Mahutny ryk ilva — adzin z samych viadomych hukaŭ u pryrodzie, simvał siły i ŭłady. Novaje daśledavańnie navukoŭcaŭ pakazała, što karol źviaroŭ maje ŭ svaim arsienale nie adzin, a dva roznyja typy ryku. Heta adkryćcio nie tolki źmianiaje našy ŭjaŭleńni pra kamunikacyju hetych drapiežnikaŭ, ale stvaraje novyja mahčymaści dla achovy hetych vieličnych žyviolin.
Brytanskija navukoŭcy z Univiersiteta Eksetera zrabili niečakanaje adkryćcio: znakamity ryk ilvoŭ byvaje dvuch vidaŭ. Akramia zvykłaha mahutnaha ryku, jaki my ŭsie viedajem, isnuje i tak zvany pramiežkavy ryk.
Jak paviedamlaje The Telegraph, dla taho, kab vyjavić hetyja adroźnieńni, daśledčyki źviarnulisia da sučasnych technałohij.
Jany vykarystali štučny intelekt dla analizu tysiač hukavych fajłaŭ. Maštabny zbor danych achapiŭ dva rehijony Afryki: u Nacyjanalnym parku Ńjerere (Tanzanija) schavanyja mikrafony za dva miesiacy zafiksavali 1414 ilvinych «vakalizacyj», a ŭ zapaviedniku ŭ dalinie Bubje (Zimbabve) bolš za 1700 zapisaŭ było atrymana z GPS-ašyjnikaŭ na piaci samcach.
Kampjutarny analiz pakazaŭ, što pamiž zvykłym burčańniem i mahutnym poŭnahałosym rykam chavajecca jašče adzin huk, jaki dastatkova adroźnivajecca, kab ličyć jaho asobnym typam. Mašynnaje navučańnie zdoleła pravilna raspaznać hetyja dva vidy ryku z dakładnaściu 95%.
Pa słovach aŭtara daśledavańnia, aśpiranta Ekseterskaha ŭniviersiteta Džonatana Hroŭkata (Jonathan Growcott), ryk — heta vielmi važnaja častka pavodzin ilvoŭ. Jon nie tolki słužyć sihnałam dla inšych členaŭ siamiejnaj zhrai hetych žyvioł (prajdu) pra svajo miescaznachodžańnie, ale i dapamahaje paznačać terytaryjalnyja miežy dla čužyncaŭ, a taksama moža pieradavać infarmacyju, jakaja tyčycca pamieru prajdu, uzrostu ci navat indyvidualnych asablivaściej kankretnaha lva.
- Unlike house cats, Lions roar instead of meowing. Male lions can roar about a year after birth whereas female lions can roar after a few months.
A tiny lion cub can be seen attempting to roar here (warning: adorable): pic.twitter.com/XrGjtrFrA4
Samcy lvoŭ mohuć rykać prykładna praz hod paśla naradžeńnia, a samki lvoŭ — praź niekalki miesiacaŭ. Na hetym videa možna ŭbačyć, jak ilviania robić pieršyja sproby prademanstravać svoj hučny ryk.
Navukoviec pryznaje, što pakul nie da kanca zrazumieła, čym mienavita pierachodny ryk adroźnivajecca pa sensie ad poŭnahałosaha. Ale viadoma, što kožny leŭ maje ŭnikalny ryk, pa jakim jaho možna paznać.
Mienavita tamu daśledčyki spadziajucca, što ŭ budučyni zapis i analiz ryku stanie dakładnym instrumientam padliku lvoŭ u dzikaj pryrodzie i acenki ščylnaści papulacyi.
Siońnia ŭ Afrycy zastałosia kala 25 tysiač dzikich lvoŭ — prykładna ŭdvaja mienš, čym na pačatku XXI stahodździa. Tamu patrebnyja novyja, bolš abjektyŭnyja mietady manitorynhu papulacyj.
Jak tłumačyć Hroŭkat, raniej vyznačeńnie typu ryku było subjektyŭnym, bo zaležała tolki ad mierkavańnia čałavieka-ekśpierta, jaki moh pamylicca. Novy padychod z vykarystańniem štučnaha intelektu abiacaje bolš dakładny i abjektyŭny manitorynh. A heta krytyčna važna dla achovy vidu.
Navukoŭcy ličać, što nadyšoŭ čas dla źmieny paradyhmy ŭ nazirańni za dzikaj pryrodaj i bolš šyrokaha vykarystańnia pasiŭnych akustyčnych mietadaŭ. Raźvićcio bijaakustyki stanie klučavym dla efiektyŭnaha zachavańnia nie tolki lvoŭ, ale i inšych vidaŭ, jakija znachodziacca pad pahrozaj.
Vyniki daśledavańnia apublikavanyja ŭ navukovym časopisie Ecology and Evolution.
Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju22
Kamientary