U prapahandystki «Sputnika» abakrali kavavy punkt, a milicyja ničoha nie zrabiła
Z kaviarni samaabsłuhoŭvańnia rabotnicy prarasijskaha «Sputnik Biełaruś» (raniej jana była hałoŭredam barysaŭskaj rajonki) u vieraśni vynieśli ŭsie raschodnyja materyjały — kubački dla kavy, cukar — i navat sprabavali źlić siropy z dazataraŭ.
Pra kradziež vychodziŭ siužet na dziaržaŭnym kanale ANT, ale ŭ milicyi admovilisia karać čałavieka, jaki dobra zaśviaciŭsia na kamiery, i zavodzić spravu. Prablem z takim rašeńniem nie pabačyli i ŭ prakuratury. Ale prapahandystka, miarkujučy z reakcyi ŭ sacyjalnych sietkach, nie čakała takoha ad pravaachoŭnaj sistemy, piša «Biełsat».
Incydent adbyŭsia ŭ kavapunkcie Kaciaryny Kunicy ŭ Minsku. Kunica (da zamužža Varabjova) — byłaja hałoŭnaja redaktarka barysaŭskaj rajonki «Adzinstva». Jaje zvolnili ŭletku 2022 hoda, kali taja paskardziłasia praŭładnamu błohieru na prablemy ŭ horadzie, čynoŭnikaŭ i na «instrukcyi» dla dziaržaŭnych ŚMI z boku ŭłady. Ciapier jana pracuje na «Sputnik Biełaruś» — biełaruskim adździaleńni rasijskaha praŭładnaha ahienctva navinaŭ.
U sakaviku Kunica ŭ adnym z ofisnych budynkaŭ u rajonie mietro «Puškinskaja» adkryła pavodle franšyzy kaviarniu samaabsłuhoŭvańnia — kavakropku. Tam, u adroźnieńnie ad vendynhavych aŭtamataŭ, na miescy šmat raschodnikaŭ: papiarovyja kubački i nakryŭki, łyžački dla raźmiešvańnia, trubački, cukar, karyca i inšaje.
7 vieraśnia prapahandystka nazirała praz ubudavanuju kamieru videanazirańnia, jak nieviadomy mužčyna ŭsio heta zhrabaje ŭ pakiet, trasie sam kavavy aŭtamat, spadziejučysia dastać ziernie. Darečy, papiarovyja padstaŭki dla kubačkaŭ naviednik nie acaniŭ: niadbajna kinuŭ nazad, ahledzieŭ jašče raz palicy i syšoŭ.
«Vynies praktyčna ŭsio, što možna było b vynieści», — aburana pisała ŭ sacsietkach Kunica.
Pra hety vypadak vyjšaŭ siužet na dziaržaŭnym telekanale ANT.
— Kali ja pabačyła videa na kamiery, ja ačmureła ad nachabstva čałavieka. I spačatku prosta nazirała, što jon robić, razumieła, što jon niešta biare. Ale ŭ mianie była nadzieja, što ŭsio ž taki niešta mnie zastaniecca, — raspaviadała Kaciaryna Kunica, u patryjatyčnaj majcy ź vialikim nadpisam «Belarus» na hrudziach.
U siužecie pakazali kamientar namieśnika načalnika Upraŭleńnia kryminalnaha vyšuku HUUS Minharvykankama Andreja Arłoŭskaha.
«U vyšuku padazravanych u takich epizodach značnuju dapamohu akazvaje šyrokaja sietka kamieraŭ nazirańnia, jakaja padklučanaja da respublikanskaj sistemy manitorynhu hramadskaj biaśpieki (RSMHB). U minskaj milicyi jość mahčymaść znajści čałavieka, navat kali jon prymaje miery kanśpiracyi», — zapeŭnivaje vysokapastaŭleny čynoŭnik i kaža, što za heta pahražaje administratyŭny i navat kryminalny artykuł, «u zaležnaści ad abstavinaŭ i ahulnaha pamieru škody».
