Канапацкая параіла Лукашэнку ўзгадніць пераемніка ды ісці ў адстаўку
Спарынг-партнёрка на прэзідэнцкіх выбарах шакаваная аперацыяй ЗША ў Венесуэле.
«Права моцнага вяртаецца, — напісала Ганна Канапацкая ў сябе ў фэйсбуку. — Хоць яно нікуды і не знікала, толькі на пэўны час прыкрылася рыззём сістэмы юрыдычных нормаў, створаных дзяржавамі (ды іншымі міжнароднымі суб'ектамі)».
«Учора гэты юрыдычны маскарад скончаны, — піша Канапацкая. — Амаль трыццаць пяць гадоў (з моманту зрынання і вывазу ў ЗША Нар'егі ў 1990 годзе) такога не было — і вось зноў. Маё меркаванне: ды яно і да лепшага! Lex fortissimum. І не трэба мець ніякіх ілюзій», — піша Канапацкая.
«У цяперашняй канфігурацыі свету інтарэс першасны, а права — толькі адзін з інструментаў яго абслугоўвання. І тыя, хто гэта зразумеў раней, сёння дзейнічаюць куды свабодней. З Мадурам усё атрымалася заканамерна і чакана. Не выратавалі ні шматмільярдныя кітайскія інвестыцыі ў нафтавы сектар, ні закупка сучаснага расійскага ўзбраення, ні высокапрафесійная асабістая ахова, якая складалася з кубінскіх спецназаўцаў», — адзначае Канапацкая.
Яна называе Беларусь «балоцістымі ўскраінамі».
«З чаго напрошваецца відавочная для нашых балоцістых ускраін выснова. Калі хтосьці ў разы мацнейшы і больш уплывовы за цябе кажа прамым тэкстам, што прызнае твой апошні вынік на выбарах як законны і легітымны, але толькі для таго, каб ты спакойна і без спеху падрыхтаваўся да адыходу, аднавіў механізмы не толькі кулуарнай, але і дзяржаўна-публічнай камунікацыі праз вяртанне афіцыйных дыпламатычных службаў, а таксама ўзгадніў з імі персаналію транзіцёра (-кі, -аў) — то рабі гэта. Паказвай усіх, хто ёсць у кейсе: з вусамі і без вусоў; у спадніцах і ў штанах; з практыкай дзяржкіравання і ў прыватным сектары. Можа і прыгледзіцца хто. Вось толькі з тымі, хто «нюхаў пораху», асцярожней — там да такіх не вельмі. Ну і варушыся, а не даводзь да рэцыдыву», — заклікае Ганна Канапацкая.
У 2020 годзе Канапацкая выконвала ролю спойлеркі Святланы Ціханоўскай. Мяркуючы з вынікаў галасавання на ўчастках, дзе камісіі вывесілі пратаколы і дазволілі назіраць за падлікам галасоў назіральнікам, Канапацкая набірала каля 0,3% галасоў. ЦВК напісаў ёй 1,7%. Вывелі яе на выбары і ў 2025 годзе.
Цяпер чытаюць
З праекта будаўніцтва мінскага метро выкінулі яшчэ дзве станцыі — «Кіеўскі сквер» і «Політэхнічную»5
Каментары