Cichanoŭskaja zastajecca dla prapahandy voraham numar adzin. Voś novyja mietadyčki, jany datyčać partretaŭ i achovy
Navina ab mahčymym pierajeździe Ofisa Śviatłany Cichanoŭskaj ź Vilni ŭ Varšavu vyklikała ašalełuju aktyŭnaść botaŭ, jakija pasucca ŭ tyktoku, instahramie, fejsbuku i jutubie.
Navina pra pierajezd Śviatłany Cichanoŭskaj ź Vilni ŭ Varšavu spravakavała niebyvałuju aktyŭnaść botaŭ.
Pryčym da starych naratyvaŭ, skiravanych na jaje dyskredytacyju, dadalisia niekatoryja novyja.
Łukašenkaŭcaŭ adčuvalna razdražniaje aŭtarytet žančyny, što pakłała ich lidara na łapatki na prezidenckich vybarach 2020 hoda. Dapiakaje prapahandzie i toje, što Śviatłana Cichanoŭskaja praciahvaje damahacca vyzvaleńnia palityčnych źniavolenych u Biełarusi. Boty atakujuć manieru Cichanoŭskaj padarožničać pa śviecie i prychodzić u samyja vysokija kabiniety z partretami biełaruskich zakładnikaŭ na papcy.
«Čyj partret jana tam ciahaje ŭ rukach?», «Chto viedaje, čyj partret jana nosić?», «Ciahała fota Siarožy, a ciapier kaho?» — pišuć tysiačy botaŭ, robiačy vyhlad, što nie viedajuć.
Im tut ža adkazvajuć inšyja botaŭskija akaŭnty:
«Kaho haspadary dali, taho i nosić», «Čyj dali, toj i nosić! Što vy, na samaj spravie, prydzirajeciesia da lidarki?!»
«Fotaciahałka», «Biehaje z partretami, moža, jana fatohraf?», «Marazm… Našto jana nosić partret? Jana chvoraja z partretam, zusim durnaja».
Niekatoryja zachodziać dalej: «Užo fotku druhoha mužyka nosić. Psichbalnica i turma pa joj płačuć».
Taksama łukašystam i rasijanam dakładna chočacca, kab Śviatłana Cichanoŭskaja zastałasia biez achovy.
«Ad kaho jaje achoŭvajuć?» — zadaje ton dyskusii adzin z botaŭ. Da adkazu dałučajecca šerah inšych:
«Kamu jana patrebnaja, ad kaho achoŭvać? Tak usie stamilisia ad hetaj darmajedki!», «Ad niezadavolenych klijentaŭ», «Ad svaich paplečnikaŭ, u jakich hrošy skrysiła», «Chiba što ad Siarožy».
Tema finansavańnia tradycyjna zastajecca adnoj ź lubimych u prapahandystaŭ.
«Płacicie i ŭtrymlivajcie. Heta vielmi kaštoŭnyja hramadzianie! Asabliva dla Litvy i Polščy!» — piša adzin z karystalnikaŭ.
Łukašenkaŭskaja i rasijskaja prapahanda apieluje tut da zajzdraści jeŭrapiejskich padatkapłatnikaŭ — siarod jakich niamała biełarusaŭ.
Inšyja tyražujuć staryja schiemy pra dziaržpieravarot:
«Jaje sponsar — Jeŭrasajuz. Im tam karcić prybrać dziejnaha Prezidenta Biełarusi. Mienavita Jeŭrasajuz i Amieryka ŭ 2020 hodzie vydzielili «bčbšnikam» 3,8 miljarda dalaraŭ dla źviaržeńnia Prezidenta Biełarusi i ździajśnieńnia dziaržpieravarotu ŭ Krainie…»
Jašče adzin kirunak ataki — sproba abiascenić status palityka.
«Moža, chto viedaje, padkažycie: čym zajmajecca Cichanoŭskaja, to bok, na čym palahaje jaje rabota? Za što joj płaciać?»
