Anžalika Borys dała intervju prapahandystam — pra toje, što ŭ Biełarusi ŭsio dobra

Vydańnie pradstaviła Anžaliku Borys jak byłuju staršyniu Sajuza palakaŭ Biełarusi, «a ciapier dyrektar škoły polskaj movy «Pałonika plus». Poŭny tekst abiacajuć u drukavanaj viersii, na sajcie źjaviłasia tolki niekalki ŭryŭkaŭ razmovy. 

Tak Anžaliku paprasili abvierhnuć «biespadstaŭnyja śćviardžeńni złych jazykoŭ ab tym, što ŭ Biełarusi jość niejki pryhniot etničnych palakaŭ». 

— Ja da takich nie prysłuchoŭvajusia! — adkazała Anžalika. — Usie kaścioły adčynienyja, budujucca novyja. Słužby tam iduć i na polskaj movie. Dzieci taksama vyvučajuć polskuju movu, nichto nie zabaraniaje nam pravodzić nacyjanalnyja abrady, šmatlikija mierapryjemstvy. My takija ž hramadzianie, jak astatnija. Dalej. U Biełaruś achvotna jeduć turysty z Polščy, u tym liku pa biaźvizie. Jany tut adpačyvajuć, atrymlivajuć niejkija miedycynskija pasłuhi, padarožničajuć pa pryhožaj, dahledžanaj krainie.

Havoračy pra dziejnaść škoły «Pałonika plus», jakoj jana kiruje, Anžalika Borys padziakavała ŭładam:

— Asobnym radkom chaču padziakavać kiraŭnictvu Biełarusi, jakoje daje mahčymaść etničnym palakam, jak i pradstaŭnikam usich inšych nacyjanalnaściej i narodnaściej (a ich bolš za 100!), zachoŭvać svaju identyčnaść. Zaraz u nas bolš za 400 dziaciej, jakija vyvučajuć polskuju movu. A pa ŭsioj krainie ich zvyš 3000. Skažu taksama, što ŭsie płany i prahramu navučańnia my ŭzhadniajem z adździełam adukacyi Hrodzienskaha harvykankama. Heta narmalnaja praktyka. Kažu vam u tym liku jak piedahoh pa adukacyi.

Taksama joj skazali prakamientavać temu zakryćcia dziaržaŭnaj miažy ź Biełaruśsiu zachodnimi susiedziami.

Jana skazała, što ad zakryćcia miežaŭ ciarpiać najpierš prostyja ludzi. «Ab miežach vykažusia tak: jany pavinny abjadnoŭvać, a nie raźjadnoŭvać ludziej. I ad prostych hramadzian ja ni razu nie čuła, kab niechta radavaŭsia ich zakryćciu. Pa žyvym irvucca i kulturnyja suviazi, jakija naładžvalisia hetulki hadoŭ… Moža być, paŭtarusia: bolš za ŭsio pakutujuć nie ŭłady, a prostyja ludzi. Voś uziać maju mamu. Joj 79 hod. Usio žyćcio jana jeździła ŭ Polšču, jak dadomu. A zaraz u siłu łahistyki (vialiki kruk praz Brest) heta nie atrymlivajecca», — skazała jana. 

Byłaja staršynia Sajuza palakaŭ u Biełarusi Anžalika Borys, jakaja niadaŭna sama vyjšła na volu, 23 vieraśnia naviedała ŭ kałonii palitźniavolenaha žurnalista i aktyvista Andreja Pačobuta.

Borys paviedamiła, što ad svajho imia i ad imia Sajuza palakaŭ napisała na imia Alaksandra Łukašenki prašeńnie ab jaho pamiłavańni. 

Na pytańnie, ci jość šanc na vyzvaleńnie Pačobuta z mahčymaściu zastacca ŭ Hrodnie, Borys adkazała: «Pahladzim», padkreśliŭšy, što nie viedaje, jakim budzie rašeńnie pa jaje prašeńni.

• 4
• 3
• 0
• 20
• 2
• 7
• 7
• 3