113‑hadovy kańjak, mieniu na francuzskaj i paŭtary tysiačy stałovych pryboraŭ. Jakim byŭ karaleŭski bankiet u honar Donalda Trampa
Dziaržaŭny bankiet — heta dypłamatyja za raskošnym stałom. Efiektnaja kulminacyja dziaržaŭnaha vizitu, što źziaje zołatam i kryštalom, śviata z pramovami, karaleŭskimi tostami, fanfarami i vytančanymi stravami.
Brytanskaja karaleŭskaja siamja vielmi pastarałasia, kab bankiet zrabiŭ na Donalda Trampa niezabyŭnaje ŭražańnie, piša VVS.
Bankiet zładzili ŭ Zale śviatoha Hieorhija ŭ Vindzarskim zamku. Vidovišča ŭ interjery, jaki nahadvaje adnačasova i pra siaredniaviečnyja bankiety, i pra filmy pra Hary Potera.
Piersanał u vytančanaj uniformie, vymuštravany, jak tyja sałdaty na paradzie dniom pierad bankietam. Vyvieranaje da milimietra, pa liniejcy, raźmiaščeńnie stałovych pryboraŭ. Usiaho 1452 prybory na 160 haściej. Plus piać kielichaŭ i fužeraŭ na kožnaha.
Haściej na bankiecie ŭ honar vizitu Trampa častavali stravami ź mieniu na francuzskaj:
- Pana-kota z chempšyrskaj kres-sałaty z parmiezanavym piasočnym piečyvam i sałatam ź pierapiołčynych jajek.
- Norfałkskaje kurania bałacin u cukini z vostrym sousam, nastojenym na čabory.
- Vanilnaje maroziva z načyńniem z kienckaha malinavaha sarbietu i źlohku błanšyravanymi ślivami hatunku Viktoryja.
Haściam prapanavali cudoŭny vybar vinaŭ:
- Wiston Estate, Cuvée 2016 hoda.
- Domaine Bonneau de Martray, Corton-Charlemagne, Grand Cru 2018 hoda.
- Ridge Vineyards, Monte Bello, 2000 hoda.
- Pol Roger, Extra Cuvée de Réserve, 1998 hoda.
Śpis dyžestyvaŭ, napojaŭ paśla viačery, byŭ prasiaknuty simvalizmam. U im byŭ partviejn 1945 hoda, u honar Trampa jak 45‑ha prezidenta ZŠA. Choć sam Tramp nie pje.
Byŭ i kańjak 1912 hoda — hoda, kali ŭ vioscy na šatłandskim vostravie Luis naradziłasia Mery En Makłaŭd, budučaja maci Donalda Trampa.
I zvyš hetaha naboru simvałaŭ byŭ jašče i kaktejl «Transatłantyčny» na asnovie viski Johnnie Walker, da jakoha padavali piečyva z kremam z arechaŭ piekan i brytanskim ziefiram maršmełou.
Zorki biźniesu zamiest zorak muzyki i kino
Na bankiecie ŭ Vindzary pakazalna adsutničali tradycyjnyja znakamitaści sa staronak śvieckaj chroniki i kinaekranaŭ. Nie było navat pastajannych haściej karaleŭskich mierapryjemstvaŭ, sera Devida Bekchema i sera Ełtana Džona.
Zamiest hetaha Zału Śviatoha Hieorhija razam z palitykami zapoŭnili zorki biźniesu.
Kiraŭnik Apple Cim Kuk siadzieŭ pobač z dačkoj prezidenta Cifani Tramp. Hazietny mahnat Rupiert Miordak — pobač z kiraŭnikom aparata premjer-ministra Kira Starmiera Morhanam Maksuini. Tramp niadaŭna padaŭ na kancern Miordaka isk na miljard dołaraŭ. Cikava, pra što jany razmaŭlali z Maksuini?
Kožnamu hościu było adviedziena kankretnaje miesca, ź imiannoj tabličkaj pobač ź im.
Darahoha hościa Donalda Trampa pasadzili pasiaredzinie, pamiž karalom Karłam i pryncesaj Uelskaj Ketryn.
Na tabličcy kala miesca Trampa było napisana «prezident Złučanych Štataŭ Amieryki», pry hetym zahałoŭnymi litarami, jak Tramp časta piša svaje pasty ŭ sacsietcy.
Nasuprać karala i Trampa siadzieli karaleva Kamiła, pieršaja łedzi Miełanija Tramp i prync Uelski Uiljam.
Pasła ZŠA Uorena Styviensa pasadzili pamiž siastroj karala, pryncesaj Hannaj i kancleram Rejčeł Ryŭz.
Premjer-ministr Kir Starmier apynuŭsia pobač sa Styvienam Švarcmanam, kiraŭnikom inviestycyjnaj kampanii Blackstone, jakaja jakraz z nahody vizitu Trampa abviaściła pra płany inviestavać u Brytaniju 90 młrd funtaŭ.
Lidar kansiervataraŭ Kiemi Bejdenak siadzieła pobač z kiraŭnikom OpenAI Semam Altmanam.
Amierykanskija karparacyi vysokich technałohij, akramia Altmana i inšych bačnych fihur, pradstaŭlaŭ na bankiecie kiraŭnik vytvorcy čypaŭ Nvidia Džensen Chuanh.
Byli na bankiecie i dziaržsakratar ZŠA Marka Rubia, i śpiecpasłańnik Trampa Styŭ Uitkof, i novaja kiraŭnica Foryn-ofisa Iviet Kupier, i vice-premjer Vialikabrytanii Devid Łemi.
Ciapier čytajuć
«U vyniku jon skazaŭ mnie: «Chopić mianie šantažavać, ja chaču palubavacca hetymi drevami». Aksana Kołb raskazała, pra što razmaŭlała sa Statkievičam na miažy88
Kamientary