U Litvie zatrymali troch čałaviek, jakija padazrajuć u spryjańni kantrabandzie ź Biełarusi
U Salečnickim rajonie zatrymali jašče troch čałaviek, jakich padazrajuć va ŭdziele ŭ kantrabandzie cyharet ź Biełarusi pavietranymi šarami, paviedamlaje Słužba achovy dziaržaŭnaj miažy Litvy.
13 listapada supracoŭniki kryminalnaj raźviedki i śledčaha adździeła pamiežnaj słužby zatrymali troch žycharoŭ Salečnickaha rajona. Ich padazrajuć u tym, što jany ŭdzielničali ŭ tym liku ŭ schiemach pavietranaj kantrabandy. Pry zatrymańni dapamahali kinołah i słužbovy sabaka. U damach padazravanych praviali pieratrusy, paśla čaho ich źmiaścili ŭ izalatar. Prakuror chadajničaje ab aryšcie hetych ludziej na miesiac.
Ličycca, što jany supracoŭničali z dvuma inšymi kantrabandystami, zatrymanymi 4 listapada. Tady ŭ Aranskim rajonie pamiežniki spynili dva aŭtamabili: u adnym pieravozili 12 skrynak (6000 pačkaŭ) cyharet, u druhim jechali «supravadžalniki». Kiroŭcam, jakija vieźli hruz, udałosia źbiehčy, ale ich pamahatych schapili i aryštavali.
Pošuki ŭciekačoŭ i jašče adnaho saŭdzielnika zaviaršylisia apošnimi zatrymańniami ŭ Salečnickim rajonie.
Za niezakonny abarot akcyznych tavaraŭ i kantrabandu padazravanym pahražaje štraf abo da šaści hadoŭ turmy.
Sioleta litoŭskija pamiežniki ŭžo zatrymali 107 čałaviek, źviazanych z kantrabandaj cyharet pavietram, — u paraŭnańni z 46 letaś. Dronami i pavietranymi šarami ŭ krainu sprabavali pierasłać bolš za 1,3 miljona pačkaŭ cyharet. Usiaho za hod kanfiskavali ŭžo kala 4 miljonaŭ pačkaŭ nielehalnych tytuniovych vyrabaŭ.
Na fonie adkryćcia Polščaj miažy Minsk prapanuje adkłaści techničnyja pieramovy ź Litvoj
Premjer Litvy: My pavinny być hatovyja da novych pahroz ź Biełarusi
Ministr zamiežnych spraŭ Litvy spadziajecca, što ES na nastupnym tydni ŭchvalić novyja sankcyi dla Minska
Uładzisłaŭ Kandratovič: «Łukašenka ź litoŭskimi furami abyšoŭsia jak rekiecir»
Kamientary