Bieśpiłotnik, jaki ŭpaŭ u Minsku, prylacieŭ z boku Barysava — šmatlikija śviedčańni
BPŁA lacieŭ da stalicy Biełarusi z paŭnočnaha ŭschodu. Ludzi pišuć, što bieśpiłotnik nazirali nad Mahiloŭskaj vobłaściu kala 0:00—01:00 i nad Barysavam prykładna ŭ 01:30—01:40.
29 lipienia ŭ minskim mikrarajonie Dambroŭka raźbiŭsia bieśpiłotnik. Jon urezaŭsia ŭ žyły dom, ale nie vybuchnuŭ, choć, jak śćviardžaje Śledčy kamitet, jon byŭ asnaščany vybuchovaj pryładaj na asnovie tratyłu. Navina pra toje, što bajavy bieśpiłotnik dalacieŭ da Minsku, aktyŭna abmiarkoŭvajecca ŭ sacyjalnych sietkach.
Z raskazaŭ ludziej robicca jasnym maršrut palotu bajavoj mašyny.
Dron spačatku pralacieŭ nad Mahiloŭskaj vobłaściu. Miarkujučy pa ŭsim, jon zalacieŭ u jaje kala 12 nočy i lacieŭ nad Mahiloŭščynaj prykładna hadzinu.
«U Mahiloŭskaj vobłaści ŭ 12 hadzin nočy prykładna pralataŭ nad domam», — piša adzin z kamientataraŭ. Druhi paćviardžaje, što čuŭ šum.
«U hadzinu nočy nad Mahiloŭskaj vobłaściu lacieŭ. Ja na hp (hałasavoje paviedamleńnie. — NN) siabroŭcy zapisała šum», — śćviardžaje inšaja.
«Tak-tak. Nočču. Huk, byccam by na matacykle tak niechta hnaŭ ci na mapiedzie… Adrazu padumała, što padałosia, što niešta ŭ niebie. U vyniku nie padałosia», — dzielicca jašče adna vidavočca.
A prykładna a pałovie na druhuju hadzinu nočy huk, padobny da huku mapieda, čuli ŭžo žychary Barysava.
«Siońnia nočču ŭ 1.30 hety cud pralataŭ nad Barysavam, ja navat vyjšaŭ na dvor i bačyŭ, jak jon lacieŭ u bok Minska».
Bolš infarmacyi pryvodzić žančyna, jakaja ŭ momant pralotu znachodziłasia ŭ miascovaj balnicy:
«Siońnia nočču było dva takija huki pierad samaj navalnicaj. Pryblizna ŭ hadzinu sorak. Naša balnica ŭ Barysavie kala lesu, i dakładna pad voknami nie moža jechać mapied. Huk byŭ adzin raz vielmi mocny chutkasny, druhi praz chvilin 7 i mienš byŭ čuvać. U našaj pałacie čuła nie adna ja. «Kryłaty mapied, ci što?» — tak my padumali».
Pra dziŭny huk, jaki ŭ Barysavie było čuvać u 1.40 nočy, piša jašče adna miascovaja žycharka:
«Žyvu ŭ Barysavie. U 1.40 čuła toje ž samaje. I mocna spužałasia. Pačała pisać siabram, ci čuli jany niešta. Tyja skazali, što tak. Ale zapeŭnivali mianie, što heta pitbajk ci matacykł. U vyniku raskazvaju im siońnia, i jany nie vierać».
«Ja taksama čuŭ dva razy», — pahadžajecca inšy.
«1.40 čuła. Barysaŭ» — paćviardžaje čas adna žančyna.
«Kala Pieršaj Savieckaj taksama byŭ čuvać» — dadaje jašče adzin kamientatar.
Što tyčycca padzieńnia bieśpiłotnika ŭ Minsku, to, pa słovach vidavočcaŭ, jano adbyłosia «dastatkova cicha», jon nie vybuchnuŭ.
«Ja žyvu ŭ hetym domie. Navat čuła jaho. Dakładniej, jak mašyny pačali raŭci. Sam bieśpiłotnik urezaŭsia dastatkova cicha».
«Jon urezaŭsia ŭ dom i ŭpaŭ paśla hetaha. Uzryvu nie było. Tam litaralna paru šybaŭ raźbiła. Lažaŭ prosta ŭ mianie pad padzikam».
