U Polščy znoŭ padymali avijacyju dla baraćby z dronami i zakryvali Lublinski aeraport
13 vieraśnia Polšča časova zakryvała pavietranuju prastoru nad aeraportam Lublina praz pahrozu ŭdaru bieśpiłotnych latalnych aparataŭ. Pavodle paviedamleńnia vydańnia Onet.pl, hetaje rašeńnie było źviazana z atakami dronaŭ u rehijonach Ukrainy, jakija miažujuć z Polščaj.
Pierad tym u Vałynskaj vobłaści Ukrainy była abjaŭlena pavietranaja tryvoha z-za atak dronaŭ. Polskaje apieratyŭnaje kamandavańnie vojskaŭ paviedamiła, što pryniatyja ŭsie nieabchodnyja miery.
Zhodna z paviedamleńniem, u pavietranaj prastory dziejničali polskija i sajuźnickija samaloty, a naziemnyja sistemy supraćpavietranaj abarony i radyjołakacyjnaj raźviedki byli pryviedzieny ŭ maksimalnuju bajavuju hatoŭnaść. Mety dziejańniaŭ — prafiłaktyka i abarona pavietranaj prastory i hramadzian, asabliva ŭ rajonach, blizkich da zon pahrozy.
Pres-sakratar apieratyŭnaha kamandavańnia padpałkoŭnik Jacak Haryšeŭski padkreśliŭ, što ŭ toj momant nie było faktu parušeńnia pavietranaj prastory, a dziejańni byli vyklučna prafiłaktyčnymi.
Paźniej Uradavy centr biaśpieki dasłaŭ nasielnictvu Lublinskaha vajavodstva papiaredžańni pra pahrozu pavietranaj ataki i zaklikaŭ vykonvać instrukcyi adpviednych słužbaŭ. U haradach Chołm i Śvidnik byli ŭklučanyja sihnały pavietranaj tryvohi.
Da 19:35 pa minskim časie naziemnyja sistemy supraćpavietranaj abarony i radyjołakacyjnaj raźviedki viarnulisia da zvyčajnaha režymu pracy, a pavietranaja prastora nad aeraportam Lublina była znoŭ adkrytaja.
«Paloty polskaj i sajuźnickaj avijacyi ŭ našaj pavietranaj prastory zavieršanyja», — adznačyli ŭ Apieracyjnym kamandavańni.
«Stan pahrozy admienieny. Dziakuju ŭsim, chto byŭ zadziejničany ŭ apieracyi ŭ pavietry i na ziamli. Zastajemsia pilnymi», — napisaŭ u sacsietcy X premjer-ministr Polščy Donald Tusk.
Kamientary
Hienieralnyj siekrietaŕ NATO s 1 oktiabria 2024 hoda - Mark Riuttie (byvšij prieḿjer-ministr Nidierłandov).