«Adklučylisia mazhi, ja prosta biehła za aŭtamabilem». U Minsku taksi ledź nie źviezła niemaŭla
Hety vypadak adbyŭsia dniom 8 śniežnia ŭ Minsku. Žančyna raskazała, jak skarystałasia pasłuhami «Jandeks Taksi» i paśla zakančeńnia pajezdki vyjšła z aŭtamabila. Jana śćviardžaje, što mieła namier abyści mašynu i praź inšyja dźviery zabrać hrudnoje dzicia, jakoje znachodziłasia ŭ kałyscy, ale kiroŭca raptam pačaŭ ruch. Pa jaje słovach, taksi daviałosia dahaniać biahom, piša «Anłajnier».
«Jak tolki aŭtamabil prybyŭ na miesca pryznačeńnia, pačała vyzvalać aŭtakałysku ad ramianioŭ biaśpieki, papiaredziŭšy kiroŭcu, što mnie spatrebicca litaralna chvilinka, kab adšpilić ramiani i zabrać małoha. Zaviaršyŭšy praces, uziaŭšy asabistyja rečy, skazała kiroŭcu: «Tolki kałysku z advarotnaha boku zabiaru», — i vyjšła z aŭtamabila», — napisała žančyna ŭ Threads.
Žurnalist «Anłajniera» źviazaŭsia z aŭtarkaj publikacyi i vyśvietliŭ dadatkovyja padrabiaznaści.
«Kiroŭca ničoha nie skazaŭ naohuł! Nie paprasiŭ prabačeńnia, nie vyjšaŭ, nie patłumačyŭsia, — uspaminaje žančyna. — I, ščyra kažučy, u toj momant ja znachodziłasia ŭ stanie takoha šoku, što adzinaje, na što mianie chapiła, — heta skazać samoj: «U aŭtamabili ž mały, jak vy mahli!» — i zabrać dzicia».
Moža, kiroŭca nie ŭbačyŭ kałysku ź dziciom padčas pasadki?
«Viadoma, bačyŭ. Kałysku staviła z adnaho boku, sadziłasia z druhoha», — zapeŭnivaje surazmoŭca.
Jana ŭdakładniaje, što paśla zdareńnia napisała ŭ słužbu padtrymki i paviedamiła pra toje, što zdaryłasia.
«Ad słužby «Jandeksa» pastupiŭ tolki zvanok z prabačeńniami. Udakładniali, ci budziem my źviartacca ŭ pravaachoŭnyja orhany. My z mužam prakansultavalisia — akazvajecca, my navat nie možam u pryvatnym paradku padać skarhu na asobu, jakaja zajmajecca pieravozkaj. Heta značyć, nie było nibyta naŭmysnaha «kradziažu» dziciaci», — havoryć surazmoŭca.
Nu a svaju historyju jana vyrašyła zrabić zdabytkam hramadskaści dla taho, kab źviarnuć uvahu na prablemu, ź jakoj mohuć sutyknucca maładyja baćki pry pajezdkach u taksi.
«Jandeksu» u pryncypie nieabchodna bolš jakasna rabić padbor kiroŭcaŭ, a nie pracavać tolki na kolkaść. Tamu što paśla publikacyi ja pačuła ad znajomych jašče masu historyj, pra jakija ludzi prosta maŭčać. Bo peŭnyja patrabavańni pavinny być nie tolki da pasažyraŭ padčas pajezdki. Pytańnie, kab i kiroŭcy taksi adreahavali na situacyju. Byli bolš uvažlivyja», — kaža žančyna.
Kamientaryj pres-słužby «Jandeks Taksi»
«Nam škada, što ŭ pasažyrki adbyłasia takaja stresavaja situacyja padčas zamovy. Biaśpieka i kamfort karystalnikaŭ — naš hałoŭny pryjarytet. My ŭžo źviazalisia z pasažyrkaj, kab udakładnić usie detali, i praviali ŭnutranuju pravierku. Heta pieršaje takoje parušeńnie z boku kiroŭcy, my ŭžo nakiravali jaho na paŭtornaje navučańnie standartam servisu, jon zmoža viarnucca da vykanańnia zamoŭ tolki paśla paśpiachovaha prachodžańnia kursa. Taksama my prapanavali karystalnicy kampiensacyju pajezdki.
Kali pasažyr zabyŭsia reč u mašynie, treba nacisnuć na knopku «Zabylisia rečy» u dadatku, jana dziejničaje na praciahu 24 hadzin paśla pajezdki. Taksama karystalnik u luby čas moža źviarnucca ŭ słužbu padtrymki abo patelefanavać kiroŭcu praz dadatak na praciahu 48 hadzin paśla pajezdki.
Kali ŭ mašynie zastalisia dzicia abo hadavaniec, my rekamiendujem adrazu ž źviazacca z kiroŭcam abo źviarnucca ŭ ekstranny čat sa słužbaj padtrymki — śpiecyjalist apieratyŭna źviažacca i dapamoža vyrašyć situacyju. Ekstranny čat možna znajści ŭ raździele «Biaśpieka».
Źjaviłasia videa, ale jość niuans
Paśla z redakcyjaj źviazaŭsia karystalnik, jaki śćviardžaje, što pracuje ŭ taksi. Pavodle jaho słoŭ, jahony kaleha nibyta byŭ śviedkam situacyi i ŭ adnym z unutranych čataŭ raspaŭsiudziŭ rolik, na jakim vidać, jak dziaŭčyna pačynaje biehčy za aŭtamabilem taksi ŭ rajonie Falcon Club na praśpiekcie Pieramožcaŭ.
Udzielniki čata śćviardžajuć, što na videa mienavita taja situacyja, jakaja była apisana ŭ dopisie ŭ Threads. U pryvatnaści, u čat-bot «Anłajniera» napisali niekalki čałaviek, jakija dasłali heta videa. Jany ź niaŭchvalnymi acenkami suadnosiać tuju adlehłaść, jakuju prabiehła dziaŭčyna na videa, ź likam 50 mietraŭ, pra jakija kaža hierainia publikacyi ŭ sacsietcy.
Žurnalisty znoŭ źviazalisia z surazmoŭcaj, i jana zajaviła, što jaje vypadak adbyŭsia ŭ inšym miescy, a na videa — nie jana.
«Voś što dumajuć kalehi pra hetu situacyju. Tut ja ź imi salidarny», — dasłaŭ jašče adno paviedamleńnie karystalnik Arciom, jaki śćviardžaje, što pracuje ŭ taksi, padmacavaŭšy jaho skrynšotam z čata.
Ciapier čytajuć
U Minsku adbylisia masavyja zatrymańni vydaŭcoŭ i kniharaspaŭsiudnikaŭ33
Kamientary