Kremnijevaja dalina znachodzić Boha: jak technahihanty źviartajucca da relihii i pravych pohladaŭ

Kremnijevaja dalina, jakaja zaŭsiody asacyjavałasia z kontrkulturaj, levymi pohladami i fiestyvalami kštałtu Burning Man, pačała masava źviartacca da chryścijanstva. Na novy niečakany trend źviartajuć uvahu žurnalisty The Telegraph.

U červieni hetaha hoda žurnalisty pabyvali ŭ Kremnijevaj dalinie na sustrečy z byłym kiraŭnikom Intel Petam Hiełsinhieram. Sotni ludziej pryjšli nie tolki dziela abmierkavańnia technałohij. Hałoŭnaj temaj viečara staŭ «śviaty zruch» (holy shift) u śviecie technałohij.

Mierapryjemstva było arhanizavała Supolnaściu «Dziei 17» (Acts 17 Collective) ci «Pryznajučy Chrysta ŭ technałohijach i hramadstvie». Na svaim sajcie jany pišuć: «My — supolnaść myślaroŭ, stvaralnikaŭ, mastakoŭ i lidaraŭ. My tut, kab razam daśledavać hłybokija pytańni. I tak, my havorym pra Isusa».

Ad psichadelikaŭ da malitvy

Pa słovach aŭtaraŭ, raniej duchoŭnaść u Dalinie vyhladała inakš: zasnavalniki kampanij šukali praśviatleńnia na fiestyvalach u pustyni, užyvali psichadeliki abo praktykavali miedytacyju ŭ karparatyŭnaj kultury. Tradycyjnaja relihija zastavałasia ŭbaku. Ale ciapier usio bolš pradprymalnikaŭ i inviestaraŭ adkryta havorać pra svaju vieru.

Supracoŭnik Google Met Rajdenaŭr adznačaje: «Boh dziejničaje ŭ San-Francyska». Pa jaho słovach, doŭhi čas adkryta havaryć pra svaju vieru, asabliva ŭ technałahičnych kołach, nie było pryniata. Ciapier, zdajecca, heta stanovicca ŭsio bolš zvykłym.

Takija supołki, jak «Dziei 17», uznačalvajuć hety ruch. Na ich mierapryjemstvach technałahičnyja lidary abmiarkoŭvajuć svaju vieru, a paśla niefarmalna kamunikujuć pad muzyku — «remiksy na relihijnyja himny».

Hałoŭnyja tvary ruchu

Siarod prychilnikaŭ ruchu — Hery Tan, upłyvovy kiraŭnik Y Combinator, samaha viadomaha ŭ śviecie startap-aksieleratara. Jon ładzić sustrečy ŭ svaim domie ŭ San-Francyska koštam 4 miljony dalaraŭ, jaki, pa słovach žurnalistaŭ, bolš nahadvaje kaplicu, čym asabniak techna-bahacieja.

«LSD i hryby nie zapoŭniać pusteču ŭ tvaim sercy, pryznačanuju dla Boha, — napisaŭ Tan u sacsietkach. — Adhadajcie, što moža?»

Ale, mabyć, samym viadomym chryścijaninam Daliny źjaŭlajecca miljarder Piter Cil, zasnavalnik Palantir i adzin z hałoŭnych donaraŭ Respublikanskaj partyi i Donalda Trampa.

Pavialičyć

Cil — pierakanany katalik, jaki nieŭzabavie płanuje pračytać dla «Dziej 17» cykł lekcyj pra «Antychrysta». Jon ličyć, što kaniec śvietu budzie abvieščany niejkaj hłabalnaj, ultralevaj tatalitarnaj dziaržavaj, i navat paraŭnoŭvaŭ Hretu Tunbierh ź fihuraj Antychrysta.

Zruch naprava

Aŭtary artykuła adznačajuć, što hety relihijny reniesans supadaje z prykmietnym palityčnym zrucham naprava ŭ technałahičnym śviecie. Mnohija z «techna-chryścijan» źjaŭlajucca prychilnikami Trampa abo, prynamsi, skieptyčna staviacca da libieralnych kaštoŭnaściaŭ, jakija daminujuć u San-Francyska.

Navat Hery Tan, jaki raniej padtrymlivaŭ demakrataŭ, ciapier krytykuje «ekstremisckich levych sacyjalistaŭ».

Adzin z suzasnavalnikaŭ «Dziejaŭ 17» Trej Styviens taksama maje niepasrednuju suviaź z palitykaj. Jon źjaŭlajecca partnioram vienčurnaha fondu Founders Fund, stvoranaha Piteram Cilem, i suzasnavalnikam abaronnaj kampanii Anduril. U 2016 hodzie Styviens uvachodziŭ u pierachodnuju kamandu Ministerstva abarony ZŠA pry pieršaj administracyi Donalda Trampa.

Inšyja viadomyja asoby taksama dałučajucca da trendu. Nikol Šanachan, byłaja žonka suzasnavalnika Google Siarhieja Bryna, niadaŭna viarnułasia ŭ chryścijanstva i zajaviła, što fiestyval Burning Man — heta «instrumient Satany». Iłan Mask, jaki aktyŭna padtrymlivaje Trampa, nazvaŭ siabie «kulturnym chryścijaninam».

Čamu heta adbyvajecca?

Spasyłajučysia na ekśpiertaŭ, žurnalisty vyłučajuć niekalki mahčymych pryčyn. Pa-pieršaje, heta moža być «naturalnaja karekcyja» paśla doŭhaha daminavańnia «woke-ideałohii», dzie lubaja viera, akramia chryścijanstva, ličyłasia narmalnaj.

Pa-druhoje, imklivaje raźvićcio štučnaha intelektu prymusiła technołahaŭ zadumacca nad viečnymi pytańniami: «Što značyć być čałaviekam?». Pakul technahihanty abiacajuć stvaryć zvyšrozum z amal boskimi zdolnaściami, niekatoryja ŭžo pačali nadavać čat-botam rysy Boha, a inšyja — šukać adkazy ŭ tradycyjnaj viery.

Pavialičyć

Pastar Džej Kim z carkvy Westgate, jakaja raźmieščana ŭ Kremnijevaj dalinie, kaža, što chaos časoŭ COVID i rost technałohij ŠI prymusili mnohich miascovych žycharoŭ sutyknucca z ekzistencyjalnymi pytańniami.

Pavodle jaho słoŭ, za apošnija hady jon bačyć vyrazny rost cikavaści da chryścijanstva: kali raniej na Alpha course ( prahramu, jakaja znajomić z asnovami viery) u siarednim prychodziła kala 12 čałaviek, to ciapier hrupy źbirajuć ad 35 da 50 udzielnikaŭ, pryčym mnohija ź ich nie mieli raniejšaha relihijnaha dośviedu.

Takim čynam, paśla mnohich hadoŭ pahardy da viery samyja ŭpłyvovyja i bahatyja ludzi Daliny pačali adkryta zajmacca duchoŭnym pošukam.

• 4
• 2
• 2
• 7
• 0
• 0
• 0
• 0