Maroka paśla pratestaŭ «pakaleńnia Z» uvodzić kvoty dla žančyn i moładzi ŭ partyjach
Praz dva miesiacy paśla maštabnych demanstracyj, jakija ŭzrušyli karaleŭstva, parłamient pryniaŭ pakiet zakonaŭ, nakiravanych na palapšeńnie palityčnaha pradstaŭnictva. Novyja normy ŭvodziać kvoty dla žančyn i moładzi, a taksama finansavyja stymuły dla ich udziełu ŭ palitycy.
U Maroka ŭłady sprabujuć adkazać na pratesty «pakaleńnia Z» praź źmianieńnie praviłaŭ hulni ŭ palitycy. Paśla masavych akcyj, jakija z kanca vieraśnia da pačatku kastryčnika vyvieli na vulicy Rabata ruch «pakaleńnie Z 212» (ličby adsyłajuć da telefonnaha koda krainy +212), parłamient uchvaliŭ šerah zakonaprajektaŭ, što pavinny nibyta palepšyć pradstaŭnictva moładzi i žančyn u palityčnym žyćci. Pra heta piša Le Monde.
Pratestoŭcy — pieravažna maładyja ludzi — vychodzili da ścien parłamienta z patrabavańniami bolšaj sacyjalnaj spraviadlivaści i realnaj baraćby z karupcyjaj. Na piku chvali jany navat patrabavali adstaŭki ŭrada i premjer-ministra Aziza Achanuša.
Kab supakoić vulicu, ułady spačatku ŭ siaredzinie kastryčnika zaćvierdzili dadatkovyja biudžetnyja vydatki na adukacyju i achovu zdaroŭja. Adnak hałoŭnym adkazam na palityčnyja patrabavańni stali zakony, pryniatyja ŭ pačatku śniežnia.
Novyja praviły abaviazvajuć palityčnyja partyi vyłučać nie mienš za 30% miescaŭ u kirujučych orhanach dla žančyn i 10% — dla moładzi da 35 hadoŭ. Uviedziena sistema zaachvočvańnia: kožnaje miesca, vyjhranaje pradstaŭnikami hetych katehoryj, pavialičvaje dziaržaŭnaje finansavańnie partyi ŭ šeść razoŭ. U advarotnym vypadku partyi ryzykujuć stracić kampiensacyju vydatkaŭ na kampaniju.
Akramia taho, kab viarnuć davier hramadzian, dziaržava hatova pakryvać 75% vydatkaŭ niezaležnym kandydatam, pakolki rejtynh davieru da tradycyjnych partyj krytyčna nizki.
Sacyjołahi adznačajuć, što hetyja źmieny rychtavalisia daŭno, ale pratesty moładzi paskoryli praces pierad vybarami 2026 hoda. Adnak sami aktyvisty nastrojeny skieptyčna.
Apytanyja vydańniem maładyja ludzi nazvali hetyja miery «kaśmietyčnymi» i «simvaličnymi». Na ich dumku, kryzis davieru vyklikany nie ŭzrostam ci połam palitykaŭ, a zakrytaściu, nieprazrystaściu i karupcyjaj samoj sistemy. Jak adznačaje Le Monde, pierad krainaj staić zadača nie tolki źmianić praviły, ale i pierakanać cełaje pakaleńnie, što palityka moža mieć sens.
Ciapier čytajuć
«Kab Biełaruś nie addali Pucinu ŭ jakaści suciašalnaha pryza». Cichanoŭskaja zaklikaje ŭklučyć biełaruskaje pytańnie ŭ mirnyja pieramovy Ukrainy i Rasii3434
Kamientary
Amal jak u SSSR, tam było niešta padobnaje.