«Nie spali ŭsiu noč». Što adbyvajecca ŭ dvary ŭ Minsku, dzie źbili dron
Unačy 29 lipienia ŭ Minsku ŭpaŭ bieśpiłotnik. Tochka.by źjeździła na miesca zdareńnia i pahutaryła ź vidavočcami.
Žychary šmatpaviarchovika pa vulicy Matusieviča, 72, kažuć pra toje, što adbyłosia ŭnačy, aściarožna, hledziačy adzin na adnaho. Da hetaha momantu infarmacyja jašče nie była aficyjna paćvierdžanaja, tamu ludzi z aściarohaj pierakazvali naviny.
Susiedzi kažuć, što kala 02:00 čuli dziŭnyja huki, paśla čaho pryjechali avaryjnyja słužby. Ludzi zaniepakojeny — sadok pobač. Da 10:00 u dvary ŭžo amal nie zastavałasia śladoŭ zdareńnia.
Tolki adna siamiejnaja para sumna zaklejvaje škło svajho aŭtamabila — im nie pašancavała: na ich mašynu ŭpali abłomki. Vokny ich kvatery vychodziać nie ŭ dvor, dzie ŭsio adbyvałasia, a na supraćlehły bok. Tamu para nočču nie pačuła šum.
«Nam patelefanavali ŭ 08:39 i skazali, što našu mašynu paškodzili. Niavyznačanaja asoba. Napisali zajavu. Chto što kaža. Heta ŭžo potym my daviedalisia, što heta byŭ bieśpiłotnik», — raskazali ŭładalniki paciarpiełaha aŭto.
Akramia ich mašyny, abłomki bieśpiłotnika paškodzili jašče i susiedniuju, pobač pryparkavanuju.
U dvary prybirajecca dvornik. Kali jon pryjšoŭ, na miescy pracavali ekstrannyja słužby, a terytoryja była aharodžana.
«Kažuć, dron urezaŭsia. Nibyta na dach. Vyratavalniki zdymali. Mašyny paškodzilisia. Ale ja pryjšoŭ na pracu, kali ŭsio, pa sutnaści, užo prybrali», — raskazvaje mužčyna.
U vokny vyhladajuć uzrušanyja susiedzi. U padjezd śpiašajecca piensijanierka z torbami. Tolki pryjechała ź lecišča — adrazu da dački.
«Jana mnie raskazała, što tut takoje tvaryłasia! Uvieś čas nočču nie spali. A boh jaho viedaje, što heta było», — kaža piensijanierka.
Infarmacyju ab bieśpiłotniku ŭ Minsku paćvierdziła pres-słužba Ministerstva abarony: BPŁA byŭ źbity 29 lipienia kala 02:00.
«U vyniku ŭździejańnia na jaho srodkaŭ radyjoelektronnaj baraćby 02:33 BPŁA ŭpała ŭ rajonie doma 72 pa vulicy Matusieviča Minska. Paciarpiełych niama», — paviedamiła pres‑słužba Minabarony.
Ciapier čytajuć
Što viadoma pra Maksima Palanskaha i Mikałaja Śvirydava — biełaruskich alpinistaŭ, jakija źnikli ŭ harach Kyrhyzstana2
Kamientary
Suuusiedzi vakoł adzin lepš za ińšaha
Nažal i dalej ź imi žyć pobač