Viadomaja fitnes-błohierka zrabiła viasielle ŭ biełaruskich pahanskich tradycyjach FOTY
Viasielle adbyłosia na pryrodzie, muzyki hrali staražytnuju biełaruskuju muzyku, a hałavu niaviesty ŭpryhožvaŭ vianok.
Nadzieja Damkoŭskaja pačynała ŭ Biełarusi jak śpiavačka — niekalki hadoŭ jana vystupała ŭ składzie hurta Cherry Lady (pradziusiravaŭ jaho Pavieł Kłyšeŭski, udzielnik hurta «Ciahni-Šturchaj»). Potym jana stvaryła svajo kancertnaje ahienctva.
Apošnija hady Nadzieja viadomaja jak fitnes-błohierka. Sioleta jana razam z doktaram Andrejem Biełavieškinym viadzie pieradaču «Biez receptu» na «Biełsacie». Taksama Nadzieja stvaralnica startapa ŭ śfiery mientalnaha zdaroŭja.
Jaje abrańnikam staŭ Andrej Huńko — jon naradziŭsia ŭ Baranavičach, advučyŭsia ŭ BNTU pa śpiecyjalnaści inžynier-prahramist, ale ŭ 2010 hodzie emihravaŭ u ZŠA. Jon uładalnik firmy ŭ ZŠA, jakaja zajmajecca voknami i dźviaryma.
Jak i Nadzieja, Andrej lubić sport — jon udzielničaje ŭ spabornictvach pa hreplinhu (vid adzinaborstvaŭ). Vystupaje mužčyna ź bieł-čyrvona-biełym ściaham na kimano.
Viasielle adbyłosia jašče ŭ kancy vieraśnia, ale pryhožym videa para padzialiłasia niadaŭna. Jany vyrašyli zrabić śviata zhodna ź biełaruskimi pahanskimi tradycyjami.
Adbyłasia cyrymonija ŭ Polščy, pobač z pałacam Razalin (u histaryčna-parkavym kompleksie XIX stahodździa, što za 35 kiłamietraŭ ad Varšavy).
Biełaruskaje tradycyjnaje viasielle maje vyraznyja abradavyja etapy, jakija simvalizujuć pierachod maładych da novaha siamiejnaha žyćcia.
Spačatku žanich raźvitvajecca z rodam i domam, adkul pachodzić. Hety momant paznačaje jaho hatoŭnaść pierajści da novaha stanu — statusu haspadara. Ličycca, čym hučniej idzie žanich, tym bolš ščaślivym budzie šlub. Tamu pracesiju supravadžali muzyki.
Paśla byŭ abrad paśviačeńnia žanicha ŭ haspadary. Hości-mužčyny nasypali jamu ziernie i zyčyli dabrabytu. Niaviesta vychodziła adna, ale išła nie da kachanaha — pierad sustrečaj z budučym mužam dziaŭčynu błasłaŭlali žančyny.
Žanich pavinien simvalična pasiejać ziernie pierad tym, jak da jaho zaprosiać niaviestu. Paśla maci kładzie na hałavu niaviesty vianok, baćki błasłaŭlajuć viasielnuju stužku i pieraviazvajuć joj ruki maładych. A potym ščaślivuju paru mohuć vinšavać hości.
28‑hadovaj biełaruscy paśla žudasnaj avaryi ŭ Tajłandzie nie mohuć akazać dapamohu — niama patrebnaj kryvi1
Kamientary