«Taksist mieŭ racyju». Maładyja pradprymalniki raskazali, što tarmozić ich nievialikija biznesy

Siarhiej (heta i nastupnyja imiony źmienienyja) zajmajecca roźničnym handlem u adnym z abłasnych centraŭ. Pavodle jaho słoŭ, pracavać jamu pieraškadžaje «vielizarnaja kuča ŭkazaŭ, zakonaŭ, pastanoŭ, abmiežavańniaŭ, niuansaŭ», jakija rehulujuć viadzieńnie biźniesu. Jak ich pravilna tłumačyć i vykarystoŭvać — «nichto i nidzie nie padkaža», zatoje zaŭsiody znojdziecca toj, chto aštrafuje za parušeńni.

Maksim, kaleha Siarhieja pa roźničnym handli, nazyvaje samymi vialikimi prablemami nizkuju pakupnickuju zdolnaść nasielnictva i «znakamity ŭkaz ab cenaŭtvareńni».

A Aleh, jaki zajmajecca prodažam harodniny na rynku ŭ Ždanovičach, narakaje na pavialičanyja pabory z boku milicyjanieraŭ, jakija «da 2020 hoda źbirali pa 100 dalaraŭ z kropki», a ciapier nibyta źbirajuć užo pa 300.

Prykmietnaje miesca siarod hetych prablem zajmajuć padatki i inšyja abaviazkovyja płaciažy, a taksama składanaści, źviazanyja z pravilnym paradkam ich apłaty.

Alaksiej pracuje pa najmie ŭ adnym ź biełaruskich bankaŭ. Jamu «zaŭsiody chaciełasia zarablać bolš», i jon adkryŭ maleńkuju praduktovuju studyju z troch raspracoŭščykaŭ, teściroŭščyka i samoha Alaksieja ŭ roli PM/PO.

Pavodle słoŭ Alaksieja, «na starcie ŭsio było dobra», na pradukt studyi znajšlisia zamoŭcy. Psujuć hetuju karcinu «padatki dla IP, jakija vielmi kusajucca». Ale nie tolki jany: «A z 2023 hoda jašče i ŭnioski ŭ FSAN płacić treba, choć u mianie i tak jość pracadaŭca, jaki ich za mianie płacić».

«Rassłabicca z takoj pracaj nie atrymajecca»: padvojny padatak i inšyja siurpryzy z padatkovaj

Minčanka Safija zajmajecca repietytarstvam: vykładaje anłajn ruskuju movu inšaziemcam i dzieciam ludziej, jakija znachodziacca ŭ emihracyi. Repietytarstvam jana pačała zajmacca jašče va ŭniviersitecie, va ŭzroście 20-21 hoda. Prykładam dla dziaŭčyny stała maci, jakaja daŭno pracuje ŭ hetaj ža śfiery:

— Dośvied pracy nastaŭnikam u škole ŭ mianie byŭ. Na try hady mianie chapiła, dva ź jakich — adpracoŭka. A potym pryniała rašeńnie sychodzić, pakul nie zaciahnuła heta bałota.

Safija nie skardzicca na pamiery padatkaŭ. Ale apłata jaje pracy prychodzić z-za miažy. Heta nakłała hłyboki adbitak na ŭzajemaadnosiny anłajn-vykładčycy z padatkovaj inśpiekcyjaj.

— Lublu padatkovuju da hłybini dušy. Nie darma ŭ ich rejtynhi na kartach 1-2 bały. Atrymać adekvatnuju kansultacyju ad pradstaŭnikoŭ padatkovaj u mianie nie atrymałasia ni razu. Kožny raz pry znosinach ź imi stvarajecca adčuvańnie, što ludzi nie viedajuć, z čym jany pracujuć i jak usio funkcyjanuje.

Jak heta było ŭ mianie. Kali ja vyrašyła sychodzić u anłajn-vykładańnie, pačała z anłajn-škoły. Ja źviarnułasia ŭ padatkovuju za kansultacyjaj, kab jany mnie rastłumačyli, jaki z varyjantaŭ apłaty padatkaŭ mnie padydzie. NPD [padatku na prafiesijny dachod] tady jašče nie isnavała, tamu, jak ja dumała, u mianie byŭ vybar byŭ pamiž IP i adzinym padatkam.

Safija abmalavała im situacyju: raspaviała, što pracuje repietytaram ź dziećmi ŭ anłajn-škole, jakaja zarehistravanaja ŭ inšaj krainie. Na heta joj skazali, što jana moža płacić adziny padatak i ni pra što nie turbavacca:

— Ja tak i rabiła amal hod. Pakul u adnu z pajezdak na taksi vypadkova nie pahavaryła z kiroŭcam. Toj abmoviŭsia, što kali apłata pastupaje ad jurasoby z-za miažy, nibyta treba płacić padatak na dachod z-za miažy (vypłačvajecca jon paśla zakančeńnia kalandarnaha hoda i składaje 13% ad atrymanaj sumy).