«Ja kala hetaha miesca žyvu i ja ničoha nie čuŭ. Navat nie pračnuŭsia».
Nahadajem, što SK apublikavaŭ videazapis momantu padzieńnia bieśpiłotnika ŭ Minsku. Na abłomkach pakazali ŭkrainskija nadpisy.
SK śćviardžaje, što ŭ bieśpiłotnika była bajavaja častka, zapoŭnienaja traciłam i vialikaj kolkaściu paražalnych elemientaŭ.
U paviedamleńni SK havorycca: «Na miescy zdareńnia pracavała śledča-apieratyŭnaja hrupa. Śledčymi z pryciahnieńniem śpiecyjalistaŭ HKSE i sapioraŭ praviedzieny ahlad, zafiksavana śledčaja karcina. Vyniatyja frahmienty korpusa i kryłaŭ BPŁA, ruchavik, prybory navihacyi i bajavaja častka, asnaščanaja tratyłam i vialikaj kolkaściu paražalnych elemientaŭ u vyhladzie mietaličnych šarykaŭ», — havorycca ŭ paviedamleńni SK.
«U vyniku zdareńnia paciarpiełych niama, evakuacyja žycharoŭ nie pravodziłasia».
Na videa SK bačnyja ŭkrainskija nadpisy, u pryvatnaści, łahatyp zavoda Uavionix.
Incydent adbyŭsia 29 lipienia kala 2:00. Bieśpiłotnik, jak śćviardžajuć vidavočcy, urezaŭsia ŭ dom, paśla čaho ŭpaŭ na pryparkavany aŭtamabil i vybuchnuŭ.
Na videa, jakoje jość u redakcyi «Lusterka», možna zaŭvažyć načny dvor doma № 72 pa vulicy Matusieviča. U roliku čuvać šum, padobny da huku mapieda, paśla čaho čuvać mocny vybuch. Paśla hetaha na ziamlu padajuć abłomki, a pobač z pryparkavanymi aŭto źziajuć iskry pad sieryju hukaŭ udaraŭ i vybuchaŭ.
«Milicyja pryjechała tolki praz 25 chvilin, paśla čaho ŭsich razahnali, — raspaviali vidavočcy. — Usie pračnulisia ad hetaha praniźlivaha huku, noč atrymałasia žachlivaj».
U dvary hetaha doma znachodzicca dziciačy sad № 12.
Paśla publikacyj u niezaležnych miedyja adreahavała i Ministerstva abarony. Jano zajaviła, što bieśpiłotnik byŭ padaŭleny srodkami radyjoelektronnaj baraćby.
«Dziažurnymi siłami SPA kala 2 hadzin nočy 29 lipienia ŭ pavietranaj prastory Respubliki Biełaruś byŭ znojdzieny i spynieny palot nieapaznanaj pavietranaj celi — parušalnika paradku vykarystańnia pavietranaj prastory, identyfikavanaj jak BŁA. U vyniku ŭździejańnia na jaho srodkaŭ radyjoelektronnaj baraćby 02.33 BŁA ŭpaŭ u rajonie doma 72 pa vuł. Matusieviča h. Minska».
Paciarpiełych niama.
Tearetyčna ŭkrainskija bieśpiłotniki, jak i rasijskija, mohuć źbivacca z kursu i zalatać u Biełaruś. Ale na praktycy raniej heta zdarałasia pieravažna z rasijskimi BPŁA pad uździejańniem ukrainskich sistem radyjoelektronnaj baraćby.
Mahčymyja i spłanavanyja pravakacyi, kali adzin z bakoŭ vykarystoŭvaje bieśpiłotniki, padroblenyja pad čužyja vyraby.
Sapraŭdnaść abłomkaŭ bieśpiłotnika, videa jakich apublikavaŭ Śledčy kamitet Biełarusi, niezaležna pravieryć niemahčyma, bo na hety momant niama inšych videa ci fota ź miesca padziei. Mahčyma, ich i nie budzie. «Lusterka» paviedamlała, što milicyja nočču ačapiła miesca padzieńnia. A dniom pravaabaroncy «Viasny» paviedamili, što AMAP pravodzić zatrymańni kala doma, dzie bieśpiłotnik upaŭ.
Hieroja telefonnych źlivaŭ pałkoŭnika Kisiala, jaki zaklikaŭ kalečyć demanstrantaŭ, raptoŭna apuścili na rajonny ŭzrovień12
Kamientary