Milicyja: usio, akramia kavy, — «biaspłatnaja majomaść»
Kradziež za krychu bolš jak paŭhoda pracy kaviarni Kunicy — užo druhi. Pieršy zdaryŭsia adrazu ž paśla adkryćcia: 8 sakavika chtości vynies vazu z kvietkami. Praŭda, tady, jak raskazvała ŭładalnica biznesu prapahandystam z ANT, taja samaja minskaja milicyja, adhledzieŭšy zapisy z kamieraŭ, dasłała adkaz, «što asoba nie vyznačanaja». Kaciaryna z vysnovaj pahadziłasia: na kamiery złamyśnika sapraŭdy było drenna vidać.
Hetym razam tvar mužčyny, jaki vyrašyŭ biescyrymonna zabrać čužuju majomaść, vidać dobra. I kali Kaciaryna napisała zajavu ŭ milicyju, jaho apaznali i znajšli. Ale karać admovilisia, tak što i hetym razam atrymać dapamohu pravaachoŭnikaŭ prapahandystcy nie ŭdałosia.
Taja zastałasia ździŭlenaja, niezadavolenaja i aburałasia, što rabotniki RUUS navat nie parupilisia prapisać u dakumiencie tradycyjnuju «šapku» sa źviestkami.
Frahmienty adkazu ad milicyi Kunica vykłała ŭ storyz. Jaje apaviaścili, što praviali raźbiralnictva i 17 vieraśnia spynili administratyŭnuju spravu «praz adsutnaść u dziejańni składu pravaparušeńnia». Dalej u tekście havorycca, što Kaciarynu paŭtorna apytali, i jana patłumačyła, što tyja samyja kubački, trubački i siropy «faktyčna jość biaspłatnaj majomaściu», a padobny biznes zasnavany na daviery da hramadzian.
«Razam z tym apłata pravodzicca vyklučna za kavavy napoj, adnak zajaŭnica ličyć, što nieviadomy parušyŭ normy marali z pryčyny taho, što ŭziaŭ vialikuju kolkaść vyšejzhadanaj majomaści, bo miarkujecca, što na adzin kavavy napoj prykładajecca adno najmieńnie vyšejpaznačanaha tavaru», — napisali milicyjanty i ŭdakładnili, što padčas pravierki zajaŭnica nie padała rachunku-daviedki i aktu invientaryzacyi.
«Voś nie viedała ja, što dabračynnaściu zajmajusia ŭ hetym vypadku», — prakamientavała situacyju ŭładalnica kavakropki.
U kastryčniku supracoŭnica «Sputnik Biełaruś» pajšła šukać spraviadlivaści dalej i paskardziłasia na spynieńnie spravy ŭ Minskuju prakuraturu. Ale i tam atrymała adpisku, što skončyŭsia termin, na praciahu jakoha rašeńnie možna abskardzić (na heta dajecca 15 dzion).
«Ja napisała, što z pastanovaj aznajomiłasia paźniej (nie z majoj viny)… Na žal, hetaha faktu nie ŭličyli», — padzialiłasia jana podpisam da skrynšotaŭ u hetaj historyi, dzie jana zastałasia biez majomaści i biez dapamohi biełaruskaj milicyi.
Situacyja ŭ kaviarni moža padpadać pad art. 11.1 KaAP RB — drobny kradziež majomaści jurydyčnaj asoby ŭ sumie da dziesiacirazovaha pamieru bazavaj vieličyni (ciapier — da 420 rubloŭ). Za heta mohuć karać štrafam ad 2 da 30 bazavych, hramadskimi pracami abo administratyŭnym aryštam. Ale ŭ biełaruskaj milicyi fokus z pošuku realnych pravaparušalnikaŭ apošnija hady źmiaściŭsia na inšyja zadačy.
Ciapier čytajuć
Čerhaŭ na miažy ciapier nie budzie? Čaho čakać ad adkryćcia «Bruzhoŭ» i «Bierastavicy»9
Kamientary