U zvyčajna spakojnym i stabilnym Maroka ŭžo tydzień praciahvajucca burnyja akcyi pratestu suprać karupcyi, jakija presa nazyvaje pratestam «pakaleńnia Z». U sieradu padčas sproby šturmu palicejskaha ŭčastka byli zastrelenyja try čałavieki, piša Bi-bi-si.
Śmierć troch demanstrantaŭ u čaćvier paćvierdziŭ premjer-ministr Maroka Aziz Achanuš. Jak paviedamlajuć suśvietnyja ahienctvy, demanstranty byli zastrelenyja padčas sproby zachapić palicejski ŭčastak u miastečku Łaklija kala kurortnaha Ahadzira na poŭdni krainy.
Sajt Morocco World News udakładniaje, što pratestoŭcy sprabavali šturmavać kazarmy žandarmieryi i zachapić zbroju.
MUS Maroka zajaviła, što tyja, chto napaŭ na žandarmieryju, byli ŭzbrojenyja chałodnaj zbrojaj, i što žandarmy adkryli ahoń u miežach zakonnaj samaabarony.
Udzielniki demanstracyj pratestujuć suprać karupcyi, sacyjalnaj niaroŭnaści i vialikich vydatkaŭ na dva futbolnyja turniry: Kubak Afrykanskich Nacyj, jaki adbudziecca ŭ Maroka ŭ kancy hetaha hoda, i čempijanat śvietu 2030 hoda, jaki Maroka praviadzie razam z susiednimi Partuhalijaj i Ispanijaj. Pratestoŭcy skandujuć: «Stadyjony jość, ale što z balnicami?»
Padstavaj dla pačatku pratestaŭ stała śmierć vaśmi paradzichaŭ u balnicy ŭ Ahadziry. Pratesty «pakaleńnia Z» — heta moładź va ŭzroście da prykładna 30 hadoŭ — adbyvajucca pa ŭsioj krainie i, jak i ŭ Niepale miesiac tamu, kaardynujucca praź internet-płatformu Discord.
U Maroka kaardynacyjaj zajmajecca hrupa ŭ Discord pad nazvaj «GenZ 212». Chto jaje stvaralniki — nieviadoma. Ministerstva ŭnutranych spraŭ karaleŭstva ŭ čaćvier zajaviła, što padčas biesparadkaŭ było paraniena amal 300 čałaviek, u asnoŭnym palicejskich (žandarmaŭ), i bolš za 400 udzielnikaŭ biesparadkaŭ aryštavanyja.
Pavodle padlikaŭ ministerstva, demanstranty razburyli 80 administracyjnych budynkaŭ, bankaŭ i kramaŭ, a taksama raźbili abo spalili amal 300 aŭtamabilaŭ, što naležali dziaržaŭnym ustanovam, i 175 pryvatnych mašyn.
Stvaralniki hrupy GenZ 212 zaklikajuć pratestavać mirna.
«My zapeŭnivajem hramadstva i ŭłady, što našy demanstracyi buduć całkam mirnymi, i my admaŭlajem vandalizm i hvałt u luboj formie», — zajavili jany ŭ čaćvier paśla taho, jak praviali hałasavańnie na temu, ci praciahvać pratesty. Bolšaść z prykładna 150 tysiač udzielnikaŭ hrupy prahałasavała za praciah.
U pieršyja dni pratesty i praŭda byli mirnymi, biesparadki pačalisia z aŭtorka, 1 kastryčnika. Premjer-ministr Aziz Achanuš u čaćvier skazaŭ, što ŭrad hatovy prysłuchacca da pratestoŭcaŭ.
«Urad adkryty dla kanstruktyŭnaha dyjałohu ŭ hramadskaj prastory ŭ miežach dziaržaŭnych instytutaŭ. Dyjałoh — adziny sposab vyrašyć prablemy i zabiaśpiečyć stabilnuju sacyjalnuju spraviadlivaść», — cytuje premjera Morocco World News.
Pratestoŭcy patrabujuć, miž inšym, adstaŭki Achanuša i ŭsiaho jaho ŭrada.
Karaleŭstva Maroka — niebahataja kraina: pavodle acenak MVF, VUP na dušu nasielnictva składaje 4,2 tys. dalaraŭ u hod. Heta mienš, čym u susiedziaŭ pa Paŭnočnaj Afrycy — Ałžyra i Tunisa — i ŭ razy mienš, čym u jeŭrapiejskich susiedziaŭ Maroka — Ispanii i Partuhalii.
Kamientary
A razbureńnie budynkaŭ dakładna dadaść hrošaŭ na budaŭnictva špitalaŭ.