«A chto joj davaŭ paŭnamoctvy havaryć ad nas, biełarusaŭ? I nam hłyboka plavać, što dumajuć pra nas jeŭrapiejcy, tamu što ŭsie jaje patuhi biessensoŭnyja. A voś toje, što jana vyprošvaje dla nas sankcyi, my joj jašče pryhadajem», «Lidar jakich sił?», «A chto jaje vybiraŭ u prezidenty?» — masava pišuć boty.
Nie spyniajucca i pahrozy źniavoleńniem.
«Na Vaładarku ci ŭ Žodzina», — prapanuje adzin z kamientataraŭ, jakomu tut ža nahadvajuć, što «Vaładarka» ŭžo zakrytaja. «Na Homiel», «Na Antoškina robu šyć», «U Salikamsk», «Davaj dachaty! Homielskaja IK-4 haścinna adkryje varoty», — prapanujuć inšyja.
Narešcie, prasoŭvajecca tezis pra toje, što pierajezd — heta nibyta vyhnańnie.
«Vyhnali praź niepatrebnaść», «Jana nie źjazdžaje, jaje vyhaniajuć. I z Polščy chutka papruć», «Nie vyjazdžaje, a vyhaniajuć», — davodziać boty, paraŭnoŭvajučy demakratyčnyja siły z «vandroŭnymi artystami» i nazyvajučy palityka «žabaj-padarožnicaj».
Śviatłana Cichanoŭskaja pryjšła ŭ palityku vypadkova. U 2020 hodzie jana zarehistravałasia kandydatkaj u prezidenty paśla taho, jak režym Alaksandr Łukašenki źniavoliŭ jaje muža-błohiera. Jaje kandydatura vyklikała masavy entuzijazm biełarusaŭ. Jana źbirała samyja šmatlikija sustrečy z vybarcami ŭ historyi krainy, a źviestki z tych učastkaŭ, dzie padlik hałasoŭ adbyvaŭsia prazrysta, pakazvaŭ, što jana pieramahaje Alaksandra Łukašenku ź vialikim adryvam.
Adnak łukašenkaŭcy nie pieradali joj ułady, a zmusili vyjechać za miažu. Heta vyklikała masavyja narodnyja pratesty, u jakich udzielničali sotni tysiač ludziej. U adkaz na heta ŭłady raspačali masavyja represii. Sotni tysiač biełarusaŭ byli vymušanyja pakinuć krainu, dziasiatki tysiač stali achviarami kryminalnaha i administracyjnaha pieraśledu.
Ciapier čytajuć
Chto taja biełaruska, jakuju ekstradavali ŭ ZŠA dla suda za kantrabandu detalaŭ dla samalotaŭ4
Chto taja biełaruska, jakuju ekstradavali ŭ ZŠA dla suda za kantrabandu detalaŭ dla samalotaŭ
«Kab Biełaruś nie addali Pucinu ŭ jakaści suciašalnaha pryza». Cichanoŭskaja zaklikaje ŭklučyć biełaruskaje pytańnie ŭ mirnyja pieramovy Ukrainy i Rasii3232
Kamientary
A chto ž nasamreč vorahi režymu? Tak, tyja, kaho jany i ŭzhadvać nie buduć pa imieni nikoli! Statkievič, Sieviaryniec, navat Babaryka z Kaleśnikavaj. Bo jany majuć moc, padmacavanuju dziejańniami. A hetaja ŭsia kamarylla tolki jazykami lapać za jeŭrapiejski košt zdolnaja. Nijakaj realnaj pahrozy jany nie ŭtvarajuć - tamu na ich uvahu i zasiarodžvajuć.
Heta ŭžo padobna pa inšuju prapahandu. Nikaho mienavita Pani Cichanoŭkaja pa łapatki nie pakłała ( adzinaje, što ad jaje było patrebna, heta arhanizavać novyja vybary), mienavita jana była simvałam pratestu, a na łapatki pakłaŭ Łuku hramadski siektar!
[Zredahavana]