Rasijski ratavalnik raskazaŭ, što stała pryčynaj hibieli biełaruskaha turysta na Elbrusie
U pačatku vieraśnia na Elbrusie trahična zahinuŭ biełaruski turyst Ivan Sukač. U efiry ANT śpiecyjalist Elbruskaha vysokahornaha pošukava-vyratavalnaha atrada MNS Rasii Bieka Cyndelijani raskazaŭ, što stała hetamu pryčynaj.
26-hadovy mužčyna vypraviŭsia ŭ hory samastojna, biez rehistracyi svajho maršrutu ŭ MNS. Paśla vychadu na suviaź 3 vieraśnia mužčyna źnik i jaho niekalki dzion šukali ratavalniki.
Bieka Cyndelijani paviedamiŭ, što, na jaho dumku, pryčynaj hibieli stała niedastatkovaja padrychtavanaść turysta: u jaho nie było adpaviednaha abutku i vopratki dla takich umoŭ.
Ratavalnik adznačyŭ, što na viaršyniach jość schiły z vysokaj travoj i vielmi krutym uchiłam, dzie biez pravilnaj amunicyi lohka stracić raŭnavahu.
Jon miarkuje, što ŭ tumanie biełarus źbiŭsia z maršrutu, straciŭ aryjentacyju i sarvaŭsia z vyšyni. Pa traŭmach na ciele było vidać, što padzieńnie adbyłosia ź vialikaj vyšyni.
Padčas pošukaŭ vyratavalniki pracavali ŭ rajonie Cierskolskaha vadaspadu, dzie, pavodle najaŭnaj infarmacyi, moh znachodziŭsia turyst. Da apieracyi byli pryciahnutyja śpiecyjalisty z Elbruskaha pošukava-vyratavalnaha atrada, centr «Lidar» i viertalot MNS.
U efiry ANT pakazali apošniaje videa, jakoje turyst paśpieŭ adpravić pierad trahiedyjaj. Na im jon havoryć:
«Siońnia sprabujem z vyšyni 1900 padniacca na vyšyniu 3600 u ručnym režymie. Usio, ściažynka niešta zusim pamienšyłasia. Ja ŭžo joj krychu nie daviaraju».
7 vieraśnia, praź niekalki dzion paśla źniknieńnia, cieła 26-hadovaha biełarusa znajšli. Pavodle papiarednich źviestak, jon płanavaŭ uźniacca na haru Cierskałak (vyšynia 3800 mietraŭ), jakaja znachodzicca ŭ paŭdniova-ŭschodnim adrozie Elbrusa.
Kamientary