Kanapackaja paraiła Łukašenku ŭzhadnić pierajemnika dy iści ŭ adstaŭku
Sparynh-partniorka na prezidenckich vybarach šakavanaja apieracyjaj ZŠA ŭ Vieniesuele.
«Prava mocnaha viartajecca, — napisała Hanna Kanapackaja ŭ siabie ŭ fejsbuku. — Choć jano nikudy i nie źnikała, tolki na peŭny čas prykryłasia ryźziom sistemy jurydyčnych normaŭ, stvoranych dziaržavami (dy inšymi mižnarodnymi subjektami)».
«Učora hety jurydyčny maskarad skončany, — piša Kanapackaja. — Amal tryccać piać hadoŭ (z momantu zrynańnia i vyvazu ŭ ZŠA Narjehi ŭ 1990 hodzie) takoha nie było — i voś znoŭ. Majo mierkavańnie: dy jano i da lepšaha! Lex fortissimum. I nie treba mieć nijakich iluzij», — piša Kanapackaja.
«U ciapierašniaj kanfihuracyi śvietu intares pieršasny, a prava — tolki adzin ź instrumientaŭ jaho absłuhoŭvańnia. I tyja, chto heta zrazumieŭ raniej, siońnia dziejničajuć kudy svabodniej. Z Maduram usio atrymałasia zakanamierna i čakana. Nie vyratavali ni šmatmiljardnyja kitajskija inviestycyi ŭ naftavy siektar, ni zakupka sučasnaha rasijskaha ŭzbrajeńnia, ni vysokaprafiesijnaja asabistaja achova, jakaja składałasia z kubinskich śpiecnazaŭcaŭ», — adznačaje Kanapackaja.
Jana nazyvaje Biełaruś «bałocistymi ŭskrainami».
«Z čaho naprošvajecca vidavočnaja dla našych bałocistych uskrain vysnova. Kali chtości ŭ razy macniejšy i bolš upłyvovy za ciabie kaža pramym tekstam, što pryznaje tvoj apošni vynik na vybarach jak zakonny i lehitymny, ale tolki dla taho, kab ty spakojna i bieź śpiechu padrychtavaŭsia da adychodu, adnaviŭ miechanizmy nie tolki kułuarnaj, ale i dziaržaŭna-publičnaj kamunikacyi praź viartańnie aficyjnych dypłamatyčnych słužbaŭ, a taksama ŭzhadniŭ ź imi piersanaliju tranziciora (-ki, -aŭ) — to rabi heta. Pakazvaj usich, chto jość u kiejsie: z vusami i biez vusoŭ; u spadnicach i ŭ štanach; z praktykaj dziaržkiravańnia i ŭ pryvatnym siektary. Moža i pryhledzicca chto. Voś tolki z tymi, chto «niuchaŭ porachu», aściarožniej — tam da takich nie vielmi. Nu i varušysia, a nie davodź da recydyvu», — zaklikaje Hanna Kanapackaja.
U 2020 hodzie Kanapackaja vykonvała rolu spojlerki Śviatłany Cichanoŭskaj. Miarkujučy z vynikaŭ hałasavańnia na ŭčastkach, dzie kamisii vyviesili pratakoły i dazvolili nazirać za padlikam hałasoŭ naziralnikam, Kanapackaja nabirała kala 0,3% hałasoŭ. CVK napisaŭ joj 1,7%. Vyvieli jaje na vybary i ŭ 2025 hodzie.
Kamientary