłasia.
Jon źviarnuŭ uvahu, što biaśpieka — heta nie tolki fizičnaja achova, ale i ahulnaje adčuvańnie abaronienaści. Pavodle jaho słoŭ, navat kiraŭnik Departamienta dziaržaŭnaj biaśpieki publična paćvierdziŭ, što ŭzrovień pahrozy zastajecca vysokim, a ŭvieś siłavy aparat režymu Łukašenki pracuje suprać demakratyčnych sił.
Kučynski taksama nahadaŭ, što Łukašenka niadaŭna publična zaklikaŭ Litvu spynić padtrymku taho, što jon nazyvaje «alternatyŭnym uradam u Vilni», a taksama znoŭ zhadvaŭ Cichanoŭskuju, zajaŭlajučy, što nie pavinien dazvolić joj «znoŭ pieramahčy». U takich umovach, padkreśliŭ daradca, havaryć pra pačućcio biaśpieki nie vypadaje, tamu Ofis spadziajecca na padtrymku Litvy i inšych sajuźnikaŭ.
Na pytańnie pra mahčymy pierajezd Ofisa ź Litvy Kučynski nie adkazaŭ, ale adznačyŭ, što ciapier razhladajucca dadatkovyja miery biaśpieki. Pakul ža ofis u Vilni praciahvaje pracu ŭ zvyčajnym režymie, a hałoŭnym pryjarytetam zastajecca biaśpieka Śviatłany Cichanoŭskaj i ŭsioj jaje kamandy.
Łandśbierhis pra rašeńnie pieradać achovu Cichanoŭskaj palicyi: Heta vyhadna Łukašenku
Urad Litvy nie atrymlivaŭ paviedamleńnia pra namier Cichanoŭskaj pakinuć Vilniu
Cichanoŭskaja zastajecca dla prapahandy voraham numar adzin. Voś novyja mietadyčki, jany datyčać partretaŭ i achovy
Viačorka: Nijakaha rašeńnia pra pierajezd Cichanoŭskaj niama
Kamientary