Kniha «Hrodna. Bijahrafija vulic» vyjšła ŭ hrodzienskaj drukarni Alaksandra Ryžaha. Heta vynik šmathadovaj pracy hrodzienskich historykaŭ roznych pakaleńniaŭ. U knizie aŭtary sprabujuć achapić historyju hrodzienskich vulic i architektury horada, pačynajučy z XII stahodździa. Pra vychad knihi paviedamiŭ u fejsbuku sam Alaksandr Ryžy, piša Hrodna Life.
Padobnych knih — haradskich encykłapiedyj, dzie raskazvajecca historyja kožnaha budynka ŭ histaryčnym centry — u biełaruskim krajaznaŭstvie bolš niama.
U knizie sabranyja źviestki pra kožny cikavy z architekturnaha punkta hledžańnia budynak. Infarmacyja pra vulicy Hrodna pryviedziena ŭ ałfavitnym paradku. U ramkach kožnaj vulicy apisanyja jak znakavyja abjekty — zamki, śviatyni, pałacy, kompleksy budynkaŭ, tak i ŭsia typavaja zabudova. Možna daviedacca, chto ŭ jakuju epochu vałodaŭ kankretnym budynkam, jakija ŭstanovy tam raźmiaščalisia, kali i kim budynki pierabudoŭvalisia.
Usiaho achoplena historyja kala 150 vulic Hrodna i bolš jak tysiačy budynkaŭ. Taksama ŭ knihu ŭvajšli danyja pra byłyja vioski, jakija ciapier stali častkaj horada. Na siońniašni dzień kniha «Hrodna. Bijahrafija vulic» heta najbolš padrabiazny katałoh histaryčnych źviestak pra architekturu Hrodna.
Kniha «Hrodna. Bijahrafija vulic» vyjšła praz 13 hadoŭ paśla inšaha padobnaha vydańnia — «Bijahrafija haradzienskich vulic. Ad Fartoŭ da Kałožy» ź sieryi «Haradzienskaja biblijateka». Z taho času krajaznaŭcy i historyki adkryli novyja fakty i bolš detalova daśledavali ŭžo viadomuju infarmacyju. U novaj knizie vypraŭlena šmat pamyłak i niedakładnaściaŭ, dapuščanych u papiarednim vydańni.
Praca nad amal 600‑staronkavaj knihaj zaniała kala piaci hadoŭ. Siarod aŭtaraŭ — historyki i krajaznaŭcy Aleś Hościeŭ, Ihar Trusaŭ, Viktar Sajapin, Miečysłaŭ Supron, Andrej Čarniakievič, Andrej Vaškievič, Ihar Łapiecha. Kniha bahata ilustravanaja starymi i sučasnymi fotazdymkami. Taksama vykarystoŭvajucca kampjutarnyja rekanstrukcyi stračanych budynkaŭ.
Pryvatnaja typahrafija «LitARy» Alaksandra Ryžaha (raniej — vydaviectva «JurSaPrint») vydała dziasiatki knih pra historyju Hrodna i rehijonu. Siarod ich: knihi historykaŭ i krajaznaŭcaŭ Andreja Pavača, Viktara Sajapina, Natalli Kaniuk i inšych, fotaalbomy Natalli Doraš, knihi pa historyi hrodzienskaha zaaparku i mnohija inšyja histaryčnyja vydańni.
Ciapier čytajuć
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary