113‑гадовы каньяк, меню на французскай і паўтары тысячы сталовых прыбораў. Якім быў каралеўскі банкет у гонар Дональда Трампа
Дзяржаўны банкет — гэта дыпламатыя за раскошным сталом. Эфектная кульмінацыя дзяржаўнага візіту, што ззяе золатам і крышталём, свята з прамовамі, каралеўскімі тостамі, фанфарамі і вытанчанымі стравамі.
Брытанская каралеўская сям’я вельмі пастаралася, каб банкет зрабіў на Дональда Трампа незабыўнае ўражанне, піша ВВС.
Банкет зладзілі ў Зале святога Георгія ў Віндзарскім замку. Відовішча ў інтэр’еры, які нагадвае адначасова і пра сярэднявечныя банкеты, і пра фільмы пра Гары Потэра.
Персанал у вытанчанай уніформе, вымуштраваны, як тыя салдаты на парадзе днём перад банкетам. Выверанае да міліметра, па лінейцы, размяшчэнне сталовых прыбораў. Усяго 1452 прыборы на 160 гасцей. Плюс пяць келіхаў і фужэраў на кожнага.
Гасцей на банкеце ў гонар візіту Трампа частавалі стравамі з меню на французскай:
- Пана-кота з хэмпшырскай крэс-салаты з пармезанавым пясочным печывам і салатам з перапёлчыных яек.
- Норфалкскае кураня балацін у цукіні з вострым соусам, настоеным на чаборы.
- Ванільнае марозіва з начыннем з кенцкага малінавага сарбету і злёгку бланшыраванымі слівамі гатунку Вікторыя.
Гасцям прапанавалі цудоўны выбар вінаў:
- Wiston Estate, Cuvée 2016 года.
- Domaine Bonneau de Martray, Corton-Charlemagne, Grand Cru 2018 года.
- Ridge Vineyards, Monte Bello, 2000 года.
- Pol Roger, Extra Cuvée de Réserve, 1998 года.
Спіс дыжэстываў, напояў пасля вячэры, быў прасякнуты сімвалізмам. У ім быў партвейн 1945 года, у гонар Трампа як 45‑га прэзідэнта ЗША. Хоць сам Трамп не п'е.
Быў і каньяк 1912 года — года, калі ў вёсцы на шатландскім востраве Люіс нарадзілася Мэры Эн Маклаўд, будучая маці Дональда Трампа.
І звыш гэтага набору сімвалаў быў яшчэ і кактэйль «Трансатлантычны» на аснове віскі Johnnie Walker, да якога падавалі печыва з крэмам з арэхаў пекан і брытанскім зефірам маршмэлоу.
Зоркі бізнесу замест зорак музыкі і кіно
На банкеце ў Віндзары паказальна адсутнічалі традыцыйныя знакамітасці са старонак свецкай хронікі і кінаэкранаў. Не было нават пастаянных гасцей каралеўскіх мерапрыемстваў, сэра Дэвіда Бэкхэма і сэра Элтана Джона.
Замест гэтага Залу Святога Георгія разам з палітыкамі запоўнілі зоркі бізнесу.
Кіраўнік Apple Цім Кук сядзеў побач з дачкой прэзідэнта Ціфані Трамп. Газетны магнат Руперт Мёрдак — побач з кіраўніком апарата прэм'ер-міністра Кіра Стармера Морганам Максуіні. Трамп нядаўна падаў на канцэрн Мёрдака іск на мільярд долараў. Цікава, пра што яны размаўлялі з Максуіні?
Кожнаму госцю было адведзена канкрэтнае месца, з імянной таблічкай побач з ім.
Дарагога госця Дональда Трампа пасадзілі пасярэдзіне, паміж каралём Карлам і прынцэсай Уэльскай Кэтрын.
На таблічцы каля месца Трампа было напісана «прэзідэнт Злучаных Штатаў Амерыкі», пры гэтым загалоўнымі літарамі, як Трамп часта піша свае пасты ў сацсетцы.
Насупраць караля і Трампа сядзелі каралева Каміла, першая лэдзі Меланія Трамп і прынц Уэльскі Уільям.
Пасла ЗША Уорэна Стывенса пасадзілі паміж сястрой караля, прынцэсай Ганнай і канцлерам Рэйчэл Рыўз.
Прэм'ер-міністр Кір Стармер апынуўся побач са Стывенам Шварцманам, кіраўніком інвестыцыйнай кампаніі Blackstone, якая якраз з нагоды візіту Трампа абвясціла пра планы інвеставаць у Брытанію 90 млрд фунтаў.
Лідар кансерватараў Кемі Бэйдэнак сядзела побач з кіраўніком OpenAI Сэмам Альтманам.
Амерыканскія карпарацыі высокіх тэхналогій, акрамя Альтмана і іншых бачных фігур, прадстаўляў на банкеце кіраўнік вытворцы чыпаў Nvidia Джэнсэн Хуанг.
Былі на банкеце і дзяржсакратар ЗША Марка Рубіа, і спецпасланнік Трампа Стыў Уіткоф, і новая кіраўніца Форын-офіса Івет Купер, і віцэ-прэм'ер Вялікабрытаніі Дэвід Лэмі.
Цяпер чытаюць
«У выніку ён сказаў мне: «Хопіць мяне шантажаваць, я хачу палюбавацца гэтымі дрэвамі». Аксана Колб расказала, пра што размаўляла са Статкевічам на мяжы88
Каментары