U hety momant ja była ŭ mocnaj razhublenaści! Bo mnie ž pradstaŭniki padatkovaj skazali, što ja mahu być na adzinym padatku!

Viadoma, ja pajechała ŭ padatkovuju raźbiracca z hetym pytańniem. Jašče raz abmalavała situacyju, i mierkavańni supracoŭnikaŭ padzialilisia. Ź inśpiekcyi ja vyjšła ŭ poŭnym nierazumieńni, jak mnie pracavać. I vyrašyła ŭziać płatnuju kansultacyju. Voś na joj mnie i raskazali, što taksist mieŭ racyju (dziakuj jamu, što praśviatliŭ). I što adziny padatak nie padychodzić dla dadzienaha vidu pracoŭnych uzajemaadnosin.

Ale tady paŭstała pytańnie: jak być z hrašyma, jakija ja płaciła jak adziny padatak uvieś hety čas?

Ja znoŭ pryjechała ŭ padatkovuju, kab razabracca ŭ hetym pytańni. Stała ŭdakładniać, ci mahu ja zrabić niejki ŭzajemazalik, ci možna zrabić tak, kab padatki, jakija ja ŭžo vypłaciła, pajšli ŭ lik hetaha samaha padatku na dachod z-za miažy? Bo ŭvieś hety čas ja płaciła nie tudy z-za ich niekampietentnaj kansultacyi. I mnie skazali, što tak zrabić nielha. Maŭlaŭ, vy ž nie možacie dakazać, što vy nie pracavali niejak pa-inšamu. Choć i jany nie mahli dakazać advarotnaha.

Atrymałasia sprečka ateista ź vierujučym. U vyniku atrymałasia, što ja apłaciła padatki dva razy, tamu što inšych varyjantaŭ prosta nie było.

«U padatkovuju varta pisać listy»

Ach tak, adnojčy my razam z kalehami pa anłajn-škole napisali listy ŭ padatkovyja, kab nam rastłumačyli, jakuju formu apłaty padatkaŭ my možam vykarystoŭvać. Adkazy z roznych padatkovych usie atrymali roznyja: kamuści skazali, što padydzie IP, kamuści adziny padatak, kamuści NPD.

U padatkovuju varta pisać listy. Tak choć niejkija paćvierdžańni buduć, što ty nie vydumaŭ sabie, jak pracavać (choć hetyja papierki nie mocna abaroniać).

A taksama jość telefonny numar #189. Heta płatny kantaktny centr padatkovaj, dzie telefonnyja zvaroty zapisvajucca (ja sabie jašče ŭ natatkach dublavała datu i čas, kali źviartałasia). Tak chacia b buduć biassprečnyja dokazy tvaich zvarotaŭ. Na vusnyja ž parady ad padatkovaj nie varta raźličvać ad słova zusim.

«Vielmi chaciełasia b, kab ludziam nie pieraškadžali pracavać»

Heta nie ŭsie siurpryzy ad padatkovaj, pra jakija ŭzhadvaje Safija. Akazvajecca, pracujučy ŭ Biełarusi i vypłačvajučy padatki, całkam možna akazacca «darmajedam»:

— Z «paciešnaha»: kali płaciš padatak na dachod z-za miažy, ty jašče i ličyšsia niezadziejničanym u ekanomicy dziaržavy hramadzianinam. I tabie moža pryjści «list ščaścia» ŭ vyhladzie «padatku na darmajedstva» plus usio naležnaje.

Vielmi chaciełasia b, kab ludziam nie pieraškadžali pracavać. Tamu što ŭ apošnija hady praca pieratvaryłasia ŭ pastajannaje łatańnie dzir: vyvučeńnie padatkaŭ, źjaŭleńnie roznych abmiežavańniaŭ pa pracy, pošuki varyjantaŭ dla atrymańnia apłaty z-za miažy. Tak, niadaŭna źjaviŭsia NPD, tamu stała krychu praściej. Ale dapaŭnieńni da jaho časta absurdnyja. Naprykład, niadaŭniaje abmierkavańnie ab zabaronie vykarystańnia zamiežnych płatformaŭ dla navučańnia kštałtu Zoom i Google Meet. Abo abmiežavańni dla pracy z darosłymi, jakija nie atrymlivajuć u dadzieny momant nijakaj adukacyi.

Rassłabicca z takoj pracaj nie atrymajecca. Zaŭsiody treba trymać ruku na pulsie.

• 0
• 0
• 0
• 1
• 0
• 0
• 1
• 0